تالانتتى جاستار اراسىندا ۇيىمداستىرىلىپ وتىرعان ءسوز جارىسىنىڭ ماقساتى قاشاندا مەملەكەتتىك ءتىلدىڭ قولدانىلۋ اياسىن كەڭەيتۋ, مەملەكەتتىك ءتىل ساياساتىن كەڭىنەن ناسيحاتتاۋ, تالانتتى جاستاردى جان-جاقتى قولداۋ بولىپ تابىلادى. بايقاۋعا قاتىسقان 17-29 جاس ارالىعىنداعى جاستار كوركەمسوز وقۋ سايىسىن جوعارى دەڭگەيدە وتكىزدى دەۋگە نەگىز بار. قاتىسۋشىلارعا قاتاڭ تالاپتار قويىلدى. ونەر سالاسىنىڭ ماماندارى, وسى سالاداعى وقۋ ورىندارىنىڭ ستۋدەنتتەرى مەن وتكەن جىلدارداعى جەڭىمپازدارى بايقاۋعا جىبەرىلمەدى. اتالعان ءسوز جارىسىنا قالا اۋداندارىنان جۇلدەگەر بولىپ تابىلعان جەڭىمپازدار قاتىستىرىلدى.
بايقاۋدىڭ شارتى بويىنشا قاتىسۋشىلار پروزا, پوەزيا, دراما كەزەڭدەرى بويىنشا قازاقتىڭ بەلگىلى اقىن-جازۋشىلارىنىڭ, دراماتۋرگتەرىنىڭ شىعارمالارىنان جاتقا ءۇزىندى وقىدى. شىعارمالار قازاقستان, تۋعان جەر, تاۋەلسىزدىك, استانا تاقىرىپتارىن قامتىدى.
قازاقستاننىڭ ەڭبەك سىڭىرگەن قايراتكەرى گ.ەسەتوۆا, مەملەكەتتىك قۋىرشاق تەاترى ادەبيەت ءبولىمىنىڭ مەڭگەرۋشىسى ج.احمەتوۆا, اقىن, «سەرپەر» سىيلىعىنىڭ لاۋرەاتى ە.جۇمابەك قازىلار القاسىنىڭ قۇرامىندا قاتىسۋشىلاردىڭ كوركەم ءماتىندى وقۋ شەبەرلىگىنە, داۋىس مانەرىنە جانە ءتىل تازالىعىنا, ءماتىندى تاڭداۋ تالعامىنا, ساحنادا ءوزىن-ءوزى ۇستاۋىنا, كيىم سانىنە باسا نازار اۋداردى. وسىلايشا «جۇزدەن جۇيرىك, مىڭنان تۇلپار» شىققان كوركەمسوز سايىسىندا باس جۇلدە داستان بەكنۇرعا بۇيىردى. ءى ورىندى دينارا بايمۇحامبەتوۆا ەنشىلەسە, ءىى ورىندى تالانت حاسەنوۆ, ءىىى ورىندى شوقان قۇلنازاروۆ يەلەندى. مانەرلى ءسوز سويلەپ نۇرلان باقىتجانوۆ, اۋەزدى سوزىمەن اقنيەت امانحان ەرەكشەلەندى. ەرمەك تۇرعانبەكوۆ, اسەم ابدىماۋلەنوۆا, راقىمجان قالدىكوز ىنتالاندىرۋ سىيلىقتارىنا يە بولدى.
بايقاۋ جۇلدەگەرلەرى مەن قاتىسۋشىلارىن الماتى قالاسى تىلدەردى دامىتۋ باسقارماسى تىلدەردى دامىتۋ جانە ۇيلەستىرۋ ءبولىمىنىڭ باسشىسى ب.قالىمبەت سالتاناتتى جاعدايدا ماراپاتتادى.
بايقاۋدىڭ باس جۇلدەگەرى اباي اتىنداعى كوركەمسوز وقۋ شەبەرلەرىنىڭ رەسپۋبليكالىق بايقاۋىنا قاتىساتىن بولادى.
ەلۆيرا سەرىكقىزى,
«ەگەمەن قازاقستان»
الماتى
