شىرايلى-شۇعىلالى, پەيىلى كەڭ, مەيىرى مول تۇرعىندارى بار, قايىرىمدى قالا شىمكەنتىڭىز بەن تۇركى الەمىنىڭ تەكتى ءتورى, ەلىمىزدىڭ رۋحاني استاناسى تۇركىستانىڭىزعا بايلانىستى ۇلان-اسىر, اقجارىلقاپ, اقجولتاي قۋانىشىمىز قۇتتى بولسىن! ۇزاعىنان ءسۇيىندىرسىن.
جاسامپاز جارلىعىن جاريالاردا ەلباسىمىز ەكى اۋىز سوزبەن-اق شىمكەنتكە دە, تۇركىستانعا دا ايرىقشا انىقتامالار ايشىقتاپ, باستى-باستى ماقساتتار مەن مىندەتتەردى ايقىنداپ بەردى.
تۇركىستان توپىراعىندا ۇلى شايىرىمىز, دانىشپان ويشىلىمىز, تەڭدەسى جوق ءدىندار ۇستازىمىز احمەت ءياساۋيدىڭ, نەبىر حاندارىمىز بەن سۇلتاندارىمىزدىڭ, بيلەرىمىز بەن باتىرلارىمىزدىڭ, قولباسشى قايراتكەرلەرىمىزدىڭ اسىل سۇيەكتەرى جاتىر. تۇركى دۇنيەسىنە ورتاق ءتور, قازاق حاندىعىنىڭ استاناسى بولعان, ۇلى جىبەك جولىنىڭ بويىنداعى ۇلىق قالانىڭ, تۇركىستاننان تۇركىباسىعا, ءمىرزاشول – ماقتاارالدان وتىرار – سوزاققا سوزىلىپ جاتقان ءۋالاياتتىڭ, شۋاقتى شىمكەنت شاھارىنىڭ كەلەشەگى كەمەل, بولاشاعى بەرەكەلى.
احمەت ياساۋي بابامىز: ء«وز دىنىڭدەگىنى دوس تۇت, وزگە دىندەردەگىنى دە دۇشپان تۇتپا» دەگەن. ءسويتىپ تۇركى تىلىنە, مۇسىلمان دىنىنە قالتقىسىز قىزمەت ەتپەكتىڭ وشپەس ونەگەسىن تانىتقان. ولمەس مۇرالار قالدىرعان. الاش ارداقتىلارى تۇركىستان دەيتۇعىن اتاۋدى تۋ ەتىپ كوتەرگەن, ماڭگىلىك ەتپەكتى ارمانداعان. مىنەكيىڭىز, ەندى سول ارماندار مەن اڭسارلار ورىندالىپ وتىرىپتى.
وبلىسىمىزدىڭ تۇركىستان اتالۋى, شىمكەنتىمىزدىڭ جوعارى مارتەبە الۋى, ماقتاارال مەن سارىاعاشتا ەكى بىردەي اۋداننىڭ ەنشى ءبولىسىپ, ءوز الدارىنا وتاۋ تىگۋى – مۇنىڭ ءبارى دە رۋحاني جاڭعىرۋىمىزدىڭ ناقتى ناتيجەلەرى. جەڭىستەرى مەن جەمىستەرى.
ءبازبىر كىسىلەر وڭتۇستىك قازاقستان اتاۋىن قيمايمىز دەسەدى. قيماستىق – قاسيەتتى سەزىم. الايدا تۇركىستان ۇعىمى – ۇلى ۇعىم. وڭتۇستىك دەگەن ۇعىم دا الاشتىڭ اۋىزەكى اقىندار ايتىسى سەكىلدى اۋىزەكى تۇردە ايتىلا بەرەر. مەملەكەت باسشىسى تاۋەلسىزدىكتىڭ اۋەلگى جىلدارىندا: «وڭتۇستىكتە بىرلىك-ىنتىماق, باق-بەرەكە بولسا, بۇكىل قازاقستانىمىزدا بىرلىك-ىنتىماق, باق-بەرەكە بولادى» دەگەن.
كەشەگى وقو, بۇگىنگى تۇركىستان وبلىسىنىڭ, شىمقالانىڭ باسشىلارىنا دا, قوسشىلارىنا دا, بۇكىل جۇرتشىلىعىنا دا جوعارى جاۋاپكەرشىلىك جۇكتەلىپ وتىر. ول – ۇلىستىڭ ۇيىتقىسى, التىن قۇرساقتى ايماق اتىنا بۇرىنعىدان بەتەر بەرىك تە بەكەم بولماق, بىرلىك پەن ىنتىماقتى كوزدىڭ قاراشىعىنداي ساقتاپ, جۇمىلا جۇمىس ىستەمەك جاۋاپكەرشىلىگى.
قازاق ەلىندە قۋانىشتار كوبەيە بەرسىن.
مارحابات بايعۇت,
جازۋشى, قازاقستاننىڭ ەڭبەك سىڭىرگەن قايراتكەرى
