رۋحاني سالاداعى تىڭ باستامالار تۇركىشىل, تۇرانشىل, ازات ويلى اقىننىڭ تۋعان جەرىندە دە جالعاسىپ, وڭىرلىك باعدارلاما شەڭبەرىندە مادەني ءىس-شارالار جان-جاقتى جۇرتشىلىق تاراپىنان كەڭ قولداۋ تاپتى. مەرەيتوي شىمىلدىعى اقىن ءبىر كەزدەرى ەڭبەك ەتكەن ءبىلىم ورداسىندا ءتۇرىلىپ, جۇرتشىلىق بەلگىلى كاسىپكەر ءبىرجان شايمەردەنوۆتىڭ دەمەۋشىلىگىمەن ورناتىلعان ءمۇسىننىڭ اشىلۋ راسىمىنە ورتاقتاستى. وسىندا وتكەن «ماعجان جۇماباەۆ جانە زاماناۋي ءبىلىم» حالىقارالىق عىلىمي-تاجىريبەلىك كونفەرەنتسيادا قاسيەتتى سەمەي جەرىنەن كەلگەن بەلگىلى اقىن تىنىشتىقبەك ابدىكاكىموۆ, حالىقارالىق» الاش» سىيلىعىنىڭ لاۋرەاتى داۋلەتكەرەي كاپ ۇلى, عالىمدار شاعانگۇل جاناەۆا, سابىر سەڭكىباەۆ, جانار تالاسپاەۆا, تاعى باسقالارى سويلەپ, اقىن شىعارمالارى ارقىلى جاس بۋىندى وتانسۇيگىشتىككە تاربيەلەۋ, پەداگوگيكالىق مۇرالارىن قازىرگى ءبىلىم بەرۋ جۇيەسىنە قولدانۋ, يدەيالارىن ەنگىزۋ, «ماعجانتانۋ» زەرتتەۋ ورتالىعىن قۇرۋ ماسەلەلەرى توڭىرەگىندە وي-پىكىرلەر الماستى.
اكادەميك م. قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتى جانىنداعى سكۆەردە پوەزيا الەمىنىڭ جارىق جۇلدىزىنا ارنالعان ەڭسەلى قولا ەسكەرتكىش تۇعىرىنا قويىلىپ, اشىلۋ راسىمىندە ايماق باسشىسى قۇمار اقساقالوۆ, قازاقستان جازۋشىلار وداعىنىڭ توراعاسى ۇلىقبەك ەسداۋلەت, مارقۇمنىڭ تۋىسى ءلايلا جاڭاباەۆا جىلى لەبىزدەرىن ارنادى. قۇمار ىرگەباي ۇلى ءوز سوزىندە بابالار ەسىمى وشپەيتىنىن, اماناتىنا ادالدىق جالعاسا بەرەتىنىن اتاپ ءوتتى. وبلىستىق تاريحي-ولكەتانۋ مۇراجايىندا «ۇلتىن سۇيگەن ۇلى جۇرەك» كورمەسى, تەاترلاردا «شولپاننىڭ كۇناسى» جانە «ماعجاننىڭ سوتى» سپەكتاكلدەرى تاماشالاندى.
جەرگىلىكتى ارحيۆ قىزمەتكەرلەرى ماعجاننىڭ ءوز قولىمەن جازىلعان قۇجاتتاردى تاۋىپ, اۋقىمدى زەرتتەۋلەر نەگىزىندە ەكى تومدىق جيناق قۇراستىردى. بۇگىندە اقىننىڭ تۋعان جەرى– سارىتومار اۋىلىندا مادەنيەت ءۇيى, مەشىت, مۇراجاي, فەلدشەرلىك-امبۋلاتوريالىق پۋنكت, «تۋعان جەر» قازاق ۇلتتىق-مادەني ورتالىعى جۇمىس ىستەيدى. تۇرعىنداردىڭ 90 پايىزى تۇراقتى جۇمىسقا تارتىلعان. مەرەيتوي الدىندا مولودەجنىي اۋىلدىق وكرۋگىنە ۇلى اقىننىڭ ەسىمى بەرىلدى. مولودەجنىي ەلدى مەكەنى جاستار بولىپ وزگەرتىلدى. اۋدان بويىنشا 92 كوشەنىڭ اتاۋى قازاقشالانىپ, ابىلايحان, تولە بي, باتىر بايان, احمەت بايتۇرسىنوۆ, دىنمۇحامەد قوناەۆ, باۋىرجان مومىش ۇلى, مۇقاعالي ماقاتاەۆ, ءشامشى قالداياقوۆ سەكىلدى ءبىرتۋار تۇلعالاردىڭ ەسىمدەرىن يەلەندى. وسىدان ءۇش جىل بۇرىن جەرگىلىكتى جولداردىڭ 52 پايىزى قاناعاتتانعىسىز كۇيدە بولاتىن. سوڭعى ءۇش جىلدا قالپىنا كەلتىرۋ جۇمىستارىنا 4 ميلليارد, ونىڭ ىشىندە بيىل 1,9 ميلليارد تەڭگە باعىتتالدى. اۋدان ورتالىعىنداعى ءبىر مەكتەپكە ماعجاننىڭ اتىن بەرۋ, ەسكەرتكىشىن قويۋ ماسەلەسى جۋىردا شەشىلەدى. ونىڭ جانىنان جۇرتشىلىق دەم الاتىن اللەيا مەن سپورت عيماراتى سالىنىپ, كەشەندى ورتالىق بوي تۇزەيتىن بولادى.
تۇركيا, رەسەي, ءازىربايجان, وزبەكستان, مونعوليا, قىرعىزستاننان, ەلىمىزدىڭ ءار قيىرىنان جينالعان ارنايى دەلەگاتسيالار مەن قۇرمەتتى مەيماندار شوق-شوق قايىڭدار باۋرايىندا جاعالاي تىگىلگەن اق شاڭقان كيىز ۇيلەر مەن ەتنواۋىلعا تامسانا كوز تاستاپ, ماعجان رۋحىن سەزىنگەندەي بولدى.
وسىنداعى سالتاناتتى ءراسىمدى وبلىس اكىمى قۇمار ىرگەباي ۇلى كىرىسپە سوزبەن اشىپ, مەملەكەت باسشىسىنىڭ مەرەيتويعا ارنالعان قۇتتىقتاۋ حاتىن وقىپ بەردى.
«تۇركسوي» حالىقارالىق ۇيىمىنىڭ باس حاتشىسى دۇيسەن قاسەيىنوۆ تۇركى الەمىنە ورتاق تۇلعا تۋرالى تەبىرەنە تولعاندى. مادەنيەت جانە سپورت مينيسترلىگىمەن بىرلەسىپ, ايتۋلى شارالار اتقارىلعانىن, ونىڭ ىشىندە كورنەكتى تۇلعالاردىڭ, ايتۋلى عالىمداردىڭ,زەرتتەۋشىلەردىڭ قاتىسۋىمەن انكارا مەن كاستامونۋ قالالارىندا اتاپ ءوتىلۋىن ەرەكشە وقيعاعا بالادى. وتكەن عاسىردىڭ 20-شى جىلدارى جۇزدەگەن مىڭ تۇرىك شەيىت بولعان «چاناككالە» قاسىرەتىنە ورتاقتاسىپ, «الىستاعى باۋىرىما» دەگەن اتاقتى ولەڭ جازىپ, قاراجات جيناۋ ىسىنە بەلسەنە ارالاسقان قايرەتكەرلىگى ەش ۇمىتىلمايدى, دەدى.
حالىقارالىق تۇركى اكادەمياسىنىڭ پرەزيدەنتى دارحان قىدىرالى عۇننان تۋعان, كۇننەن تۋعان اقيىق اقىننىڭ شىعارمالارىنا تۇركى جۇرتى ەرەن قىزىعۋشىلىق تانىتىپ وتىرعانىن, وتتى ولەڭ-جىرلارىن ەركىندىكتىڭ, ازاتتىقتىڭ سيمۆولى رەتىندە قابىلدايتىنىن, بۇل ورايدا اكادەميا كوپتەگەن شارالارعا مۇرىندىق بولىپ جۇرگەنىن اڭگىمەلەدى. پاريج تورىندە ۇيىمداستىرىلعان ايتۋلى باسقوسۋ ەلباسى بەلگىلەپ بەرگەن رۋحاني جاڭعىرۋىمىزدىڭ حالىقارالىق دەڭگەيدەگى ايتۋلى شاراسى بولدى. وندا ۇلتتىق, رۋحاني قۇندىلىقتارىمىز الەمدىك دەڭگەيدە تانىلىپ, ماعجاننىڭ بىرنەشە تىلدەرگە اۋدارىلعان ولەڭدەر مەن پوەمالاردىڭ تۇساۋكەسەرى ۇلكەن اسەر قالدىردى. ءبىرىنشى رەت اعىلشىن تىلىنە ءتارجىمالاندى. د. قىدىرالى الەمنىڭ بىرنەشە تىلدەرىنە اۋدارىلعان كىتاپتاردى ايماق باسشىسىنا تارتۋ ەتتى.
مادەنيەت جانە سپورت مينيسترلىگىنىڭ وكىلى بەكزات سماعۇلوۆ مينيستر ارىستان مۇحامادي ۇلىنىڭ قۇتتىقتاۋ لەبىزىن جەتكىزدى. «رەسەي فەدەرالدىق قازاق ۇلتتىق-مادەني اۆتونومياسى» جالپىرەسەيلىك قوعامدىق ۇيىمىنىڭ پرەزيدەنتى توقتارباي دۇيسەنباەۆ, باكۋ مەملەكەتتىك ۋنيۆەرسيتەتىنىڭ پروفەسورى اسكەر راميز وزدەرىنىڭ جۇرەكجاردى سەزىمدەرىمەن ءبولىستى.
جەرگىلىكتى ونەرپازداردىڭ كونتسەرتتىك باعدارلاماسى قازاق ەستراداسىنىڭ جۇلدىزدارى التىناي جوراباەۆا مەن دوسىمجان تاڭاتاروۆتىڭ اۋەلەگەن اندەرىنە ۇلاستى.
بايگە مەن بالۋاندار باسەكەسى توي مەرەيىن اشا ءتۇستى. الامانعا تىگىلگەن جەڭىل كولىك م. جۇماباەۆ اۋدانىنىڭ جەلمەن جارىسقان جۇيرىگى «ۆاسيلەكتىڭ» قانجىعاسىنا بايلاندى. ەكىنشى جەڭىل كولىكتى تۇيە بالۋان باسەكەسىندە قارسىلاس شىداتپاعان مۇحيت تۇرسىنوۆ يەلەندى.
اقىننىڭ مەرەيتويى م.قوزىباەۆ اتىنداعى سقمۋ-دە وتەتىن «ماعجان جۇماباەۆتىڭ مۇراسى جانە رۋحانيات» حالىقارالىق عىلىمي-پراكتيكالىق كونفەرەنتسيامەن جانە «ماعجان كوكتەمى» بەسىنشى رەسپۋبليكالىق ونەر فەستيۆالى جالعاسادى.
ءومىر ەسقالي,
«ەگەمەن قازاقستان»
