استانا تۇرعىندارى جەكسەنبىلىك تاڭدى استانالىق ساياباقتاعى فيتنەس-جاتتىعۋدان باستادى. بۇل شاراعا تانىمال وتاندىق سپورتشىلار, وليمپيادا ويىندارىنىڭ قاتىسۋشىلارى مەن جۇلدەگەرلەرى قاتىستى. تاڭعى جاتتىعۋ جۇمىسى قالالىق اكىمدىكتىڭ "Fitness Park Astana» جوباسىمەن بىرگە ءوتتى. بۇل جوبا بىرنەشە جىلدان بەرى استانالىقتارعا دەمالىس كۇندەرىن ءساتتى ءارى دەنساۋلىققا پايدالى ەتىپ وتكىزۋگە كومەكتەسىپ كەلەدى. سونداي-اق, سپورتتىڭ ءار ءتۇرى بويىنشا وتەتىن شەبەرلىك ساعاتتارى مەن كورسەتىلىمدەر كىشكەنتاي قاتىسۋشىلاردىڭ ەرەكشە نازارىن اۋداردى.
«سپورت – بىرلىك, دوستىق جانە دامۋ يدەولوگياسىن ناسيحاتتايتىن باستى قۇرالداردىڭ ءبىرى. سول سەبەپتى, ەلىمىزدە مۇنداي سپورتتىق شارالار ءداستۇرلى تۇردە ءوتىپ, حالىقتىڭ قىزىعۋشىلىعىن ارتتىرعانىنا قۋانىشتىمىن. بۇل كۇن بىزدەر, وليمپياداشىلار ءۇشىن ەرەكشە قۋانىشتى كۇن. مەرەكە كەزىندە دوستارىمىزبەن جانە جانكۇيەرلەرىمىزبەن كەزدەسىپ, ءبىر مارقايىپ قالامىز. ءبىز ءۇشىن وليمپيزم دەگەن نە؟ وليمپيزم – اقىل مەن دەنەنىڭ جانە ەركىندىكتىڭ تەپە تەڭدىگىن ساقتاپ, بىرىكتىرەتىن ءومىر فيلوسوفياسى. سپورت پەن مادەنيەتتى جانە ءبىلىمدى بىرىكتىرەتىن وليمپيزم سالاۋاتتى ءومىر سالتىن ۇستانۋعا, ادامي قۇندىلىقتاردى جوعارى قويۋعا, جالپىعا ورتاق ەتيكالىق قاعيدالاردى ساقتاۋعا ۇندەيدى. مەن بارشاڭىزدى كەرەمەت مەرەكەمەن قۇتتىقتاي وتىرىپ, ءبىزدىڭ وليمپيادالىق وتباسىمىز ۇلكەيە بەرسىن دەگەن تىلەك ايتامىن», - دەيدى بۇگىندە كۇرەس تۇرلەرى بويىنشا قازاقستاندىق فەدەراتسيانىڭ ۆيتسە-پرەزيدەنتى قىزمەتىن ابىرويمەن اتقارىپ وتىرعان گۋزەل مانيۋروۆا.
سپورتتىق داستۇرلەر الماتىدا دا ۇمىت قالعان جوق. الماتىلىقتار بۇرىنعى داستۇردەن جاڭىلماي, وليمپيادا كۇنىن ۆەلوجارىسپەن اتاپ ءوتتى. جارىس «نۇرلى تاۋ» بيزنەس ورتالىعىندا باستالدى. سونداي-اق, ۆەلوجارىسقا قازاقستاندىق سپورتشىلار دا قاتىستى. 23 ماۋسىم كۇنى «يا س توبوي» بالالارعا پاللياتيۆتىك كومەك كورسەتۋ ورتالىعى قازاقستان ۇوك قولداۋىمەن وليمپيادا كۇنىن تويلاۋ اياسىندا ونكولوگيالىق دەرتكە شالدىققان بالالاردىڭ قاتىسۋىمەن «جاس كوشپەندىلەر» ويىنىن وتكىزدى.
23-24 ماۋسىم كۇندەرى قازاقستاننىڭ وزگە دە وبلىستارىندا حالىقارالىق وليمپيادا كۇنىنە ارنالعان سپورتتىق-بۇقارالىق شارالار ءوتتى. بۇل مەرەكەنى الەم حالقى ەكى كۇن بويى #UnitedBy ۇرانىمەن وتكىزگەن بولاتىن. قازاقستان حالقىن دا وسى ەكى كۇن بويى سپورت بىرىكتىردى. وليمپيادا كۇنىن تويلاۋعا قاتىسۋشىلار ارنايى سەرتيفيكاتقا جانە ەلىمىزدىڭ ۇلتتىق وليمپيادالىق كوميتەتى ۇسىنعان جۇلدەلەر مەن سىيلىقتارعا يە بولدى.
حالىقارالىق وليمپيادا كوميتەتى 1948 جىلدىڭ قاڭتارىندا سانكت-موريتسە قالاسىندا وتكەن حوك-ءتىڭ 42-ءشى سەسسياسى كەزىندە 23 ماۋسىم كۇنى حالىقارالىق وليمپيادا كۇنىن اتاپ ءوتۋ تۋرالى شەشىم قابىلدادى. بۇل كۇن ارنايى تاڭداپ الىندى. سەبەبى, 1984 جىلدىڭ 23 ماۋسىمى كۇنى وليمپيادالىق قوزعالىستىڭ قايتا جاندانۋىنا ولشەۋسىز ۇلەس قوسقان بارون پەر دە كۋبەرتەن حالىقارالىق اتلەتيكالىق كونگرەسس الدىندا ءوزىنىڭ تاريحي بايانداماسىن وقىعان ەدى. كونگرەسس 1896 جىلى گرەكيادا ءبىرىنشى وليمپيادا وتكىزۋ تۋرالى شەشىم قابىلداعان سوڭ, سول كەزدە قۇرىلعان حوك-ءتى كۋبەرتەن ءوزى باسقاردى.
