ايماقتا ينۆەستورلار ءۇشىن جاسالعان قولايلى جاعدايدىڭ ارقاسىندا اعىمداعى جىلدىڭ قاڭتار-مامىر ايلارىندا قىزىلوردا وبلىسىنىڭ نەگىزگى كاپيتالىنا 66 ميلليارد تەڭگەگە جۋىق ينۆەستيتسيا تارتىلىپ, كاسىپكەرلەرگە قىزمەت كورسەتۋ پروتسەسى اۆتوماتتاندىرىلعاندىقتان تەحنيكالىق شارتتاردى الۋ مەرزىمى ءبىر ايدان 3 جۇمىس كۇنگە دەيىن قىسقاردى. ودان بولەك, مەملەكەتتىك قىزمەت جانە سىبايلاس جەمقورلىققا قارسى ءىس-قيمىل اگەنتتىگىنىڭ جوباسى اياسىندا قىزىلوردالىق كاسىپكەرلەرگە قىزمەت كورسەتۋ ورتالىعىنىڭ نەگىزىندە ينۆەستورلاردى سىبايلاس جەمقورلىققا قارسى قولداۋ فرونت-ءوفيسىنىڭ اشىلۋى جوسپارلانۋدا.
قىزىلوردادا وبلىس اكىمى قىرىمبەك كوشەرباەۆ, «قازاق ينۆەست» ۇك» اق باسقارما توراعاسى ساپاربەك تۇياقباەۆ, «قازاق ينۆەست» ۇك» اق باسقارما توراعاسىنىڭ ورىنباسارى ءبىرجان كانەشەۆ پەن مۇددەلى مەملەكەتتىك ورگاندارى باسشىلارىنىڭ قاتىسۋىمەن وڭىرلىك ينۆەستورلاردى تارتۋ جانە قىزىلوردا وبلىسىنىڭ ينۆەستيتسيالىق كليماتىن جاقسارتۋ جونىندەگى كەڭەس وتىرىسى ءوتتى.
قىزىلوردا وبلىسىنىڭ اكىمى قىرىمبەك كوشەرباەۆ ەلباسىنىڭ جولداۋىنان تۋىندايتىن مىندەتتەردىڭ ءبىرى – ينۆەستيتسيالاردى ەكونوميكاعا تارتۋ ەكەنىن اتاپ ءوتىپ, وڭىردە ينۆەستورلار ءۇشىن قولايلى جاعداي جاساۋ بويىنشا جۇرگىزىلىپ جاتقان جۇمىستار تۋرالى ايتتى.
«وبلىسىمىزدا بارلىق قىزمەتتەردى ءبىر جەردەن الۋعا مۇمكىندىك بەرەتىن بىرىڭعاي كاسىپكەرلەرگە قىزمەت كورسەتۋ ورتالىعى جۇمىس ىستەيدى. ورتالىقتىڭ جۇمىسى تولىقتاي اۆتوماتتاندىرىلعان, سوندىقتان تەحنيكالىق شارتتاردى ۇسىنۋ مەرزىمى 1 ايدان 3 جۇمىس كۇنىنە دەيىن قىسقاردى. ءبىزدىڭ تاجىريبەمىزدى باسقا ايماقتار دا ەنگىزۋدە. ايماققا «زاكىرلى» ينۆەستورلاردى تارتۋ ماقساتىندا 2018 ج. قاڭتار-مامىر ايلارىندا 11 روۋد-شوۋ ۇيىمداستىرىلىپ, ناتيجەسىندە شەتەلدىك ينۆەستورلارمەن 3 مەموراندۋمعا قول قويىلدى», - دەدى ايماق باسشىسى.
2018 ج. 5 ايىندا نەگىزگى كاپيتالعا تارتىلعان ينۆەستيتسيالار كولەمى 15,4 پايىزعا ءوسىپ, 65,9 ملرد.تەڭگەنى قۇرادى.
ودان بولەك, ينۆەستيتسيالىق جوبالاردى جۇزەگە اسىرۋ ماقساتىندا كەز كەلگەن سىبايلاس جەمقورلىق وقيعالاردىڭ الدىن الۋ ماقساتىندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى «ينۆەستورلاردى سىبايلاس جەمقورلىققا قارسى قولداۋ» جوباسى ازىرلەندى.
«قىزىلوردالىق كاسىپكەرلەرگە قىزمەت كورسەتۋ ورتالىعىنىڭ نەگىزىندە ينۆەستورلاردى سىبايلاس جەمقورلىققا قارسى قولداۋ فرونت-ءوفيسىنىڭ اشىلۋى جوسپارلانۋدا. جوبانىڭ ماقساتى – ينۆەستورلاردى سىبايلاس جەمقورلىق كورىنىستەرىنەن بارىنشا قورعاۋ. بولاشاقتا كەز كەلگەن ينۆەستور كاسىپكەرلەرگە قىزمەت كورسەتۋ ورتالىعىندا قىزمەت الۋ بارىسىندا سىبايلاس جەمقورلىققا قارسى قورعاۋ پاكەتىن دە الاتىن بولادى», - دەدى وبلىس اكىمى.
وبلىستىق مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنىڭ باسشىسى ابزال مۇحيموۆ وسى جوبا تۋرالى بايانداما جاسادى. ەستەرىڭىزگە سالا كەتەيىك, ماۋسىم ايىنىڭ باسىندا استانادا «ينۆەستورلاردى سىبايلاس جەمقورلىققا قارسى قولداۋ» جوباسى قولعا الىنىپ, وتاندىق جانە شەتەلدىك ينۆەستورلاردى پاراقورلىق تاۋەكەلدەرىنەن قورعاۋ جانە اكىمشىلىك كەدەرگىلەردى تومەندەتۋ شارالارىن جۇزەگە اسىراتىن فرونت-وفيس اشىلدى. بولاشاقتا مۇنداي فرونت-وفيستەر بۇكىل رەسپۋبليكا بويىنشا اشىلاتىن بولادى.
كەڭەس وتىرىسى بارىسىندا ايماقتا ينۆەستيتسيالىق جوبالاردى جۇزەگە اسىرۋدىڭ ءمان-جايى تالقىلانىپ, وبلىس اكىمدىگى مەن «قازاق ينۆەست» اق اراسىندا ارىپتەستىك جونىندەگى مەموراندۋمعا قول قويىلدى.
