«جىل جوباسى» اتالىمىندا «قاشار كەنىشىنىڭ تاۋ-كەن كولىگى كەشەنىن باسقارۋدىڭ اۆتوماتتاندىرىلعان جۇيەسى» اتتى جۇمىس ۇزدىك دەپ تانىلدى. «اقىلدى كەنىش» جوباسى ەلباسى نۇرسۇلتان نازارباەۆ قاتىسقان تەلەكوپىردە سالتاناتتى تۇردە ىسكە قوسىلعان ەدى.
جىل سايىن «التىن گەفەست» ۇلتتىق سالالىق بايقاۋىنا 100-دەن استام ۇمىتكەر ءوتىنىم بىلدىرەدى. بيىل سسكوب سولاردىڭ قاتارىنان كورىندى. «جىل جوباسى» اتالىمىندا ەكونوميكالىق جانە الەۋمەتتىك ءال-اۋقاتتى ارتتىرۋ مەن وندىرىستىك قايتا قۇرۋدى كوبەيتۋگە باعىتتالعان ازىرلەمەلەر نەگىزگە الىنادى. بۇل ورايدا «سسكوب» اق ماماندارى ەنگىزگەن يننوۆاتسيا – «قاشار كەنىشىنىڭ تاۋ-كەن كولىگى كەشەنىن باسقارۋدىڭ اۆتوماتتاندىرىلعان جۇيەسى» جوباسى ەش ءشۇبا تۋدىرمادى, سول سەبەپتى دە 2018 جىلدىڭ ەڭ ۇزدىك جوباسى دەپ تانىلدى.
جاڭا ەنگىزىلىم قاشار كەنىشىن 4.0 يندۋسترياسى تۇجىرىمداماسىنا ساي دامىتۋعا مۇمكىندىك بەرەدى. جوبانىڭ ەلەمەنتتەرى تاۋ-كەن كولىگى كەشەنىن ناقتى ۋاقىتتا اۆتوماتتاندىرىلعان باسقارۋ مەن ديسپەتچەرلەندىرۋدى, گيس, MES جانە ERP (SAP) جۇيەلەرىنىڭ بازاسىندا جوسپارلاۋدىڭ بىرىكتىرىلگەن ورتالىقتارىن, جەرسەرىكتىك ءدال جايعاستىرۋ مەن بۇرعىلاۋ-جارۋ جۇمىستارىن باسقارۋدى ەنگىزۋمەن بايلانىستى. ناتيجەسىندە تيىمدىلىك كورسەتكىشتەرىنىڭ ايقىندىعى مەن باقىلاۋى قامتاماسىز ەتىلدى, قىزمەتكەرلەر جەدەل ەسەپكە الۋ, جابدىقتى قولدانۋ جونىندەگى شىنايى جانە تولىق اقپاراتقا 100 پايىز قول جەتكىزەدى.
«اقىلدى كەنىش» جوباسىن ەنگىزۋدىڭ ناتيجەسىندە كاسىپورىن وندىرەتىن ءونىمنىڭ ەكونوميكالىق تيىمدىلىگى ارتتى. ەۋرازيالىق توپ بۇل تەحنولوگيانى ءوزىنىڭ بارلىق كەن ءوندىرۋشى كاسىپورىندارىنا ەنگىزەتىن بولادى.
– سسكوب 4.0 يندۋسترياسى تەحنولوگيالارىن ەنگىزۋگە كىرىستى. كاسىپورىن تەحنيكالىق قايتا جاراقتاندىرۋدى بەلسەندى جۇرگىزۋدە. بۇل رەتتە ەكونوميكالىق ءتيىمدى جوبالاردى تابىستى دامىتۋعا مۇمكىندىك بەرەتىن, وسىلايشا ەلىمىزدىڭ تاۋ-كەن مەتاللۋرگيالىق كەشەنىنىڭ باسەكەگە قابىلەتتىلىگىن نىعايتاتىن ەڭ زاماناۋي تەحنولوگيالار پايدالانىلىپ جاتىر, –دەدى سوكولوۆ-سارىباي كەن-بايىتۋ وندىرىستىك بىرلەستىگىنىڭ باسشىسى بەرەكە مۇحامەتقاليەۆ.
تسيفرلاندىرۋ باعدارلاماسى نەگىزىندە جۇزەگە اسقان «اقىلدى كەنىش» جوباسى كەن الىبىنداعى ەڭبەكتى جەڭىلدەتە تۇسەدى. ءوندىرىستىڭ باسەكەگە قابىلەتتىگى ارتادى.
ءنازيرا جارىمبەت,
«ەگەمەن قازاقستان»
قوستاناي وبلىسى,
رۋدنىي قالاسى
