سول سياقتى جۋىردا عانا تاريحي شاھار ورتالىعىنداعى حالىق قاھارمانى قايرات رىسقۇلبەكوۆ اتىنداعى ساياباقتى قايتا جاڭعىرتۋ جۇمىستارى باستالدى. بۇگىنگى تاڭدا جالپى كولەمى 6 گەكتاردى قۇرايتىن ساياباقتى دەمونتاجداۋ ءىسى جۇزەگە اسىرىلۋ ۇستىندە. باتىر اتىنداعى ساياباقتان الداعى ۋاقىتتا جاستارعا ارنالعان مۋزەي, بالالار ويىن الاڭدارى, سۋبۇرقاقتار مەن دەمالىس ورىندارى سالىنادى. سونىمەن قاتار قىمىزحانا قۇرىلىسى جۇرگىزىلىپ, بۇل جەردە ۇلتتىق سۋسىنىمىز ناسيحاتتالاتىن بولادى. ال كەسپە تاستاردان توسەلگەن ارنايى جولدار ساياباق كوركىن ارتتىرا تۇسەتىنى ءسوزسىز. سونداي-اق ساياباقتاعى قايرات رىسقۇلبەكوۆ ەسكەرتكىشى جاڭا ساۋلەتتىك ۇلگىدە قايتادان جاسالادى.
حالىق قاھارمانى اتىنداعى ساياباق تاراز قالاسىنىڭ تولە بي داڭعىلىندا ورنالاسقان. بۇل كونە شاھارداعى نەگىزگى كوشە بولعاندىقتان, مۇندا جۇرەتىن حالىقتىڭ دا قاراسى قالىڭ. وبلىس اكىمدىگىنىڭ حابارلاۋىنشا, تولە بي داڭعىلى بويىندا, ياعني تاۋكە حان كوشەسىنەن سىپاتاي باتىر كوشەسىنە دەيىن تۇنگى جارىقتاندىرۋ شامدارىن زاماناۋي شامدارمەن اۋىستىرۋ جۇمىستارى دا باستالعان. وسى ۋاقىتقا دەيىن 10 شاقىرىمدىق جەلىلەر بويىندا 286 ەسكى ەلەكتر باعانى مەن تۇنگى جارىقتاندىرۋ شامدارى دا اۋىستىرىلعان. ەندى ەلەكتر سىمدارى جەراستىن ۇڭگىرلەۋ ارقىلى وتكىزىلەتىن بولادى. سونىمەن قاتار جەردە ەلەكتر باعاندارى ۇستىمەن جۇرگىزىلگەن ەلەكتر سىمدارى جويىلىپ, جاڭا جارىق ديودتى شامدارمەن شاحماتتى تۇردە اۋىستىرىلادى. ولار ءاربىر 30 مەتر سايىن ورنالاستىرىلماق.
حاميت ەسامان,
«ەگەمەن قازاقستان»
جامبىل وبلىسى
