رەسەيدىڭ جەڭىستى جولىن ۋرۋگۆاي جالعاستىردى. الەمنىڭ ەكى دۇركىن چەمپيونى ۋرۋگۆاي ساۋد ارابياسىن جەڭىپ, كەلەسى كەزەڭگە جولداما الدى. ەكى ويىندى دا جەڭگەن ۇجىمدار «ۆ» توبىنىڭ سەركەلەرى پورتۋگاليا مەن يسپانيانى كۇتەدى. ولار دا وزدەرىنىڭ ەكىنشى ويىندارىندا 3 ۇپايدان ەنشىلەدى. دەڭگەيى جوعارى فۋتبولشىلار پيرەنەي تۇبەگىنىڭ اياقدوپتى زور مەڭگەرگەنىن كورسەتتى. ءبىر گول سوعىپ, قورعانىستى مىقتاپ بەكىتكەن ەكەۋى پلەي-وففقا ءبىر تابان جاقىندادى. دەگەنمەن يسپانيا-يران اراسىنداعى ويىندا پارسى شىعاناعىنىڭ شەبەرلەرى پيرەنەي تۇبەگىنىڭ فۋتبولشىلارىنان ەش قايمىقپادى. ءتىپتى جاۋاپتى گولدى دا سوقتى. الايدا ازيالىق ويىنشىلار ءتارتىپ بۇزىپ الىپتى. ايتپەگەندە, «قىزىلباستار» ەلىنىڭ اياقدوپشىلارى قورجىندارىنا 1 ۇپاي سالىپ قايتار ما ەدى؟
ۋرۋگۆاي بولسا كۇشىن اياپ, بار ىنتاسىن كورسەتپەدى. ساۋديالىقتار ءوز مۇمكىندىگىن پايدالانا الماي, بىرىنشىلىكپەن ەرتە قوشتاستى. توپتان شىعاتىن ەش مۇمكىندىك قالمادى. مىسىر, ساۋد ارابياسى, ماروككو كوماندالارى توپتىق كەزەڭنەن ءارى وتە المايدى. ەندى ولار ءۇشىنشى ماتچتارىن تەك ابىروي ءۇشىن عانا وينايدى.
رەسەي قۇراماسىن جەر-جەبىرىنە جەتكىزىپ سىناعان جەرگىلىكتى ءباسپاسوز قازىر ورىس ويىنشىلارىن قولدى-اياققا تۇرعىزباي ماقتاپ جاتىر. «گولوۆين شىن تالانت», «باپكەرىمىز دارىن يەسى» دەپ اسىرا ماقتاپ تا جازدى. چەمپيونات الدىندا سىن ساداعىنا ءىلىپ, قۇرامالارىن قۇردىمعا جىبەرىپ وتىرعان جازارماننىڭ ەندى بۇلايشا قۇبىلۋىنىڭ سىرى نەدە؟ فۋتبول ساراپشىلارى بۇل ارەكەتتى شامامەن تۇسپالداپ, «الدىن الا جاسالعان جوسپارلى شار-
ۋا» دەپ باعا بەردى. بۇل شامامەن ء«وزىمىز جاساعان تويدا, ماقتاۋلى قىزدىڭ كۇيىن كەشپەيىك» دەگەن قام-قارەكەت سەكىلدى كورىنەدى. رەسەيدىڭ باستى كومانداسى ءوز توبىنان شىعا الماعان جاعدايدا ماسقارانىڭ كوكەسى بولار ەدى. ەندى ءبىر سىننان مۇدىرمەگەن كورشىلەرىمىز پلەي-وففتىڭ اۋىر وتكەلىنەن ءوتۋدى كوزدەيدى. سەبەبى وسى جەتكەنىمىزدىڭ ءوزى قاھارماندىق دەپ, پورتۋگاليا نەمەسە يسپانياعا قارسى ويىندا «تيسە تەرەككە, تيمەسە بۇتاققا» دەگەلى وتىر. مويىندارىنان اۋىر جۇك تۇسكەن سوڭ – ال شاۋىپ كور. رەسەيلىك ويىنشىلار شىن مانىسىندە قازىر جاسىل الاڭدا شاپقىلاپ ءجۇر. فۋتبولدى جىك-جىگىمەن تالدايتىن اگەنتتىكتەر ساراپتاما بەرىپ, سانداردى سويلەتتى. رەسەي ويىنشىسى الەكساندر گولوۆين وسى چەمپيوناتتا ازىرگە ەڭ كوپ جۇگىرگەن فۋتبولشى. ول ساۋد ارابياسىنا قارسى وتكەن ويىندا 12 شاقىرىمنان استام قاشىقتىققا جۇگىرىپ تاستاپتى. وزگە قۇرامالاردان قارار بولساق, بۇل تىزىمنەن كريستيان ەريكسەندى كوزىمىز شالادى. دات فۋتبولشىسى الاڭدا 12 شاقىرىمعا جەتەقابىل جۇگىرىپتى.
حالىقارالىق فۋتبول تويلارىندا اتوي سالىپ ۇيرەنىپ قالعان كريشتيانۋ رونالدۋ دا تاعى ءبىر رەكورد جاڭارتتى. ول 12 ءىرى جارىستا گول سوققان فۋتبولشى. ماروككو قاقپاسىنا باسپەن گول سوققان اتاقتى ويىنشى قازىر بىرىنشىلىكتىڭ باستى سۇرمەرگەنى. ونىڭ ەنشىسىندە 4 گول. بۇل جاعدايدان يسپانيا شابۋىلشىسى ديەگو كوستا يران قاقپاسىنا دوپ سوعىپ قالىسار ەمەس. تەگى برازيليالىق بولعانىمەن, جۇرەگى يسپانيا دەپ سوعاتىن ادۋىندى شابۋىلشىنىڭ ەسەبىندە 3 گول بار. شاماسى, ەكەۋىنىڭ تەكەتىرەسى ۇزاققا سوزىلادى-اۋ.
سوڭعى كۇندەرى فۋتبول تويىندا جاپونيالىقتار جايلى كوپ ايتىلدى. جاپونيا-كولۋمبيا اراسىنداعى ويىندى كۇنشىعىس ەلىندە بۇكىل حالىقتىڭ 63,79 پايىزى كورىپتى. ودان بولەك تە ەلدەردىڭ جالپىلاما رەيتينگىن ەسەپتەگەندە بۇل ماتچتى 36,62 ميلليون ادام تاماشالاعان. بۇل ازىرگە الەم چەمپيوناتىنداعى ەڭ جوعارعى كورسەتكىش. ارينە ەگەر جاپونيانىڭ ورنىندا قىتاي نەمەسە ءۇندىستان ويناعاندا رەيتينگ ودان دا جوعارى بولار ما ەدى؟ سەبەبى ءوز قۇراما كومانداسىنىڭ ويىنىن ءار مەملەكەت تۇگەلىمەن تاماشالاۋعا تىرىسۋدا. فۋتبولمەن تىنىستايتىن برازيليا بيلىگى ءتىپتى نەيمارلار جاسىل الاڭعا شىعاتىن كۇندى دەمالىس ەتىپ جاريالاپ, كەيبىر اۋداندارى جۇمىس كۇنىن قىسقارتىپ تاستادى.
ەرمۇحامەد ماۋلەن,
«ەگەمەن قازاقستان»
