THE GUARDIAN
تۇركيا سايلاۋعا دايىندالىپ جاتىر
وسى جەكسەنبىدە تۇركيادا جالپى سايلاۋ وتەدى. ەلەكتوراتتار ەل پرەزيدەنتى مەن پارلامەنت مۇشەلەرىن انىقتايدى. پرەزيدەنتتىك سايلاۋعا 6 ۇمىتكەر تۇسسە, پارلامەنتتىك داۋىس بەرۋگە 8 پارتيا قاتىسادى.
The Guardian گازەتى تۇركيادا وپپوزيتسيانىڭ كۇش الىپ كەلە جاتقانىنا قاراماستان, قازىرگى پرەزيدەنت رەجەپ تايپ ەردوعاننىڭ باسىم تۇسەتىنىن بولجاپ وتىر.
«ر.ت.ەردوعان ەل باسقارعان 16 جىل ىشىندە سايلاۋلاردىڭ بارىندە جەڭىسكە جەتىپ, تۇركيانىڭ تاياۋ شىعىستاعى ەڭ الىپ كۇشكە اينالىپ كەلە جاتقانىن ءاردايىم ايتىپ كەلەدى. سونىڭ دالەلى ىسپەتتى ەلدەگى ەڭ ۇلكەن قالا – ىستانبۇل ءتۇرلى جاھاندىق جوبالاردىڭ ورتالىعىنا اينالدى. ۇكىمەت قازاندا ىستانبۇلدا جىلىنا 90 ميلليون جولاۋشىعا قىزمەت كورسەتە الاتىن ءۇشىنشى اۋەجايدىڭ قۇرىلىسىن اياقتاۋدى جوسپارلاپ وتىر. سونداي-اق ءمارمار تەڭىزى مەن قارا تەڭىزدى جالعايتىن بوسفور بۇعازى ارقىلى وتەتىن جوبا ميللياردتاعان دوللاردى قاجەت ەتەدى», دەيدى The Guardian.
باسىلىمنىڭ پايىمداۋىنشا, ر.ەردوعان باسقاراتىن ادىلەت جانە دامۋ پارتياسى پارلامەنتتە از ورىن الۋى ىقتيمال. ايتسە دە ءوزىن مۇسىلمان الەمى مەن ەلىنىڭ كوسەمى رەتىندە كورسەتكەن 64 جاستاعى قازىرگى پرەزيدەنت ءوز ورنىن ساقتاپ قالماق.
«ەردوعان مەن ادىلەت جانە دامۋ پارتياسى سايلاۋشىلارعا ەكى ۋادە بەرىپ وتىر: ەكونوميكالىق ءوسىم جانە دەموكراتيا. پرەزيدەنتتى قولدايتىندار ونىڭ قوعامدىق سەنىمىنە ۇلكەن قۇرمەت كورسەتەدى. ماسەلەن, ەردوعاننىڭ بيلىگى كەزىندە پارلامەنتتە, ۋنيۆەرسيتەتتەردە جانە قوعامدىق عيماراتتاردا ورامال تاعۋعا رۇقسات ەتىلدى», دەيدى The Guardian گازەتى.
باسىلىمنىڭ دەرەكتەرىنە ساي, دەربەس ساۋالدامالار ر.ەردوعاننىڭ ءبىرىنشى اينالىمدا-اق جەڭىسكە جەتەتىنىن كورسەتىپ وتىر.
ALJAZEERA
68,5 ميلليون ادام بوسقىن
بۇۇ بوسقىندار جونىندەگى اگەنتتىگى الەمدە 68,5 ميلليون ادام ءوز ەلىنەن بەزىپ, بوسقىنعا اينالعانىن ايتادى. ۇيىمنىڭ مالىمەتىنە ساي, بوسقىنداردىڭ 53 پايىزى بالالار ەكەن.
ادامداردىڭ كوبى سوعىس, قاتىگەزدىك جانە قۋدالاۋدىڭ كەسىرىنەن ءوز ءۇيىن تاستاپ قاشقان. اگەنتتىك وسى ماسەلەگە بايلانىستى ارنايى زەرتتەۋ جۇرگىزگەن كورىنەدى. اتالعان زەرتتەۋگە سۇيەنسەك, وڭتۇستىك سۋدان, كونگو دەموكراتيالىق رەسپۋبليكاسىنداعى جاعداي, ميانماداعى روحيندجا ماسەلەسى ءالى كۇنگە دەيىن تولىق شەشىلمەگەن. وسىنىڭ سالدارىنان 2017 جىلى بوسقىندار سانى 68,5 ميلليونعا جەتكەن.
Al Jazeera ارناسىنىڭ حابارلاۋىنشا, بىلتىردىڭ وزىندە 16,2 ميلليون ادام بوسقىنعا اينالعان. ياعني, كۇن سايىن ورتا ەسەپپەن 44 000 ادام ءوز ۇيىنەن كەتۋگە ءماجبۇر بولعان.
«بۇل جاھاندىق دەڭگەيدە حالىقارالىق كەلىسىم مەن ىنتىماقتاستىقتى قاجەت ەتەتىن ماسەلە. بوسقىندار سوعىس, قۋعىن جانە قيىنشىلىق اسەرىنەن ءوز ەلىن تاستاپ شىعادى. ولارعا كومەكتەسۋىمىز قاجەت» دەيدى Al Jazeera ارناسىنا سۇحبات بەرگەن بۇۇ بوسقىندار جونىندەگى جوعارعى كوميسسارى فيليپپو گراندي.
قازىرگى تاڭدا ءار بەس بوسقىننىڭ تورتەۋى ءوز ەلىمەن شەكتەسەتىن مەملەكەتتە ۋاقىتشا مەكەن ەتۋدە. سوندىقتان ف.گراندي تۇركيا, پاكىستان, ۋگاندا سەكىلدى مەملەكەتتەرگە حالىقارالىق قوعامداستىق تاراپىنان كومەك قاجەت, دەدى.
EURONEWS
ەۋروايماقتىڭ بيۋدجەتى قۇرىلادى
گەرمانيا كانتسلەرى انگەلا مەركەل مەن فرانتسيا پرەزيدەنتى ەممانۋەل ماكرون ينۆەستيتسيا تارتۋ مەن بلوكقا كىرەتىن ەلدەردىڭ ەكونوميكاسىن جاقىنداستىرۋ ماقساتىندا ەۋروايماق بيۋدجەتىن قۇرۋ تۋرالى كەلىسىمگە قول جەتكىزدى.
Euronews ارناسىنىڭ مالىمەتىنشە, كەلىسىمگە ەۋروپالىق وداقتىڭ ءسامميتى قارساڭىندا قول جەتكىزىلگەن. ە.ماكروننىڭ پايىمداۋىنشا, ەۋروپالىق ايماقتى نىعايتۋ ماقساتىندا بىرقاتار رەفورمالار قابىلداۋ قاجەت. ال ا.مەركەل بۇل ماسەلەدە اسا مۇقيات بولۋ قاجەتتىگىن ەسكەرتەدى.
ء«بىز تاريحتىڭ جاڭا پاراقتارىن اشىپ وتىرمىز. ەۋروپالىق ايماقتىڭ بيۋدجەتى ينۆەستيتسيانى كوبەيتىپ, قارجى اينالىمىن جاقىنداستىرۋ ماقساتىندا جۇمىس ىستەيدى. ەكونوميكالىق جانە قارجىلىق وداق ەكونوميكالىق ساياسات جاقىنداسقاندا عانا ساقتالاتىنىن جاقسى بىلەمىز», دەيدى ا.مەركەل.
ەۋروپالىق ەكونوميكاعا قارجىلىق قاۋىپ ءتونىپ تۇرماعانىنا قاراماستان, كەيبىر ساراپشىلار بىرەگەي ۆاليۋتانى قورعاۋ ءۇشىن رەفورما قاجەت ەكەنىن العا تارتادى. وسىعان بايلانىستى ا.مەركەل ەۋروپالىق ايماق بيۋدجەتىن گەرمانيا ۇكىمەتى مەن بۋندەستاگتىڭ قولدايتىنىنا ءۇمىت ءبىلدىردى. ە.ماكروننىڭ ايتۋىنشا, بيۋدجەت 2021 جىلدان باستاپ ىسكە قوسىلماق. ونىڭ كولەمى, قارجىلاندىرۋ كوزدەرى جىل سوڭىنا دەيىن ءتيىستى مينيسترلىكتەر تاراپىنان ازىرلەنەدى.
دايىنداعان
اباي اسانكەلدى ۇلى,
«ەگەمەن قازاقستان»
