استانانىڭ 20 جىلدىق مەرەيتويىنا ءار ءوڭىر ءوز ۇلەستەرىن قوسۋدا. بۇل – ەلوردانىڭ ايبىنى مەن ابىرويى ەلدىك مەرەيگە اينالعاندىعىنىڭ ايعاعى. بۇدان ون جىل بۇرىن دا قولعا الىنعان ءىس ءداستۇرلى سيپات الىپ, جيىرما جىلدىقتا جالعاسىن تاپتى.
ەلىمىزدىڭ بارلىق ايماقتارىندا – وبلىس ورتالىقتارىندا اشىلعان «دوستىق» ءۇيى كۇنى بۇگىنگە دەيىن استانا قالاسىندا جوق بولاتىن. بۇل ولقىلىقتىڭ ورنىن ماڭعىستاۋلىقتار تولتىرىپ, باۋىرجان مومىش ۇلى كوشەسى بويىندا تۇرعان كونە نەكە سارايىن قايتا جاڭعىرتىپ, «دوستىق» ءۇيى رەتىندە ۇسىنباق.
ءۇش قاباتتى عيمارات 4900 شارشى مەتر اۋماققا ورنالاسقان. كەلۋشىلەر ءۇشىن 60 كولىك ورنى, قىزمەتكەرلەر ءۇشىن ارنايى 13 كولىك ورنى جاساقتالىپ, جان-جاعى اباتتاندىرىلىپ, كوگالداندىرىلدى.
عيماراتتىڭ ءبىرىنشى قاباتىندا بي زالى, اسحانا, ستۋديا ورنالاسسا, ەكىنشى, ءۇشىنشى قاباتتاردا اكت زالى, كىتاپحانا, كيىم بولمەسى, مۇراجاي, كونفەرەنتس زال ورنالاسقان. «دوستىق-قازاقستان» مەكەمەسىنىڭ تاپسىرىسىمەن, «MediArtGroup» جشس جوبالاۋىمەن «سك «الاتاۋينجستروي» جشس جۇزەگە اسىرعان قۇرىلىس-جوندەۋ جۇمىستارىنا 50-گە تارتا ادام جۇمىلدى. «دوستىق» ءۇيىنىڭ جۇمىستارى قازىر تولىق اياقتالىپ, استانا قالاسىنىڭ مەرەيتويىنا تاپسىرىلاتىن سالتاناتتى ءساتتى كۇتۋدە.
– استانا مەرەيتويى – ەلگە ورتاق مەرەكە. توي شاشۋسىز بولمايتىنى بەلگىلى. ەلىمىزدىڭ ءاربىر ءوڭىرىنىڭ ەلورداعا سىي جاساۋى – استانانىڭ اجارىن اسىرىپ, قاجەتتىلىگىنە قولداۋ بەرەتىن جاقسى باستاما. بۇدان ون جىل بۇرىن «نۇر استانا» مەشىتىن جوندەپ, جان-جاعىن اباتتاندىرىپ سىيعا تارتقان ماڭعىستاۋ وبلىسى بيىل «دوستىق» ءۇيىن سالۋدى قۇپ كوردى. ءبىزدىڭ سىيىمىز استانالىقتارعا ۇنايدى دەپ ويلايمىز, دەيدى ماڭعىستاۋ وبلىستىق قۇرىلىس باسقارماسى باسشىسىنىڭ ورىنباسارى بەيسەنعالي كەنجاليەۆ.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
