وسى اپتادا ەڭ الدىمەن الماتى وبلىسى بويىنشا دەپارتامەنتىنىڭ اقپاراتتىق قاۋىپسىزدىك ءبولىمى «كوكتەم-2025» شاقىرىلىمىنىڭ ساربازدارىن شىعارىپ سالۋ ءراسىمىن وتكىزدى. شارادا وزدەرىنە جۇكتەلگەن مىندەتتى ابىرويلى ورىنداعانى ءۇشىن قاتارداعى جاۋىنگەرلەر: ەركەبۇلان مەيرانبەك ۇلى, ادىلبەك كەنجەعۇل, جانىبەك كارىمجان, ابىلايحان سەرىكباي جانە تاڭنار ءدىلمۇرات دەپارتامەنت باستىعىنىڭ مىندەتىن ۋاقىتشا اتقارۋشى پولكوۆنيك ا. اليەۆتىڭ العىس حاتىمەن ماراپاتتالدى. ءبولىم باستىعىنىڭ ورىنباسارى لەيتەنانت ازيز وسمانوۆ ۇيلەرىنە ورالاتىن ساربازدارعا وتان الدىنداعى ادال قىزمەتتەرى ءۇشىن العىس ايتتى.
سونىمەن قاتار مۇنداي ءسۇيىنشى جاڭالىقتى رايىمبەك اۋدانى بويىنشا شەكارا باسقارماسىنىڭ ۇيگە ورالاتىن كۇندى اسىعا توسىپ جۇرگەن ساربازدارى دا قۋانا قارسى الدى. اسىرەسە اتالعان شەكارا باسقارماسىنا قاراستى «سۇڭقار» شەكارا بولىمشەسىنىڭ ساربازدارى وسىناۋ جۇرەكجاردى ءساتتى الەۋمەتتىك جەلىلەردىڭ بىرىنە سالىپ ۇلگەرىپتى. مۇندا اسكەري كولىككە وتىرعان وزدەرىنىڭ قارۋلاستارىمەن قول بۇلعاپ قوشتاسىپ جاتقان شەكاراشىلار كورىنەدى.
ءيا, بۇل – بۇرىننان كەلە جاتقان ءداستۇر. اسكەردەن قايتاتىن ءسات تۋعاندا ساربازدى الدىمەن شەكارا بولىمشەسىنىڭ باستىعى سوڭعى رەت ساپقا تۇرعىزىپ, بارلىعىمەن قول الىسىپ, قوشتاسادى. سوسىن, كەزەك اسكەردىڭ قىزىعى مەن قيىندىعىن بىرگە وتكەرگەن قارۋلاس دوستارىنا كەلەدى. ولار دوستارى مىنگەن كولىكتى قاقپادان يتەرىپ شىعارادى... وسى ساتتەن باستاپ, ساربازدار ءۇشىن «قارۋلاس» دەگەن ۇعىم ناعىز دوستىقتىڭ بەلگىسىنە اينالادى. ءتىپتى, بۇل بالا كەزدەن بەرى جالعاسىپ كەلە جاتقان ناعىز دوستىقتان دا ارتىق.
سونىمەن, رايىمبەك اۋدانى بويىنشا شەكارا باسقارماسىنىڭ ۇجىمى 100-گە تارتا ساربازدى ۇيلەرىنە سالتاناتتى جاعدايدا شىعارىپ سالدى. ال قاراساي اۋدانى بويىنشا شەكارا باسقارماسى باستىعىنىڭ تاربيە جۇمىستارى جونىندەگى ورىنباسارى پودپولكوۆنيك ت. تابىلديەۆتىڭ ايتۋىنشا, العاشقى بولىپ, 24 سارباز باسقارمامەن قوشتاسقان. اسكەردەن كەيىن قىزمەتتەرىن كەلىسىمشارت شارت نەگىزىندە جالعاستىرۋدى شەشكەن جەتى ساربازعا بۇيرىق شىعىپتى. تاعى دا ءبىر ءسۇيىنشى جاڭالىق, ءۇش سارباز شەكاراشى وفيتسەر اتانۋ ءۇشىن ۇقك شەكارا اكادەمياسىنا وقۋعا تۇسۋگە بەل بۋعان كورىنەدى. ال تۋعان ۇيلەرىنە ورالعان ساربازدار جاۋىنگەرلىك دايارلىق قىزمەتىندە كوزگە تۇسكەنى ءۇشىن شەكارا باسقارماسى باستىعىنىڭ گراموتاسىمەن ماراپاتتالىپ, وسىنداي پاتريوت ۇل تاربيەلەگەنى ءۇشىن ولاردىڭ اتا-انالارىنا العىس حات جولداناتىن بولدى.
ءيا, بۇگىن ولاردى اتا-اناسى, تۋعان-تۋىستارى ساعىنىپ كۇتەدى. ەندى ساربازدار تۋعان جەرگە ابىرويمەن ورالىپ, العان ءتالىم-تاربيەسىن ءومىر جولىندا جالعاستىرادى. ساربازداردى شىعارىپ سالۋ ءداستۇرى – اسكەري ءومىردىڭ اجىراماس بولىگى. بۇل – ەل قورعاۋ جولىنداعى ەڭبەكتى باعالاۋ, ازاماتتىق بورىشتى وتەۋدىڭ ايقىن كورىنىسى.
تامارا داۋلەتباەۆا,
ۇقك شەكارا قىزمەتى
الماتى وبلىسى بويىنشا دەپارتامەنتىنىڭ
ءباسپاسوز حاتشىسى
