قازاقستان رەسپۋبليكاسىندا ادام قۇقىقتارىن قورعاۋدى كۇشەيتۋ, وتباسى ينستيتۋتىن نىعايتۋ جانە مەملەكەتتىك وتباسىلىق ساياساتتى جەتىلدىرۋ ماقساتىندا قاۋلى ەتەمىن:
1. قازاقستان رەسپۋبليكاسى پرەزيدەنتىنىڭ جانىنداعى وتباسى ماسەلەلەرى جونىندەگى ۋاكىل ينستيتۋتى (بۇدان ءارى – ۋاكىل) قۇرىلسىن, ول ءوز قىزمەتىن قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا قۇرامىندا توراعانىڭ ورىنباسارى رەتىندە قوعامدىق نەگىزدە جۇزەگە اسىرادى.
2. ۋاكىلدىڭ نەگىزگى ماقساتتارى وتباسى قۇقىقتارى مەن مۇددەلەرىن قورعاۋدى كۇشەيتۋ, وتباسى ينستيتۋتىن جانە ءداستۇرلى وتباسىلىق قۇندىلىقتاردى نىعايتۋ, مەملەكەتتىك وتباسىلىق جانە دەموگرافيالىق ساياساتتى جەتىلدىرۋ, وتباسىلىق-تۇرمىستىق زورلىق-زومبىلىقتىڭ الدىن الۋ, سونداي-اق قازاقستاندىق وتباسىلاردىڭ ءال-اۋقاتىنا جاردەمدەسۋ بولىپ بەلگىلەنسىن.
3. قازاقستان رەسپۋبليكاسىنىڭ ۇكىمەتى وسى جارلىقتان تۋىندايتىن شارالاردى قابىلداسىن.
4. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.
5. وسى جارلىق قول قويىلعان كۇنىنەن باستاپ قولدانىسقا ەنگىزىلەدى.
ەسكە سالا كەتەيىك, بۇعان دەيىن مەملەكەت باسشىسى قاسىم-جومارت توقاەۆ 2026 جىلعى اسكەرگە شاقىرۋ تۋرالى جارلىققا قول قويعان ەدى.
