«ۇلتتىق كيىم – حالقىمىزدىڭ عاسىرلار بويى قالىپتاسقان ەستەتيكالىق تالعامىن, دۇنيەتانىمىن, بولمىس-ءبىتىمىن ايشىقتايتىن اسىل مۇرا. كيىم ۇلگىلەرىندەگى ويۋ-ورنەك, زەرگەرلىك اشەكەي, كەستە مەن بەدەر قازاق حالقىنىڭ رۋحاني بايلىعى مەن مادەني بولمىسىنان سىر شەرتەدى. ءىس-شارانىڭ باستى ماقساتى – وسى قۇندىلىقتاردى كەڭىنەن ناسيحاتتاپ, ۇلتتىق كيىم ۇلگىلەرىن زامان تالابىنا ساي جاڭعىرتۋ جانە ولاردى كۇندەلىكتى ءسان كەڭىستىگىندە دارىپتەۋ», دەيدى «Abai TV» تەلەارناسىنىڭ ديرەكتورى ازامات كەڭەس ۇلى.
مەرەكەلىك باعدارلاما ۇلتتىق جانە زاماناۋي ەتنو مۋزىكامەن باستالىپ, كوپشىلىككە ەرەكشە اسەر سىيلادى. ءىس-شارادا «سارايشىق» ەتنوانسامبلى مۋزىكالىق پوپۋرري ورىنداپ, مۋلتينسترۋمەنتاليست ەدىل قۇسايىنوۆ ەتنو اۋەندەرىمەن كەشتىڭ كوركىن اشا ءتۇستى. سونداي-اق ءداستۇرلى ءان ونەرىنىڭ وكىلدەرى ايگۇل ەلشىباەۆا مەن جازگۇل داڭىلباەۆا ساحنادا ونەر كورسەتتى.
ال ۇلتتىق كيىمدەر شەرۋىندە وتاندىق ديزاينەرلەر, انشىلەر, «Qazaqstan» تەلەارناسىنىڭ جۇرگىزۋشىلەرى نۇربەك بەكباۋ, ارمانگۇل توقتامۇرات, يرينا تەن, بەكسۇلتان اكىمجان, سونداي-اق «قازاقستان» تەلەراديوكورپوراتسياسىنىڭ قىزمەتكەرلەرى مەن قالا تۇرعىندارى بەلسەنە قاتىستى. ۇكىلى كامشات پەن بۇرمەلى كويلەك كيگەن ارۋلار, اق كيمەشەكتى اجەلەر مەن شاپان جامىلعان جىگىتتەردەن قۇرالعان 230 ادامدىق توپ ساۋدا ورتالىعىن ارالاپ, حالىق اندەرىن شىرقادى.
ەلورداداعى ەڭ ۇلكەن ساۋدا ويىن-ساۋىق ورتالىعىندا وتكەن مەرەكەلىك ءىس-شارادا «ۇماي انا» كوللەكتسياسى, «ادەمى-اي», «جاراس» ءسان كلۋبى, «قۇرالاي», «حان», «نازيم», ء«داستۇر», «اساح», «قازاق ورداسى» سىندى ءسان ورتالىقتارىنىڭ ۇلتتىق ۇلگىدەگى كيىمدەرى كوپشىلىك نازارىنا ۇسىنىلدى.
