ىرىكتەۋ باستالعان تۇستا شۆەتسيانى ەشكىم سونشالىقتى ءبىر قارسىلاس كورىپ, فاۆوريتتەر قاتارىنا قوسقان جوق. ونىڭ باستى سەبەبى, قۇرامادان زلاتان يبراھيموۆيچ كەتىپ قالدى. اتاقتى شابۋىلشى ەۋرو دوداسىنان كەيىن قۇرامادا وينامايمىن دەپ, ءوز ەركىمەن باس تارتتى. تالاي تىعىرىقتان الىپ شىققان الىپتىڭ شارشاعاندىعى راس. الايدا ونىڭ ورنىن باساتىن ەلدە شابۋىلشى جوقتىڭ قاسى. ونىڭ ۇستىنە زلاتان «مانچەستەر يۋنايتەد» ساپىنا اۋىسىپ, ەۋروپا ليگاسىنىڭ ويىنىندا جاراقات الىپ قالدى. ال شۆەتسيا «بارىمەن بازار» دەپ ىسكە كىرىستى. نەگىزگى قارسىلاس – فرانتسيا مەن نيدەرلاندى قۇرامالارى بولاتىن. ماماندار وسى ەكى ۇجىم ءبىرىنشى ورىنعا تالاسىپ, جەڭىلگەنى وتپەلى ويىنعا كەتەر دەدى. ىرىكتەۋ سوڭىنا قاراي جاعداي كۇرت وزگەردى. راسىمەن دە فرانتسيا ەشقانداي ماسەلەسىز ءوز ماقساتىنا جەتتى. بىراق سوڭعى تۋرلاردا ول نيدەرلاندىنى ءوز الاڭىندا 4:0 ەسەبىمەن تاس-تالقان ەتتى دە, ديك ادۆوكات كومانداسىن تاعدىر تالايىنا تاستادى.
قالعان ءۇش ويىندا ەكىنشى ورىنعا جارماسۋدىڭ امالىن قاراستىرعان نيدەرلاندى قۇراماسى شۆەتسيانىڭ ءسۇرىنۋىن كۇتتى. سەبەبى ەكى كوماندانىڭ ۇپايى بىردەي بولعانىمەن, دوپ ايىرماسى سكانديناۆتاردىڭ پايداسىنا بولاتىن. ىرىكتەۋ اياقتالۋعا ءبىر تۋر قالعاندا شۆەتسيا ليۋكسەمبۋرگ قاقپاسىنا 8 گول سوعىپ, ەكىنشى ورىنعا نىق سەنىممەن شىقتى. سوڭعى تۋردا نيدەرلاندى شۆەتسيانى 2:0 جەڭگەنىمەن, ەكىنشى ورىنعا كوتەرىلە المادى. ال سكانديناۆيالىقتاردىڭ باستى ماقساتى 7:0 بولىپ جەڭىلمەۋ ەدى.
ەكىنشى ورىن العاننان سوڭ شۆەتسيانى تاعى ءبىر اۋىر سىن كۇتىپ تۇردى. ەكى ويىننان تۇراتىن وتپەلى ماتچ. ياعني قوس كەزدەسۋدىڭ قورىتىندىسى بويىنشا يتاليانى جەڭىپ شىعۋ. العاشقى ويىندا شۆەتسيا ەرلىك جاساپ قارسىلاستى 1:0 جەڭدى. ياكوب يۋحانسسوننىڭ سوققىسى جول-جونەكەي قارسىلاس قورعاۋشىسىنا ءتيىپ, باعىتىن وزگەرتتى. بۋففون بۇل دوپتى توسا المادى. جاۋاپتى ويىن يتاليادا ءوتىپ, قوناقتار قورعانىسقا مىقتاپ ورنىقتى. «سكۋادرا ادزۋررا» جانكۇيەرلەرى جەرلەستەرىنە سەنگەنىمەن, ويىندا بىردە-ءبىر گول سوعىلعان جوق. شۆەتسيا قورعانىسىنىڭ وتە مىقتى ەكەنىن دالەلدەپ, مۋنديالعا جولداما الدى.
مىنە, ماماندار قورعانىسىن ماقتاپ جۇرگەن شۆەتسيانىڭ وسىنداي قىرى بار. ول از دەسەڭىز, سوڭعى ەكى جولداستىق كەزدەسۋى قالاي اياقتالعانىن دا ەستەرىڭىزگە سالا وتىرايىق. 2 ماۋسىم كۇنى شۆەتسيا كورشىلەس دانيامەن 0:0 تەڭ ءتۇستى, سوسىن ءدال وسىنداي ناتيجەمەن 9 ماۋسىم كۇنى پەرۋ قۇراماسىمەن دە تەڭ تارقاستى.
الەم چەمپيوناتىنىڭ الدىندا زلاتان يبراھيموۆيچ اقش-تىڭ «لا گەلاكسي» كومانداسىنا اۋىسىپ, جاقسى ونەر كورسەتە باستادى. جاراقاتىنان ايىققانىن بايقاتىپ, ادەمى گولدار سوقتى. كەيىن ءبىر سۇحباتىندا «ەگەر باپكەر شاقىرسا, مەن ۇلتتىق قۇراما ساپىنا قايتا بارامىن. شۆەتسيا ءۇشىن كومەگىمدى ايامايمىن», دەدى. بىراق ياننە اندەرسون زلاتاندى قۇراماعا شاقىرمادى. سەبەبى ادۋىندى شابۋىلشى قۇراماعا كەلسە, وزگە جىگىتتەر وزدەرىن كەمشىن سەزىنىپ, بۇكىل نازار يبراعا اۋادى دەپ ويلادى. دەگەنمەن يبراھيموۆيچ رەسەيگە ارنايى شاقىرتۋمەن كەلىپ, رەسەيگە جانكۇيەر بولامىن دەدى. ال شۆەتسيا ويىنشىلارى وزدەرىن پسيحولوگيالىق تۇرعىدا جاقسى سەزىنىپ, مەكسيكا, گەرمانيا, وڭتۇستىك كورەيانىڭ اراسىنان پلەي-وففقا جولداما الۋعا تىرىسادى.
شۆەتسيا قۇراماسىنىڭ ءتىزىمى:
• قاقپاشى: روبين ولسەن («كوپەنگاگەن», دانيا), كارل يوحان يونسسون («گەنگام», فرانتسيا), كريستوففەر نوردفەلدت («سۋونسي», ۋەلس);
• قورعاۋشىلار: ميكاەل لۋستيگ («سەلتيك», شوتلانديا), ۆيكتور ليندەلەف («مانچەستەر يۋنايتەد», انگليا), اندرەاس گرانكۆيست («كراسنودار», رەسەي), ليۋدۆيگ اۋگۋستينسسون («ۆەردەر», گەرمانيا), ەميل كرافت, فيليپ حەلاندەر (ەكەۋى دە – «بولونيا», يتاليا), پونتۋس يانسسون («ليدس», انگليا), مارتين ولسسون («سۋونسي», ۋەلس);
• جارتىلاي قورعاۋشىلار: ەميل فورسبەرگ («لەيپتسيگ», گەرمانيا), ۆيكتور كلاسسون («كراسنودار», رەسەي), البين ەكدال («گامبۋرگ», گەرمانيا), سەباستيان لارسسون («حالل», انگليا), دجيممي دۋرماز («تۋلۋزا», فرانتسيا), ماركۋس رودەن («كروتونە», يتاليا), وسكار حيلەمارك («دجەنوا», يتاليا), گۋستاۆ سۆەنسسونن («سيەتل», اقش);
• شابۋىلشىلار: ولا تويۆونەن («تۋلۋزا», فرانتسيا), ماركۋس بەرگ ء(«ال-اين», ءباا), يون گۆيدەتتي («الاۆەس», يسپانيا), يسااك كيسە تەلين («ۆاسلاند-بەۆەرەن», بەلگيا).
• باس باپكەر: ياننە اندەرسسون – 55 جاستا (20.09.62)
ەرمۇحامەد ماۋلەن,
«ەگەمەن قازاقستان»
