وسى ورايدا ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا تاراز قالاسىندا وبلىستىق زاعيپ جانە كوزى ناشار كورەتىن ازاماتتار كىتاپحاناسىنىڭ ۇيىمداستىرۋىمەن «كلاسسيك-كومپوزيتور ىقىلاس دۇكەن ۇلى» اتتى باسقوسۋ ءوتتى. اتالعان كىتاپحانا ديرەكتورى ايگۇل ورازقۇلوۆا رۋحاني جيىندى ءسوز سويلەپ اشىپ, ىقىلاس مۇرالارىنىڭ ماڭىزدىلىعىنا توقتالا كەلە, قوبىزشىنىڭ جەتى اتاسىنان بەرى قاراي ونەر دارىعانىن ايتتى.
ىقىلاس دۇكەن ۇلى قازاق تاريحىندا قايتالانباس قوبىزشى رەتىندە قالعان تۇلعا. سونىمەن قاتار قورقىت بابا جولىن جالعاستىرۋشى كۇيشىنىڭ «اققۋ», «جەزكيىك», «قامبار-نازىم», «قاسقىر», «كەرتولعاۋ» سىندى كۇيلەرى حالىق اراسىنا كەڭ تاراعان. باسقوسۋعا جينالعان كوپشىلىك ىقىلاس مۇراسىنا ەرەكشە ىقىلاس تانىتىپ, قوبىزشىنىڭ كۇيلەرى جونىندە اڭگىمە ءوربىتتى. ىقىلاستىڭ دۇيسەباي, ءتۇسىپباي جانە اقىنباي اتتى ۇلدارىنىڭ ءبارى دە قوبىزشى بولعانى تۋرالى دەرەك تە قامتىلدى. ال اتاقتى كۇيشىنىڭ قوبىزى اقىنبايدىڭ ۇرپاقتارىندا وسى كۇنگە دەيىن ساقتالىپ, بۇگىندە وبلىستىق تاريحي-ولكەتانۋ مۋزەيىندە باعا جەتپەس جادىگەرلەردىڭ قاتارىندا تۇر.
باسقوسۋ بارىسىندا وبلىستىق فيلارمونيانىڭ ءانشىسى راۋان ابىلقاسىم ىقىلاس دۇكەن ۇلىنىڭ «ەردەن» جانە «اققۋ» كۇيلەرىن تارتسا, جانار وزتەمىروۆا نۇرعيسا تىلەنديەۆتىڭ «القيسسا» كۇيىن ناقىشىنا كەلتىرە ورىنداپ بەردى.
حاميت ەسامان,
«ەگەمەن قازاقستان»
جامبىل وبلىسى
