شاراعا مادەنيەت جانە سپورت مينيسترلىگى تۋريزم يندۋسترياسى كوميتەتىنىڭ ءتورايىمى ماينۇر مىرزاماديەۆا, مادەنيەت جانە سپورت مينيسترلىگى تۋريزم يندۋسترياسى كوميتەتى توراعاسى ورىنباسارىنىڭ مىندەتىن اتقارۋشى جاندوس بيماعانبەتوۆ, «تۋريستىك قامقور» ۇجىمدىق قورىنىڭ ءتورايىمى يننا رەي, «تۋريستىك قامقور» اكىمشىلىك جۇيەسىنىڭ ديرەكتورى اسىلحان ەسىلوۆ, قازاقستان تۋراگەنتتىكتەرى اسسوتسياتسياسىنىڭ پرەزيدەنتى, «تۋريستىك قامقور» كورپوراتيۆتىك قورىنىڭ تۋراگەنتتىكتەرمەن جۇمىس جونىندەگى دەپارتامەنت ديرەكتورى اسەل نۇركەباەۆا قاتىستى.
«قازاقستاندا 2016 جىلدىڭ اياعىندا زاڭنامالىق دەڭگەيدە شەتەلگە شىعۋ ءتۋريزمى اياسىندا ازاماتتاردىڭ قۇقىقتارىنا كەپىلدىك بەرۋ جۇيەسى ەنگىزىلدى. وسى شارا تۋريستىك نارىقتىڭ كەيبىر وكىلدەرى تاراپىنان قازاقستاندىق تۋريستەردىڭ كوپشىلىگى شەتەلدەردە جاتاتىن ورىندارى تولەنبەي نەمەسە قايتاتىن بيلەتتەرى بولماي قالۋى سياقتى الاياقتىق جاعدايلاردىڭ جيىلەپ كەتۋىنە بايلانىستى قابىلداندى. 2010 جىلدان بەرى كوپ جاعدايدا تۋروپەراتوردىڭ بانكروت بولۋىمەن, نە بولماسا الاياقتىق جولمەن, چارتەرلىك اۆياكومپانيالار پروبلەمالارىمەن جالعاسقان جاعدايلار تىركەلدى. وسى ۋاقىت ارالىعىندا بارلىعى 12 مىڭ ادام زارداپ شەكتى, ال شىعىن كولەمى ونداعان ميلليون دوللاردان اسىپ ءتۇستى. وسى وقيعالار اياسىندا شەتەلدەگى قازاقستاندىقتارعا شۇعىل كومەك كورسەتەتىن, قازاقستاندىق تۋريستەردى وتانىنا قايتارۋعا كەپىلدىك بەرەتىن «تۋريستىك قامقور» قورى قۇرىلدى. قورعا قاتىسۋشى تۋروپەراتور ءاربىر جولداناتىن تۋريست ءۇشىن 0,5 اەك كولەمىندە اۋدارىم جاساۋى ءتيىس», دەدى مادەنيەت جانە سپورت مينيسترلىگىنىڭ تۋريزم يندۋسترياسى كوميتەتىنىڭ ءتورايىمى ماينۇر مىرزاماديەۆا.
قازىرگى ساتتە كەپىلدىك بەرۋ جۇيەسىندە 59 تۋروپەراتور جانە بانكتىك كەپىلدىك ۇسىناتىن تۋروپەراتور-فراحتوۆاتەلدەر تىركەلگەن. قازىرگى كەزدە ولار تۋركودتار بەرىپ وتىر. زاڭناما اياسىندا بۇگىنگى كۇنى www.fondkamkor.kz سايتىنىڭ «قاتىسۋشىلار ءتىزىمى» بولىمىندە بەرىلگەن كومپانيالارمەن جۇمىس ىستەيدى. مونيتورينگ دەرەكتەرى بويىنشا نارىقتى قامتۋ 80 پايىزدان استامدى قۇرايدى جانە ءالى 20-عا جۋىق تۋروپەراتور جۇيەگە كىرەدى دەپ كۇتىلۋدە. تۋركود دەگەن نە؟ تۋريستىك كود 11-13 (شىعاتىن ەلگە قاتىستى) قارىپتىك-ساندىق سيمۆولداردان تۇرادى. ول ءار جولدامانى رەسىمدەگەن كەزدە اۆتوماتتى تۇردە بەرىلەدى. بۇل شيفر ءاربىر تۋريست ءۇشىن ايرىقشا نارسە. تۋركود اگەنتتىڭ ەلەكتروندى پوشتاسىنا جىبەرىلەدى. تۋركودتار قوردىڭ تۋرلارىنىڭ ەلەكتروندى تىزىلىمىندە ساقتالادى. تۋريست كۇتپەگەن جاعدايعا تاپ بولعان كەزدە قورمەن بايلانىسىپ, ءوزىنىڭ تۋركودىنىڭ ءنومىرىن حابارلايدى جانە شۇعىل تۇردە كومەكتى كۇتەدى. تۋركود جەكە پاراقپەن بەرىلۋى جانە جولداماعا جازىلىپ بەرىلۋى مۇمكىن. تۋركودتىڭ بولۋى تۋرفيرما ارقىلى شەتەلگە دەمالۋعا باراتىنداردىڭ بارلىعى ءۇشىن مىندەتتى بولىپ تابىلادى. ەگەر تۋريست تۋرفيرما ارقىلى رەسىمدەلەتىن بولسا, ول مىندەتتى تۇردە تۋركودتى الۋى ءتيىس. ياعني تۋروپەراتورلار تۋرپاكەتتى بەرگەن كەزدە, تۋركودتى دا بىرگە بەرۋگە مىندەتتى.
راۋان قايدار,
«ەگەمەن قازاقستان»
