– اقبەت جايلى اڭىزدى كوپ ەستىگەن سوڭ با, اقبەت شىڭىنا شىعۋدى ارماندايتىنمىن. باياناۋىلعا باراسىڭدار دەگەندە تابيعاتى كەرەمەت جەردى ارالايتىنىما, اقبەتتى كورەتىنىمە سەندىم. شىڭعا شىقتىم. ارمانىم ورىندالدى! تاۋ بەتكەيلەرىن جارتاستى, جاقپار تاستى, تىلىمدەنگەن جالتىر تاستار قۇرايدى ەكەن. باۋرايىندا تورايعىر, سابىندىكول, جاسىباي كولدەرى جارقىرايدى. بۇلاقتارى قانداي كوپ! تابيعاتى كەرەمەت! – دەيدى حوۆدا مەملەكەتتىك ۋنيۆەرسيتەتىنىڭ ستۋدەنتى بايانولگەيلىك اينۇر باقىتقىزى.
بىلتىر «QazaqGeography» گەوگرافيالىق قوعامى ۇيىمداستىرعان «حان قورىق» فەستيۆالى ءۇش ەلدىڭ وقۋ ورىندارى اراسىنداعى كەلىسىمگە ساي وتكىزىلىپتى. بيىل دا جالعاسادى. وتكەن جىلى ءبىزدىڭ ەلىمىز, رەسەي جانە موڭعوليادان كەلگەن 120 ستۋدەنت ارحەولوگتار, بيولوگتار جانە الپينيستەر دەپ ءۇش توپقا ءبولىنىپ, باياناۋىلعا ساپارلادى. وسى توپتىڭ 90 ستۋدەنتى اقبەت شىڭىن باعىندىرۋدى تاڭدايدى. شىڭ باسىنا شىعۋ ستۋدەنتتەردىڭ ءارتۇرلى فيزيكالىق دايىندىقتارىنا بايلانىستى كەيدە 6 ساعاتتا, ال ناعىز توزىمدىلەرى 3 ساعاتتا-اق جەتەدى. سوندىقتان سپورتپەن شۇعىلداناتىن ستۋدەنتتەرگە شىڭ قول سوزىم جەردە تۇرعانداي قيىنعا سوققان جوق. ستۋدەنتتەر اراسىندا اينۇر باقىتقىزى دا بار.
– جاستار ءۇشىن تاۋعا شىعۋ, شىڭدى باعىندىرۋ – شىدامدىلىق پەن ەرىك-جىگەردى تەكسەرۋ. بيىككە كوتەرىلگەن سايىن ءوزىڭدى جەڭىمپاز سەزىنەسىڭ, – دەيدى ول.
ءيا, بيىكتىگى 1026 مەترگە جەتەتىن تاۋ شىڭىنا شىعۋ, ارينە, ەرىك پەن كۇش-جىگەردىڭ جەڭىسى. اقبەتكە بايلانىستى اڭىز دا بار: بۇركىتباي قىزى اقبەتتى كەدەي جىگىتىنە بەرگىسى كەلمەيدى. قالىڭمالىن تولەگەن شالعا قىزىن ۇزاتۋعا كەلىسەدى. قوس عاشىق قاشۋعا نيەتتەنەدى. بىراق اكەسى ءبىلىپ قويىپ, جىگىتتى ولتىرەدى, قىزىن ۇيدەن شىعارماي قويادى. ءبىر كۇنى اقبەت سۇيىكتىسىمەن قوشتاسۋعا زيرات باسىنا بارۋعا سۇرانادى. وزدەرى كەزدەسىپ جۇرگەندە اق تاڭدى قارسى الاتىن تاۋدىڭ بيىك شىڭىنا شىعىپ, اينالاسىنا سوڭعى رەت كوز سالادى دا, قۇزدان تومەن قۇلايدى.
باياناۋىلدىڭ ۇلكەن-كىشىسى بۇل اڭىزدى جاتقا بىلەدى. اقبەت ەسىمدى قىزدار دا از ەمەس. باياناۋىلدىقتار بۇل وقيعا ماحاببات جايلى قانشالىقتى اڭىز بولسا دا, قانشا عاسىر وتسە دە, اقبەت ەسىمىن سونشالىقتى قادىرلەپ, ايالايدى. بۇل ۇرپاقتان ۇرپاققا جالعاسىپ كەلەدى. ەرەكشە سۇيىسپەنشىلىكپەن ءان-جىر, ولەڭدەر ارنايدى. وبلىس ورتالىعىندا «اقبەتتاۋ» ادەبي جۋرنالى دا جارىققا شىعادى.
بيىل دا جاستار شىڭ باسىنا شىقتى. اۋداندىق ىشكى ساياسات بولىمىنەن رەنات قۋاتجان ۇلى, مەرەكە تولەۋباەۆ باستاعان توپتا دجيۋ-دجيتسۋدان سپورت شەبەرى ءادىل حابيبوللا, قۇرىلىس بولىمىنەن نۇرسۇلتان شايحين, سالىق سۇڭعاتبەك ۇلى, «بايانتاۋ» گازەتىنىڭ ءتىلشىسى ەلامان قابدىلاشىم, ەكونوميكا جانە بيۋدجەتتىك جوسپارلاۋ بولىمىنەن قانات بالتاباەۆ, عالىمجان مەيرام ۇلى, دەنە- شىنىقتىرۋ ءپانىنىڭ مۇعالىمدەرى جاسىباي قۇنانباەۆ, ساعىنتاي تولەگەن ۇلى, بەلسەندى بايان شايحين جانە باسقا دا جاستار بولدى. جىلجىمايتىن م ۇلىك بولىمشەسىنىڭ مامانى ايكۇمىس ماعاز, ستۋدەنتتەر اينۇر مۇراتبەك, ءمادينا بايدۇيسەن شىڭ باسىنان ەلىمىزگە, باياناۋىلعا, قازاققا اماندىق, جاقسىلىق تىلەدى. ەلىمىزدىڭ كوك تۋى جەلبىرەدى. قۇتتىقتاۋ ۆيدەو-سالەمدەرىن جولدادى.
– اقبەت شىڭىنا 3 ساعاتقا جۋىق ۋاقىتتا جەتتىك. بارلىق جاستاردى, قوناقتاردى اقبەتتىڭ شىڭىنا شىعۋعا شاقىرامىن. كەلىڭىزدەر. ەرەكشە اسەر, كوك ءجۇزى. تۇنىق, ساف اۋا! ارينە, ءارتۇرلى سەزىمدە بولاسىڭ. كوڭىلىڭ اسقاقتايدى. ەلەگىزىپ, سوناۋ ءبىر اڭىز دا جاڭعىرىپ, ەلەس بەرەدى. كوك بيىگىنە كوز تىگەسىڭ. بويىڭداعى كۇش-قۋات, سەنىم, ەرىك-جىگەر اقبەتتىڭ ەرىك-جىگەرىندەي مىقتى بولۋىن شىڭ باسىنا جەتكەندە تۇسىنەدى ەكەنسىڭ! – دەيدى ەلامان.
فاريدا بىقاي,
«ەگەمەن قازاقستان»
پاۆلودار وبلىسى,
باياناۋىل اۋدانى
