دەرەكتەر بويىنشا, اعىمداعى جىلى ەلىمىزدە مەنينگوكوكك ينفەكتسياسىنىڭ بەلگىلەرى بايقالعان 213 ادام تىركەلگەن بولسا, ونىڭ ىشىندە 58 دەرەك راستالعان. جۇقپالى دەرتتىڭ ماسەلەسى بۇل كۇندە جامبىل جۇرتشىلىعىن دا الاڭداتىپ وتىر. وڭىردە بۇل كۇندە ينفەكتسيالىق اۋرۋلاردىڭ الدىن الۋ جونىندەگى وبلىستىق شتاب قۇرىلىپ, جۇمىس ىستەۋدە. جەرگىلىكتى دەنساۋلىق ساقتاۋ قىزمەتكەرلەرىنىڭ باستى ۇستانىمى – قوعامدا قاتەرلى دەرتتىڭ تارالۋىنا جول بەرمەۋ, حالىقتى دەر كەزىندە اۋرۋحاناعا قارالىپ تۇرۋعا شاقىرۋ. ءبىر ميلليوننان استام حالقى بار جامبىل وبلىسىندا ازىرگە جۇقپالى اۋرۋدىڭ جايى انىقتالماعانىمەن, تۇرعىندار اراسىندا ءالى دە الاڭداۋشىلىق باسىم. وبلىستىق دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ 2014 جىلى وسىنداي 5 جاعدايدىڭ تىركەلگەنىن, ونىڭ 4-ەۋى تاراز قالاسىندا ورىن العانىن مالىمدەدى. ءوڭىردىڭ باس دارىگەرىنىڭ ايتۋىنشا, كەيىنگى جىلدارى تاراز قالاسىنان بولەك, وبلىستىڭ جامبىل جانە سارىسۋ اۋداندارىندا ينفەكتسيالىق اۋرۋ انىقتالىپتى. ەندى باسقارما باسشىسى جامبىل جەرىندە بۇگىندە 34 ينفەكتسيونيست دارىگەر جۇمىس ىستەپ جۇرگەنىمەن, بىرقاتار ەمحانا مۇنداي مامانعا ءزارۋ بولىپ وتىرعانىن جەتكىزدى.
– بۇل تۇيتكىلدى ماسەلەنى شەشۋ ءۇشىن بىرلەسە جۇمىس جۇرگىزۋ كەرەك. بۇگىنگى تاڭدا مامان تاپشىلىعىنا قاراماستان, وبلىستىق ءبىلىم باسقارماسى جانە قوعامدىق دەنساۋلىق ساقتاۋ دەپارتامەنتىمەن بىرلەسىپ, الدىن الۋ شارالارىن كۇشەيتۋ قاجەت, – دەيدى م.جۇمانقۇلوۆ.
اۋرۋدىڭ قالاي جانە قايدان جۇعاتىنىن ەشكىم دە بىلمەيدى. الايدا دارىگەرلەر كوپشىلىككە ادامدار كوپ شوعىرلاناتىن جەرلەرگە بارماۋ كەرەكتىگىن ءجيى ايتۋدا. بۇل رەتتە ماماندار ەلىمىز بويىنشا بۇل اۋرۋ تۇرلەرى استانا جانە الماتى قالالارىندا كەڭ تارالىپ وتىرعاندىقتان, سول قالالاردا ءبىلىم الىپ جۇرگەن ستۋدەنتتەردى نازاردا ۇستاۋ قاجەتتىگىن ەسكەرتۋدە. سونىمەن قاتار «اپات ايتىپ كەلمەيدى» دەگەندەي, اۋرۋدىڭ كەز كەلگەن تۇرىنەن ساقتانۋ بۇگىندە حالىقتىڭ وزىنە دە بايلانىستى بولىپ وتىر.
جوعارىدا ءتورت جىل بۇرىن تاراز قالاسىندا مەنينگوكوكك اۋرۋى بويىنشا 4 دەرەكتىڭ تىركەلگەنىن ايتتىق. وبلىس ورتالىعىندا بۇگىندە 300 مىڭ شاماسىندا تۇرعىن بار. ال ولاردىڭ دەنساۋلىق جاعدايى, قاۋىپسىزدىك ماسەلەسى تۇگەلدەي جەرگىلىكتى بيلىكتىڭ نازارىندا بولۋى ءتيىس. بىراق تاراز قالاسىندا ينفەكتسيالىق اۋرۋلاردىڭ الدىن الۋ جونىندەگى شتاب قۇرىلماپتى. بۇل ماسەلە جۋىردا وڭىردە وتكەن ينفەكتسيالىق اۋرۋلاردىڭ الدىن الۋ جونىندەگى وبلىستىق شتابتىڭ وتىرىسىندا بەلگىلى بولدى. اتالعان جيىندا وبلىس اكىمىنىڭ ورىنباسارى ەركەبۇلان داۋىلباەۆ قالا اكىمىنىڭ ورىنباسارى كەنجەبەك ولجابايدان تاراز قالاسىندا اۋرۋ بەلگىسى كوپ انىقتالعاندىعىن, شتابتىڭ نەگە قۇرىلماي وتىرعاندىعىن سۇراعان. ءبىر قۋانىشتىسى, ءوڭىردىڭ بارلىق اۋداندارىندا دەرلىك ارنايى شتابتار قۇرىلىپ, قاتەرلى دەرتتىڭ الدىن الۋعا باعىتتالعان شارالار باستالىپ كەتكەن ەكەن. سونىمەن قاتار وبلىس بويىنشا مەكتەپ جاسىنداعى بارلىق بالالار دا قاتاڭ قاداعالاۋدا بولىپ شىقتى.
اتالعان دەرتتىڭ قايدان شىعىپ, قالاي تارالىپ وتىرعانى كوپشىلىك ءۇشىن ءالى دە تۇسىنىكسىز. بۇل كۇندە شامالى باسى اۋىرىپ, بالتىرى سىزداي قالسا دا تۇرعىندار بويىندا بەلگىسىز ۇرەي ۇيالايتىن بولعان. سوندىقتان دا حالىقتىڭ اتالعان اۋرۋدان قالاي قورعانۋ جونىندەگى ۋايىمى دا بۇل كۇندە وزەكتى. قازىردە جايشىلىقتا ەمحاناعا بارا قويمايتىن كوپشىلىك كۇن سايىن دەنساۋلىق ساقتاۋ نىساندارىنا اعىلۋدا. «اۋىرىپ ەم ىزدەگەنشە, اۋىرمايتىن جول ىزدە» قاعيداتىن بەرىك ۇستانۋشىلار كوبەيگەن. ال دارىگەرلەر اۋرۋدى ەمدەگەننەن گورى, ونىڭ الدىن الۋدىڭ ماڭىزدى ەكەنىن ەسكەرتەدى.
مەنينگوكوكك اۋرۋى العاش رەت الماتى قالاسىندا تىركەلگەن سوڭ, باسىمدىقتىڭ ءبارى سول جاققا قاراي اۋدى. ەلىمىزدىڭ دەنساۋلىق ساقتاۋ ءمينيسترى ەلجان ءبىرتانوۆتىڭ جۋىردا عانا الماتى وڭىرىنە ىسساپارمەن بارىپ, تۇنگى ساعات ون ەكىدە جەرگىلىكتى 50-گە جۋىق تۇرعىننىڭ جۇقپالى اۋرۋلار اۋرۋحاناسىنىڭ سىرتىندا كەزەك كۇتىپ جۇرگەنىن كورگەنى تەلەارنالاردان كورسەتىلدى. جامبىل وڭىرىندە مۇنداي جاعداي ورىن الماعانىمەن, جۋىردا عانا ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا مينيستر ەلجان ءبىرتانوۆ بەرگەن مالىمەتتە جامبىل جانە قاراعاندى وبلىستارىندا ءبىر-ءبىر ادامنىڭ ينفەكتسيا جۇقتىرعانى ايتىلعان ەدى. ەندى ەلىمىزدىڭ باس دارىگەرىنىڭ ءوزى وسىنداي مالىمدەمە جاساعاندا, مۇنىڭ راس بولعانى دا...
جامبىل وبلىسى بويىنشا قوعامدىق دەنساۋلىق ساقتاۋ دەپارتامەنتىنىڭ باسشىسى بەرىك جارقىنبەكوۆ مەنينگيت اۋرۋى وڭىردە العاش رەت قاڭتار ايىندا تىركەلگەنىن ايتادى. ياعني اتالعان ينفەكتسيا جامبىل وڭىرىندە دە بار دەگەن ءسوز. العاشقى كەزدە ءوزىن تۇماۋراتىپ ءجۇرمىن دەپ ويلاعان 19 جاسار ستۋدەنت ەمحاناعا بارىپ, دارىگەرگە قارالىپتى. اق حالاتتى ابزال جاندار دەر كەزىندە العاشقى كومەك كورسەتىپ, ساراپتاما جاساپ, ناۋقاستى مەنينگيت دياگنوزىمەن اۋرۋحاناعا جاتقىزعان. ابىروي بولعاندا, وڭىردە ەشقانداي ءولىم-ءجىتىم وقيعاسى تىركەلمەگەن.
ادام ومىرىنە قاۋىپتى سانالاتىن مەنينگوكوكك ينفەكتسياسىنىڭ بەلەڭ الىپ تۇرعانى بۇگىنگى قوعامداعى باستى تاقىرىپقا اينالدى. بۇل تۇرعىدا وبلىس بويىنشا قوعامدىق دەنساۋلىق ساقتاۋ دەپارتامەنتىنىڭ باسشىسى بەرىك جارقىنبەكوۆ ءوڭىر تۇرعىندارىن جەرگىلىكتى دەنساۋلىق ساقتاۋ باسقارماسى مەن قوعامدىق دەنساۋلىق ساقتاۋ دەپارتامەنتىنىڭ رەسمي مالىمدەمەسىنە عانا سەنۋگە شاقىرىپ وتىر. «ەكپە الۋعا بايلانىستى الەۋمەتتىك جەلىلەردە تارالىپ جاتقان اقپاراتتاردىڭ راستىعىنا ەمحاناعا بارىپ, دارىگەردەن سۇراپ قانا كوز جەتكىزۋگە بولادى», دەيدى ول.
بۇگىندە اتى دا, زاتى دا بەلگىسىز اۋرۋدىڭ تۇرلەرى كوپ. وكىنىشتىسى, قازىردە كەڭ تارالعان بەيمالىم اۋرۋ تۇرلەرىنىڭ كوپشىلىگىنىڭ ادام ومىرىنە قاۋىپتى ەكەندىگى. سول سياقتى ماماندار مەنينگيتتىڭ دە ءتۇر-ءتۇرى بار ەكەنىن ايتۋدا. ال مەنينگوكوكك ينفەكتسياسى ناۋقاس جوتەلىپ, تۇشكىرگەندە بولىنەتىن سىلەكەي, شىرىش ارقىلى جۇعادى ەكەن. بۇل رەتتە دە ءتيىستى ماماندار ءاربىر ازاماتتىڭ كۇندەلىكتى ومىردە سالاماتتى ءومىر سالتىن ۇستانۋ كەرەكتىگىن ايتادى. سوندىقتان قازاق ءجيى ايتاتىن «ساقتانساڭ – ساقتايدى» ۇستانىمى وسى كۇندەرى اسا ماڭىزدى بولىپ تۇر...
حاميت ەسامان,
«ەگەمەن قازاقستان»
جامبىل وبلىسى
