ءالى ەسىمدە, 1997 جىلى رەسپۋبليكا سارايىندا جەكە شىعارماشىلىق كەشىمدى وتكىزدىم. ونەرگە ۇلكەن تالعامپازدىقپەن قارايتىن ارداقتى ەلباسىمىز سول جولعى كونتسەرتىمە ارنايى قاتىستى. كەش سوڭىندا قوناقتارعا جايىلعان داستارقان ۇستىندە پرەزيدەنت الداعى ۋاقىتتا جۇزەگە اسىرسام دەگەن جوسپارلارىم جايىندا سۇرادى. توسىننان قويىلعان ساۋال بولعاننان كەيىن ءسال توسىلىپ قالدىم. بىراق بويىمدى دا, ويىمدى دا تەز جيناپ الدىم. كوپتەن بەرگى ويىمدا جۇرگەن ارمانىمدى بۇگىن ايتپاسام, كەيىن ءدال مۇنداي مۇمكىندىك تۋمايتىنداي كورىندى. ءسويتىپ ورايلى ءساتتى پايدالانىپ, كوپتەن بەرى كوكەيىمدە جۇرگەن ويىمدى جايىپ سالدىم. شەتەلدەرگە گاسترولدىك ساپارمەن بارعان كەزدەردە جاستاردى مۋزىكالىق بىلىمگە كاسىبي تۇردە ساتىلاپ دايارلايتىن بىلىكتىلىگى جوعارى تالاي وقۋ ورىندارىندا بولعانىمدى, سولارعا قىزىعاتىنىمدى ايتتىم. ءدال سونداي حالىقارالىق ستاندارتقا ساي ۇزدىك ونەر اكادەمياسىن الماتىدا دا اشقىم كەلەتىنىن جەتكىزدىم. ەلباسى كوپ ويلانبادى. مەنىڭ ءوز ساۋالىنا ءدال وسىلاي جاۋاپ بەرەرىمدى الدىن الا ءبىلىپ تۇرعانداي: «اشاسىڭ! – دەدى بىردەن قولداۋ ءبىلدىرىپ. – بىراق سەن جوسپارلاعانداي الماتىدا ەمەس, اقمولادا – جاڭا استانانىڭ تورىندە!».
ارينە كوپتەن بەرى كۇرمەۋى شەشىلمەي كەلە جاتقان كۇردەلى ماسەلەنىڭ, تالاي كۇندەر كوڭىلىمنىڭ تۇكپىرىندە ايالاپ كەلگەن ارمانىمنىڭ ءبىر-اق ساتتە اقيقاتقا اينالاتىنىنا جۇرەگىم جارىلارداي قۋانعانىممەن, ەلباسىنىڭ: «استاناعا كەلەسىڭ» دەگەنى سانامدى سان ساققا جۇگىرتتى. قاشاندا جاڭالىق اتاۋلىعا جاتىرقاي قارايتىن كوڭىلىمىز ءدال سول ساتتە اقمولانىڭ استاناعا اينالىپ كەتەتىنىنە سەنىڭكىرەمەگەنى دە راس. ونىڭ ۇستىنە الاتاۋدىڭ جايماشۋاق مامىراجاي تابيعاتىن ارقانىڭ بەت قاراتپاس سارى ايازىنا الماستىرۋ دا جەكە ءوز باسىما وڭاي تاڭداۋ بولمادى. ايتسە دە پرەزيدەنت ءوزى تىكەلەي قولداۋ ءبىلدىرىپ, شاقىرعاننان كەيىن كوپ ويلانباستان-اق تاۋەكەلگە بەل بۋدىم. ەلىمىزدىڭ شەجىرەسىنەن ەلەۋلى ورىن الاتىن تاريحي ءساتتىڭ تىكەلەي كۋاگەرى بولىپ, وتانىمىزدىڭ تاريحىندا ورىن الىپ جاتقان وراسان ىرگەلى ىسكە ارالاسقىم كەلدى. ءسويتىپ 1997 جىلدىڭ قارا كۇزىندە قارلاتىپ-بورانداتىپ اقمولاعا قونىس اۋداردىم.كەلە سالا بىردەن ەلباسى ارتقان سەنىمگە ساي جۇمىس ىستەۋگە تىرىسىپ, الدىن الا دايارلاعان جوسپارىمدى الىپ سول كەزدەگى قالا اكىمى ادىلبەك جاقسىبەكوۆتىڭ قابىلداۋىندا بولدىم. كوكەيدە جۇرگەن شىعارماشىلىق ويلارىمدى ورتاعا سالىپ, جالپى ماسەلەنىڭ ءمان-جايىن ءتۇسىندىردىم. اكىم جاڭا استانانى مادەني ورتاعا اينالدىرسام دەگەن يگى باستامامدى قۋانا قۇپتاپ, سەنىم ءبىلدىردى. قالا باسشىسىنىڭ يدەولوگيا جونىندەگى ورىنباسارى بولىپ قىزمەت ىستەيتىن بەلگىلى كومپوزيتور تولەگەن مۇحامەدجانوۆ تا جاڭا قالاعا جاتىرقاي كەلگەن مەنىڭ كۇدىگىم مەن ۇرەيىمدى سەيىلتىپ, ويلارىمنىڭ رەتىمەن جۇيەلى جۇزەگە اسۋىنا جاعداي جاسادى. ەلباسىمىزدان باستاپ ونەردىڭ وسىنداي جاناشىر ازاماتتارىنىڭ ارقاسىندا كوپ ۇزاماي-اق قالا اكىمىنىڭ اقمولا مۋزىكا ۋچيليششەسىنىڭ نەگىزىندە اكادەميا اشۋ تۋرالى شەشىمى شىقتى. ىلە-شالا ۇكىمەت قاۋلى قابىلداپ, رەسپۋبليكالىق بيۋدجەتتەن قاجەتتى مولشەردە قارجى ءبولدى.
اكادەميانىڭ اشىلۋ سالتاناتىنا ارنايى قاتىسقان ەلباسىمىز, كۇنى بۇگىنگە دەيىن ونەرگە, مادەنيەتكە دەگەن قامقورلىعىن اياعان ەمەس. نۇرسۇلتان ءابىش ۇلى تەك ءبىزدىڭ ۋنيۆەرسيتەت قانا ەمەس, جالپى استانانىڭ مادەني ورتاعا اينالۋىنا ۇنەمى قولداۋ ءبىلدىرىپ كەلەدى. 20 جىلدا ەلوردا تورىندە نەبىر ءسانى مەن سالتاناتى كەلىسكەن ساۋلەتتى عيماراتتار بوي تۇزەدى. ءبىر عانا «استانا وپەرا» تەاترىنىڭ تاڭعاجايىپ ارحيتەكتۋراسى كەلۋشىسىن تامسانتپاي, تاڭعالدىرماي قويمايدى. سول سەكىلدى «قازاقستان» ورتالىق كونتسەرت زالى مەن حورەوگرافيا اكادەمياسىنىڭ دا باس شاھار تورىندە بوي كوتەرۋىن ەلباسىنىڭ قازاق ونەرىنە دەگەن ۇلكەن قامقورلىعىنىڭ, جاناشىرلىعىنىڭ ناتيجەسى دەپ بىلەمىن. بۇل عيماراتتار تەك كوز جاۋىن الاتىن ارحيتەكتۋراسىمەن عانا قۇندى ەمەس. بولاشاقتا اتالعان ونەر وشاقتارىنىڭ قابىرعاسىنان تۇلەپ ۇشار تەڭدەسسىز تالانتتار قازاق اتىن ءالى-اق جاھانعا ءماشھۇر ەتەرى ءسوزسىز. ۋنيۆەرسيتەتىمىزدىڭ تۇلەكتەرى – سۇندەت بايعوجين, سالتانات احمەتوۆا, ايگۇل نيازوۆا باستاعان ونەرپازداردىڭ داڭعىل جولى وسى ويىما تولىقتاي دالەل بولادى. كۇنى كەشە الەمدى ءدۇر سىلكىنتكەن دارا دارىن ديماش قۇدايبەرگەننىڭ ءتالىم العان, تاربيەلەنگەن ورتاسى دا قازاق ۇلتتىق ۋنيۆەرسيتەتىمەن تىكەلەي بايلانىستى.
ەلوردا تاريحىمەن ەگىز جاساسىپ كەلە جاتقان ۋنيۆەرسيتەتىمىزگە بيىل 20 جىل تولىپ وتىر. وسى ۋاقىت ارالىعىندا تالاي بەلەستەردى باعىندىرىپ, پەداگوگيكا مەن شىعارماشىلىق ىزدەنىستى قاتار الىپ كەلە جاتقان ءبىلىم ورداسى بۇگىندە ساتىلى ءبىلىم بەرۋ جۇيەسىن جولعا قويىپ, بىلىمگەرلەردىڭ مەكتەپ قابىرعاسىنان باستاپ ۋنيۆەرسيتەت تامامداعانعا دەيىنگى ارالىعىندا كەشەندى ءھام ساپالى ءبىلىم الۋىنا تولىققاندى جاعداي جاساپ وتىر. ارنايى شاقىرۋمەن جاساقتالعان بىلىكتى پەداگوگتار قۇرامى ساپالى مامان دايارلاۋدا, ونەرلى جاستارىمىزدى تاربيەلەۋدە ولشەۋسىز ۇلەس قوسىپ جاتقانىن دا ايرىقشا اتاپ وتكىم كەلەدى. بۇل – نۇرسۇلتان ءابىش ۇلىنىڭ بولاشاقتى الىستان بولجايتىن كورەگەندىگىنىڭ, دەگدارلىعىنىڭ ارقاسى.
ءيا, كەزىندە ورىندالماس ارمانداي بولىپ كورىنەتىن جۇرەك تۇكپىرىندەگى ۇلكەن تىلەگىم ەلباسىنىڭ قولداۋىنىڭ ارقاسىندا بۇگىندە اقيقاتقا اينالدى. استانا – مەنىڭ ارمانىما جول اشقان قۇتتى قالا. سونىسىمەن دە ەلوردامىز مەن ءۇشىن قىمبات, ىستىق. جاس بولسا دا تالاي جاسامپاز باستامالاردىڭ ۇيىتقىسى بولىپ كەلە جاتقان استانامىزدىڭ ءالى دە قاناتىن كەڭگە جايىپ, ونەر مەن مادەنيەتتىڭ شىن مانىندەگى رۋحاني ورداسىنا اينالاتىنىنا سەنەمىن. استانا – بولاشاقتىڭ قالاسى!
ايمان مۇساقوجاەۆا,
قازاقستاننىڭ ەڭبەك ەرى, قازاق ۇلتتىق ونەر ۋنيۆەرسيتەتىنىڭ رەكتورى
