ء«بىزدىڭ مينيسترلىك الەۋمەتتىك-ەكونوميكالىق ساياساتتىڭ ۇيلەستىرۋشىسى رەتىندە حالىقتىڭ ءال-اۋقاتىن جانە ءومىر ساپاسىن كوتەرۋ ءۇشىن ۇلتتىق ەكونوميكانىڭ تۇتاستىعى مەن تيىمدىلىگىن قامتاماسىز ەتۋدە. وتكەن جىلى مينيسترلىك ەكونوميكانىڭ تۇراقتى ءوسۋىن قامتاماسىز ەتۋدە «2050» ستراتەگياسىن, 5 ينستيتۋتتىق رەفورمانى جانە مەملەكەت باسشىسىنىڭ تاپسىرمالارىن ىسكە اسىرۋدى جالعاستىردى. ەلىمىزدىڭ ەكونوميكالىق دامۋى جاڭا جاعدايعا بەيىمدەلۋ كەزەڭىنەن ءوتتى جانە ءوسۋدىڭ ورتاشا الەمدىك قارقىنىن انىقتاپ, 4 پايىزدى قۇرادى», دەدى مينيستر.
ەكونوميكاداعى قۇرىلىمدىق وزگەرىستەرگە توقتالعان ت.سۇلەيمەنوۆ ءوسۋدىڭ 2/3 بولىگى شيكىزاتتىق ەمەس سالامەن قامتاماسىز ەتىلگەنىن اتادى. «ينفلياتسيا دەڭگەيىنىڭ 2015 جىلعى 13,6 پايىزدان 7,1 پايىزعا دەيىنگى باسەڭدەۋىنە بايلانىستى قولايلى ماكروەكونوميكالىق جاعداي وسۋدە نەگىزگى ءرول اتقاردى. سونىمەن قاتار, ستراتەگيالىق قۇجاتتار مەن مەملەكەتتىك باعدارلامالاردى ىسكە اسىرۋ وڭ اسەرىن تيگىزدى. مەملەكەتتىك باعدارلامالارعا جان-جاقتى توقتالساق, يندۋستريالاندىرۋ كارتاسى بويىنشا 2017 جىلى 1,5 ترلن تەڭگەگە 120 جوبا ىسكە قوسىلدى. تۇراقتى 10 مىڭ جۇمىس ورنى قۇرىلدى. «نۇرلى جول» شەڭبەرىندە 4 مىڭ كيلومەتردەن استام اۆتوموبيل جولى رەكونسترۋكتسيالاندى, ترانزيتتىك كونتەينەرلىك تاسىمالداۋلار 30 پايىزعا ۇلعايدى. بىلتىرعى جىلى «نۇرلى جەر» باعدارلاماسى باستالدى. جالپى العاندا, رەكوردتىق 11,2 ملن شارشى مەتر تۇرعىن ءۇي پايدالانۋعا بەرىلدى, 100 مىڭنان استام وتباسى جاڭا تۇرعىن ءۇي الدى», دەپ اتاپ ءوتتى ۇلتتىق ەكونوميكا ءمينيسترى.
بايانداما بارىسىندا تيمۋر سۇلەيمەنوۆ اگروونەركاسىپ كەشەنىن دامىتۋدىڭ مەملەكەتتىك باعدارلاماسى بويىنشا وتكەن جىلى 851 كووپەراتيۆ قۇرىلعانىن جانە 132 مىڭ تونناعا جۋىق ءسۇت جانە 33 مىڭ توننا جەمىس-كوكونىس ونىمدەرى دايىندالعانىن تىلگە تيەك ەتتى. «بيزنەستىڭ جول كارتاسى شەڭبەرىندە 286 ملرد تەڭگەگە كرەديتتەر ارزانداتىلىپ, كەپىلدەندىرىلدى, 23 مىڭ كاسىپكەر وقىتىلدى. بارلىعى 192 مىڭ نەمەسە 2016 جىلمەن سالىستىرعاندا 10,3 پايىزعا كوپ بيزنەس سۋبەكتىسىنە قولداۋ كورسەتىلدى. ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسىنىڭ باعىتى بويىنشا 500 مىڭ ازاماتقا قولداۋ كورسەتىلدى, ولاردىڭ ىشىندە 315 مىڭ ادام تۇراقتى جۇمىس ورىندارىنا جۇمىسقا تۇردى. 2017 جىلى 50 ملرد تەڭگەگە 400 ءوندىرۋشى-ەكسپورتتاۋشىنى قولداۋ شارالارىمەن قامتىعان ۇلتتىق ەكسپورتتىق ستراتەگيا ىسكە اسىرىلا باستادى. 2017 جىلى حالىقارالىق رەيتينگتىك اگەنتتىكتەردىڭ قازاقستاننىڭ ينۆەستيتسيالىق سەنىمدىلىك دەڭگەيىن راستاۋى جانە بولجامنىڭ «تەرىستەن» «تۇراقتىعا» جاقسارۋى وڭ وزگەرىستەردىڭ كۋاسى بولدى», دەدى ۆەدومستۆو باسشىسى.
سونىمەن قاتار ول 2018 جىلعى زەرتتەۋ قورىتىندىلارى بويىنشا الەمدىك باسەكەگە قابىلەتتىلىك رەيتينگىندە قازاقستان 38-ورىنعا يە بولعانىن, ال جاھاندىق باسەكەگە قابىلەتتىلىك يندەكسىنىڭ رەيتينگىندە 137 ەلدىڭ ىشىندە 57-ورىنعا ورنالاسقانىن جەتكىزدى.
ۇلتتىق ەكونوميكا ءمينيسترى ەسەپ بەرۋ كەزدەسۋىنىڭ سوڭىندا مينيسترلىكتىڭ الداعى جوسپارلارىنا دا توقتالىپ, حالىقتان كەلىپ تۇسكەن سۇراقتارعا جاۋاپ بەردى.
راۋان قايدار,
«ەگەمەن قازاقستان»
