الماتى قالاسى اكىمدىگىنىڭ ءباسپاسوز قىزمەتىنىڭ مالىمەتى بويىنشا, بيىلعى جىلى وڭتۇستىك استانانىڭ ورتا مەكتەپتەرىن 9030 تۇلەك بىتىرسە, ولاردىڭ 518-ءسى «التىن بەلگىنى» يەگەرلەرى بولىپ تابىلادى.
«بۇل كۇن سەندەر ءۇشىن ەرەكشە ەستە قالاتىن ءسات جانە ۇلكەن ومىرگە دەگەن وڭ قادام! بىلىمگە دەگەن قۇشتارلىق, العا دەگەن ۇمتىلىس جىگەرلەرىڭدى جانىعاندا عانا, ىزگى ماقساتتارعا جەتەسىڭدەر. ءاربىر ازاماتتىڭ ءومىرىنىڭ التىن قازىعىنا اينالاتىن ماماندىقتى لايىقتى تاڭداۋلارىڭا تىلەكتەسپىن. قازاقستاننىڭ پاتريوتى بولىڭدار! ەلباسى ايتقانداي, «سەندەر جەتكەن جەتىستىك – اتا-انالارىڭنىڭ, تۋعاندارىڭ مەن جاقىندارىڭنىڭ, وتانداستارىڭنىڭ, وتانىمىزدىڭ جەتىستىگى», - دەپ اتاپ ءوتتى ءوز سوزىندە الماتى قالاسىنىڭ اكىمى باۋىرجان بايبەك.
بيىلعى جىلى قالانىڭ بارلىق مەكتەپتەرىندە فيزيكا, حيميا, بيولوگيا كابينەتتەرى لينگافوندى-مۋلتيمەديالىق جابدىقتارمەن قامتاماسىز ەتىلىپ, ينتەرنەتكە تولىققاندى قوسىلعان. «تسيفرلى قازاقستان» مەملەكەتتىك باعدارلاماسى اياسىندا الداعى وقۋ جىلىندا قالانىڭ 80 مەكتەبىندە ارنايى IT ليتسەيلەر مەن IT سىنىپتار اشۋ جوسپارلانىپ وتىر.
الماتى قالاسىنىڭ وقۋشىلارى ون ءۇش جىل قاتارىنان رەسپۋبليكالىق وليمپيادالاردا كوماندالىق ءبىرىنشى ورىننان كورىنىپ كەلەدى. رەسپۋبليكالىق عىلىمي سايىستاردا 16 مارتە جەڭىمپاز اتانسا, ماتەماتيكا, فيزيكا, حيميا مەن بيولوگيادان 11-سىنىپ وقۋشىلارى اراسىندا وتكەن پرەزيدەنت وليمپياداسىندا بەسىنشى رەت جەڭىس تۇعىرىنا كوتەرىلدى. جاراتىلىستانۋ-ماتەماتيكالىق باعىتتا العاش رەت وتكىزىلگەن رەسپۋبليكالىق جاسوسپىرىمدەر وليمپياداسىندا قالا كومانداسى ءبىرىنشى ورىندى يەلەندى.
الماتىنىڭ قورجىنىنا حالىقارالىق زياتكەرلىك وليمپيادالار مەن عىلىمي جارىستاردان بيىلعى جىلدىڭ وزىندە عانا 45 التىن, 68 كۇمىس جانە 93 قولا مەدال تۇسكەن.
مىنە, وسىنداي زاماناۋي مەكتەپتەردە ءبىلىم الىپ, جەتىستىكتەر ۇدەسىنەن كورىنگەن الماتىلىق تۇلەكتەرگە ءسات-ساپار تىلەگەن قالا اكىمى ولاردىڭ بولاشاعىنا ۇلكەن سەنىم ءبىلدىردى.
ەلۆيرا سەرىكقىزى,
«ەگەمەن قازاقستان»
الماتى
