«وسى كەزەڭ ىشىندە شىعارىلعان جالپى اۋىلشارۋاشىلىق ونىمدەرى 3,9 پايىزدى, ياعني 745 ملرد تەڭگەنى قۇرادى. وندىرىلگەن تاماق ونىمدەرى 6,3 پايىزعا ارتتى. قازاقستاننىڭ قول جەتكىزگەن باسەكەگە قابىلەتتىلىك دەڭگەيىن قولداۋ جانە ونىڭ ودان ءارى كەڭەيۋى ءۇشىن اگروونەركاسىپتىك كەشەندى مەملەكەتتىك رەتتەۋدىڭ تاسىلدەرى قايتا قارالىپ, ىشكى نارىقتىڭ قورعالۋىنا, سىرتقى ساۋدا نارىعىن كەڭەيتۋگە, ساۋدا-لوگيستيكالىق ينفراقۇرىلىمدى دامىتۋعا جانە اگروونەركاسىپتىك كەشەن سۋبەكتىلەرىن قارجىلاندىرۋدىڭ قولجەتىمدىلىگىن ارتتىرۋعا باسا نازار اۋدارىلدى.
اۋىل شارۋاشىلىعى ونىمدەرىنىڭ ەكسپورتى 3 ايدا 47 پايىزعا, ونىڭ ىشىندە وڭدەلگەن ونىمدەر ەكسپورتى 26 پايىزعا ۇلعايدى. اۋىل شارۋاشىلىعىنا سالىنعان ينۆەستيتسيالار كولەمى 1,4 پايىزعا ءوسىپ, 88 ملرد تەڭگە بولدى. 2018 جىلى ەگىستىك جەرلەر كولەمىن 50,2 پايىزعا (11,4 ملن گا) قىسقارتۋ جوسپارلانىپ وتىر. مال شارۋاشىلىعىندا وتكەن كەزەڭدە مال مەن قۇس سانى ورتا ەسەپپەن 4,1 پايىزعا ۇلعايدى», دەدى ءو.شوكەەۆ.
ول سونداي-اق وندىرىلگەن ەت كولەمى 4,8 پايىزعا (345,1 مىڭ توننادان 361,6 مىڭ تونناعا دەيىن), ءسۇت 2,5 پايىزعا (1942,9 مىڭ توننادان 1992,5 مىڭ تونناعا), جۇمىرتقا 15,7 پايىزعا (1896,1 ملن دانادان 2194,4 ملن داناعا دەيىن) ارتقانىن اتاپ كورسەتتى. ەلباسى حالىققا جولداۋىندا اگروونەركاسىپتىك كەشەن الدىندا ەڭبەك ونىمدىلىگىن تۇبەگەيلى ۇلعايتۋ جانە قايتا وڭدەلگەن اۋىل شارۋاشىلىعى ءونىمى ەكسپورتىنىڭ ءوسىمىن 5 جىل ىشىندە كەمىندە 2,5 ەسەگە ارتتىرۋ مىندەتىن قويعانى بەلگىلى.
بۇل مىندەتتى شەشۋ سالانى دامىتۋدا مۇلدە جاڭا كوزقاراستى تالاپ ەتەدى. قازىرگى ۋاقىتتا ازىق-ت ۇلىكتىڭ نەگىزگى 30 ءتۇرىنىڭ 25-ءى بويىنشا قامتاماسىز ەتىلۋى 80 پايىز, ال كەيبىر تۇرلەرى بويىنشا 100 پايىزدى قۇراپ وتىر. ىشكى نارىق وسى ءونىم تۇرلەرىمەن قامتاماسىز ەتىلۋدە. يمپورتقا تاۋەلدى قۇس ەتى, الما, ىرىمشىك جانە سۇزبە, شۇجىق, قانت, بالىق بۇل تىزىمگە كىرمەيدى. جوعارىدا اتالعان مىندەتتەردى ەسكەرە وتىرىپ, قازاقستان رەسپۋبليكاسى اۋىل شارۋاشىلىعى مينيسترلىگى اگروبيزنەس جانە ۇكىمەتتىك ەمەس ۇيىمداردىڭ وكىلدەرىن تارتا وتىرىپ, 2017-2021 جىلدارعا ارنالعان قازاقستان رەسپۋبليكاسى اگروونەركاسىپتىك كەشەنىن دامىتۋدىڭ مەملەكەتتىك باعدارلاماسىنا تۇزەتۋلەر ەنگىزۋ بويىنشا جۇمىس جۇرگىزگەن.
ءو.شوكەەۆتىڭ سوزىنشە, باعدارلامانىڭ ءتۇيىندى كورسەتكىشتەرى مەن ءىس-شارالارى نەگىزىندە, جوبالىق باسقارۋ ستاندارتتارىنا سايكەس اگروونەركاسىپتىك كەشەننىڭ نەگىزگى باعىتتارى بويىنشا ۇزاق مەرزىمدى سالالىق باعدارلامالار ازىرلەنىپ, ولاردى ىسكە اسىرۋ مەرزىمى 10 جانە ودان دا كوپ جىلدى قۇرايدى ەكەن. بۇلار – ەت جانە ءسۇتتى مال شارۋاشىلىعىن, قۇس شارۋاشىلىعىن, سۋارمالى جەرلەردى دامىتۋ باعدارلامالارى. سونىمەن قاتار مەملەكەتتىك باعدارلاما اياسىندا سالانى تسيفرلاندىرۋعا, تەحنيكالىق رەتتەۋگە, اۋىلدىق اۋماقتاردى دامىتۋ جانە سالىق سالۋ ماسەلەلەرى قاراستىرىلاتىن بولادى.
جالپى, مەملەكەتتىك باعدارلامادا 10 مىندەتتى ورىنداۋ كوزدەلىپتى. بۇل – ازىق-ت ۇلىك قاۋىپسىزدىگىن قامتاماسىز ەتۋ, قارجىلاندىرۋدىڭ قولجەتىمدىلىگى, ءتيىمدى سالىق سالۋ, جەر جانە سۋ رەسۋرستارىن ءتيىمدى پايدالانۋ, نارىقتارعا قول جەتكىزۋ جانە ەكسپورتتى دامىتۋ, اگرارلى عىلىم, تەحنيكالىق جابدىقتاۋ مەن ءوندىرىستى جانداندىرۋ, مەملەكەتتىك قىزمەت كورسەتۋ ساپاسى مەن تسيفرلاندىرۋ, اۋىلدىق جەرلەردى دامىتۋ. وسىلايشا, مەملەكەتتىك باعدارلاما اگروونەركاسىپتىك كەشەن سالالارىن دامىتۋدىڭ نەگىزگى شارتتارىن قامتاماسىز ەتەدى.
ايتا كەتەتىن تاعى ءبىر جايت, مەملەكەت باسشىسىنىڭ قىتاي حالىق رەسپۋبليكاسىنا جاساعان مەملەكەتتىك ساپارى اياسىندا بەيجىڭ قالاسىندا قازاقستان رەسپۋبليكاسى اۋىل شارۋاشىلىعى مينيسترلىگى مەن قىتاي حالىق رەسپۋبليكاسىنىڭ باس كەدەن باسقارماسى اراسىندا قازاقستاننان قىتايعا ەكسپورتتالاتىن سيىر ەتىنە ارنالعان ينسپەكتسيا, كارانتيندىك جانە ۆەتەرينارلىق-سانيتارلىق تالاپتار تۋرالى حاتتاماعا قول قويىلعان بولاتىن. بۇل حاتتاما مۇزداتىلعان سۇيەكسىز سيىر ەتىن قىتايعا ەكسپورتتاۋعا مۇمكىندىك بەرەدى.
جيىن سوڭىندا پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى ومىرزاق شوكەەۆ جيىنعا قاتىسۋشىلاردىڭ جانە ايماقتاردان كەلگەن جۇرتشىلىقتىڭ سان ءتۇرلى سۇراقتارىنا جان-جاقتى جاۋاپ بەردى.
راۋان قايدار,
«ەگەمەن قازاقستان»
