فوتو: اۆتور
ول استانا قالاسىنىڭ 20 جىلدىق مەرەيتويى مەن شاكارىم قۇدابەردى ۇلىنىڭ 160 جىلدىعى قۇرمەتىنە ارنالدى. بايقاۋعا وبلىستىڭ ءار اۋداندارىنان كەلگەن 13 كەلىن قاتىستى. جيىندى اۋدان اكىمى جارقىنبەك بايسابىروۆ اشىپ, قازاقتىڭ سالت-داستۇرلەرى وسىلايشا ناسيحاتتالىپ جاتقانىنا ەرەكشە ريزاشىلىعىن ءبىلدىردى. سايىستىڭ باس ۇيىمداستىرۋشىسى شىعىس قازاقستان وبلىستىق جاستار رەسۋرستىق ورتالىعىنىڭ ديرەكتورى ارايلىم ەسىمبەكوۆا قاتىسۋشىلارعا قويىلاتىن تالاپتاردى ءتۇسىندىرىپ, قازىلار القاسىنىڭ مۇشەلەرىمەن تانىستىردى.
وبلىستىق بايقاۋدىڭ ءبىرىنشى ءبولىمى «اس – ادامنىڭ ارقاۋى» دەپ اتالعاندىقتان, كەلىندەرگە ارناپ دالادا قوس اقشاڭقان كيىز ءۇي تىگىلدى. اۋلادا قازان-وشاق پەن 13 ساماۋرىن ءتىزىلىپ قويىلدى. قوس كيىز ءۇيدىڭ بىرىندە كەلىندەر ۇيدەن ءپىسىرىپ اكەلگەن قازاقتىڭ ۇلتتىق تاعامدارىنان داستارقان ازىرلەندى. ونىڭ باعاسىن قازىلار انىقتاپ جاتتى. ەكىنشى كيىز ۇيدە باۋىرساق ءپىسىرىپ, ونەرلەرىن كورسەتۋ ءۇشىن كەلىندەر ىسكە كىرىستى. ساماۋرىننان ءسۇت قوسقان شاي دەمدەپ, قۇيىپ بەرۋ دە, ونى ىزەتپەن ۇسىنۋ دا كەلىندەردىڭ موينىنا تۇسكەن ءبىر سىن بولدى. باۋىرساقتى پىسىرۋدەن زايسان اۋدانىنان كەلگەن اينۇر كاكەەۆا العا وزىپ شىقتى. بۇدان سوڭ ءار كەلىن ءوز قولدارىنان شىققان ۇلتتىق تاعامداردى تانىستىردى.
– ءار ەلدىڭ سالتى باسقا دەمەكشى, كەلىندەردىڭ بارلىعى ءبىر وبلىستان بولسا دا, ءتىپتى اۋدانداردىڭ ىشىندە ۇمىتىلىپ بارا جاتقان ءاسىپ, بىلامىق, جونقۋىرداق سياقتى ۇلتتىق تاعامداردى دايىنداپ, جۇرتشىلىقتى تاڭعالدىردى, دەدى شقو ءماسليحاتى قوعامدىق قابىلداۋ ءبولىمىنىڭ جەتەكشىسى بۇلبۇل باكينوۆا.
بۇدان سوڭ سايىس مادەنيەت ءۇيىنىڭ كونتسەرت زالىندا جالعاستى. بۇل بولىمدە كەلىندەر بويىنداعى اقىل-وي, پاراساتتىلىعىن پاش ەتتى. سونىمەن «اياۋلى جاس كەلىن-2018» بايقاۋى مارەسىنە جەتىپ, بارلىق قاتىسۋشىلارعا اباي اۋدانى اكىمىنىڭ جەكە اتاۋلى سىيلىعى تابىستالدى. باس جۇلدە «اياۋلى جاس كەلىن-2018» اتاعىن زايساندىق اينۇر كاكەەۆا جەڭىپ الىپ, 100 000 تەڭگە قارجىلاي ماراپاتقا يە بولدى.
راۋشان نۇعمانبەك,
جۋرناليست
شىعىس قازاقستان وبلىسى,
اباي اۋدانى
