فوتو: ەنەرگەتيكا مينيسترلىگى
مينيسترلىك دەرەگىنشە, جوبانىڭ باستاپقى قۇنى 8 ترلن تەڭگەدەن اسادى. قۇجات ەلدەگى ەنەرگيا تاپشىلىعىن جويۋدى, مورالدىق ءارى فيزيكالىق تۇرعىدان ەسكىرگەن ەلەكتر ستانسالارىن جاڭارتۋدى كوزدەيدى. جوسپار ينۆەستيتسيا تارتۋ, وتىن-لوگيستيكالىق ينفراقۇرىلىمدى دامىتۋ جانە كادرلىق الەۋەتتى كۇشەيتۋ سەكىلدى ءوزارا بايلانىستى باعىتتاردى قامتيدى.
«ۇلتتىق جوبا سالاداعى بارلىق باعىتتاردى كەشەندى ءارى جان-جاقتى دامىتۋعا ارنالعان. بۇل – ينۆەستيتسيا تارتۋدان باستاپ, وتىن-لوگيستيكالىق ينفراقۇرىلىمدى جەتىلدىرۋ مەن كادرلىق الەۋەتتى نىعايتۋعا دەيىنگى تەڭدەستىرىلگەن ءتاسىل. مۇنداي جۇيەلى قادام ەكونوميكانىڭ مۋلتيپليكاتيۆتىك اسەرىن كۇشەيتىپ, ەلدىڭ تۇراقتى دامۋىنا قىزمەت ەتەدى», دەدى ەنەرگەتيكا ءمينيسترى ەرلان اقكەنجانوۆ.
6 جاڭا ستانسا جانە جاڭعىرتۋ جۇمىستارى
ۇلتتىق جوسپار اياسىندا 6 ءىرى ەنەرگەتيكالىق نىسان سالۋ كوزدەلگەن. ولار – ەكىباستۇز ماەس-3, كۋرچاتوۆ, كوكشەتاۋ, سەمەي, وسكەمەن جانە جەزقازعان قالالارىنداعى جاڭا ستانسالار. بۇعان قوسا, قازىر جۇمىس ىستەپ تۇرعان ەكىباستۇز ماەس-2 مەن اقسۋ ماەس-ءىن تەحنيكالىق جاڭعىرتۋ جوسپارلانىپ وتىر.
جاڭا جوبالاردى ىسكە اسىرۋ ءۇشىن ينۆەستورلار اشىق تەندەر ارقىلى تاڭدالادى. ال قولدانىستاعى ستانسالاردى جاڭارتۋ مينيسترلىكپەن جاسالاتىن ينۆەستيتسيالىق كەلىسىمدەر نەگىزىندە جۇزەگە اسادى. بۇل ءتاسىل جوبانىڭ اشىقتىعىن قامتاماسىز ەتىپ, ۇزاق مەرزىمدى كەلىسىمدەر شەڭبەرىندە تاريفتەردىڭ بولجامدىلىعىن ساقتاۋعا جانە ينۆەستيتسيالاردىڭ قايتارىمدىلىعىن قامتاماسىز ەتۋگە مۇمكىندىك بەرەدى.
«تازا كومىر» جانە ەكولوگيالىق تەپە-تەڭدىك
مينيسترلىكتىڭ مالىمدەۋىنشە, جوبادا «تازا كومىر» تەحنولوگيالارىنا ەرەكشە باسىمدىق بەرىلگەن. زاماناۋي ەنەرگەتيكالىق بلوكتار جوعارى تيىمدىلىك كوەففيتسيەنتىمەن ەرەكشەلەنىپ, ەكولوگيالىق تالاپتارعا جاۋاپ بەرۋى ءتيىس.
ء«بىزدىڭ ماقسات – مورالدىق جانە فيزيكالىق تۇرعىدان ەسكىرگەن قۋاتتاردى كەزەڭ-كەزەڭىمەن تيىمدىلىگى جوعارى, زاماناۋي ەنەرگەتيكالىق بلوكتارمەن الماستىرۋ. بۇل ەكولوگيا تالاپتارى مەن ەنەرگەتيكالىق قاۋىپسىزدىك اراسىنداعى تەپە-تەڭدىكتى ساقتاۋعا مۇمكىندىك بەرەدى», دەدى ە.اقكەنجانوۆ.
گيدروەنەرگەتيكالىق الەۋەتتى قالاي ارتتىرامىز؟ ەلىمىزدە بىرىڭعاي تسيفرلىق پلاتفورما قۇرىلماق
كومىر, تەمىرجول جانە كادر ماسەلەسى
جاڭا قۋاتتاردى ءتيىمدى ەنگىزۋ ءۇشىن كومىر ءوندىرۋ كولەمىن ارتتىرۋ جانە تەمىرجول ينفراقۇرىلىمىنداعى وتكىزۋ قابىلەتى شەكتەۋلى ۋچاسكەلەردى جويۋ ماڭىزدى. وسىعان بايلانىستى مينيسترلىك كومىر ءوندىرىسىن ۇلعايتۋ مەن تەمىرجول جەلىسىندەگى «تار تۇستاردى» جويۋ ماسەلەلەرىن قاتار قاراستىرىپ وتىر.
ۇلتتىق جوسپاردىڭ الەۋمەتتىك بولىگىندە دە ناقتى تەتىكتەر بار. وندا پەرسونالدى قورعاۋ شارالارى, سونداي-اق «وتباسى بانكپەن» بىرلەسىپ, ەنەرگەتيكا سالاسى قىزمەتكەرلەرىنە ارنالعان ارنايى تۇرعىن ءۇي باعدارلامالارىن ىسكە قوسۋ كوزدەلگەن.
مينيسترلىك ۇسىنعان بارلىق باستامالار مۇددەلى تاراپتارمەن جان-جاقتى پىسىقتالعاننان كەيىن, كومىر گەنەراتسياسىن دامىتۋدىڭ ۇلتتىق جوسپارى سوڭعى نۇسقادا بەكىتىلەدى. بۇل قۇجات قازاقستاننىڭ ەنەرگەتيكالىق قاۋىپسىزدىگىن نىعايتىپ, الداعى جىلدارداعى تۇراقتى دامۋىنا نەگىز بولماق.
