فوتو: اشىق دەرەككوز
ونىڭ قارسىلاسى – ۋلتراوڭشىل Chega پارتياسىنىڭ كوشباسشىسى اندرە ۆەنتۋرا 33,2% داۋىس الىپ, جەڭىلگەنىن مويىندادى. ۆەنتۋرا سەگۋرۋدى جەڭىسىمەن قۇتتىقتاعانىمەن, الداعى ۋاقىتتا ەلدەگى بيلىك ءوز پارتياسىنا وتەتىنىنە سەنىمدى ەكەنىن مالىمدەدى.
انتونيۋ جوزە سەگۋرۋ سوڭعى 20 جىلدا پورتۋگاليادا سايلانعان العاشقى سوتسياليست پرەزيدەنت اتاندى. جەڭىستەن كەيىن سويلەگەن سوزىندە ول ۇكىمەتپەن تەكەتىرەسكە بارماي, كەرىسىنشە, ىنتىماقتاستىقتا جۇمىس ىستەۋگە نيەتتى ەكەنىن ايتتى.
«مەن بيلىكپەن بىرلەسە جۇمىس ىستەيمىن جانە بۇل ۋادەمدە تۇرامىن. ۇكىمەتكە قارسى شىقپايمىن, الايدا قابىلداناتىن شەشىمدەر مەن ولاردىڭ ناتيجەسىنە قاتىستى تالاپ قويا بىلەتىن پرەزيدەنت بولامىن», دەدى سەگۋرۋ.
پرەزيدەنتتىك سايلاۋدىڭ ءبىرىنشى كەزەڭى 18 قاڭتاردا وتكەن. وندا كانديداتتاردىڭ ەشقايسىسى 50%-دان جوعارى داۋىس جيناي الماعان. بۇل پورتۋگاليادا 1986 جىلدان بەرى العاش رەت تىركەلگەن جاعداي. ءبىرىنشى تۋردا سەگۋرۋ 31,1%, ال ۆەنتۋرا 23,5% داۋىس جيناعان.
اندرە ۆەنتۋرانى 1,5 ميلليوننان استام سايلاۋشى قولداعان. بۇل – 2019 جىلى قۇرىلعان Chega پارتياسى ءۇشىن ەڭ جوعارى ناتيجە. قازىرگى تاڭدا پارتيا پارلامەنتتەگى ەڭ ءىرى وپپوزيتسيالىق كۇش بولىپ وتىر.
ايتا كەتەيىك, پورتۋگاليا پرەزيدەنتى نەگىزىنەن وكىلدىك فۋنكتسيالاردى اتقارادى. دەگەنمەن ول پارلامەنت قابىلداعان زاڭدارعا ۆەتو قويۋعا, ال ەرەكشە جاعدايلاردا پارلامەنتتى تاراتىپ, مەرزىمىنەن بۇرىن سايلاۋ تاعايىنداۋعا قۇقىلى.
انتونيۋ جوزە سەگۋرۋدىڭ يناۋگۋراتسياسى 9 ناۋرىزعا جوسپارلانعان.
