كەڭەس بارىسىندا ەلەكتروساموكاتتاردى كولىك قۇرالى رەتىندە رەسمي تانۋعا باعىتتالعان زاڭنامالىق وزگەرىستەر قارالدى. اتاپ ايتقاندا, 1 شىلدەدەن باستاپ جالعا بەرىلەتىن ەلەكتروساموكاتتارعا قاتىستى بىرىڭعاي جانە مىندەتتى تالاپتار ەنگىزىلەدى. سونىمەن قاتار, بيزنەس سۋبەكتىلەرى ءۇشىن وتپەلى كەزەڭ قاراستىرىلعانى ايتىلدى.
توقاەۆ ۇكىمەتكە ەلەكتروساموكاتقا قاتىستى ماسەلەنى قايتا قاراۋدى جۇكتەدى
جيىندا جول-كولىك وقيعالارىنىڭ الدىن الۋ, پايدالانۋشىلاردىڭ ءتارتىبىن باقىلاۋ, تسيفرلىق قاداعالاۋ تەتىكتەرىن ەنگىزۋ, سونداي-اق كيكشەرينگ وپەراتورلارىنىڭ جاۋاپكەرشىلىگىن ارتتىرۋ ماسەلەلەرىنە باسىمدىق بەرىلدى. ماماندار بالامالى كولىك تۇرلەرىنىڭ كەڭىنەن قولدانىلۋى جول-كولىك وقيعالارى مەن اكىمشىلىك قۇقىق بۇزۋشىلىقتاردىڭ وسۋىمەن قاتار ءجۇرىپ جاتقانىن اتاپ ءوتتى.
الماتى قالاسى پوليتسيا دەپارتامەنتىنىڭ باستىعى ايدىن قابدۋلدينوۆتىڭ ايتۋىنشا, باستى ماقسات − قالالىق موبيلدىلىكتى شەكتەۋ ەمەس, ونى قاۋىپسىز ءارى ءتيىمدى باسقارۋ.
«ەلەكتروساموكاتتار بۇگىندە جول قوزعالىسىنىڭ تولىققاندى قاتىسۋشىسىنا اينالدى. سوندىقتان ولارعا قويىلاتىن تالاپتار دا باسقا كولىك قۇرالدارىنا ارنالعان ەرەجەلەر سەكىلدى ناقتى ءارى مىندەتتى بولۋى ءتيىس», دەدى ول.
پوليتسيا دەرەكتەرىنە سايكەس, 2025 جىلى الماتىدا ەلەكتروساموكاتتاردىڭ قاتىسۋىمەن 386 جول-كولىك وقيعاسى تىركەلىپ, 400-دەن استام ادام جاراقات العان. سونىمەن قاتار, جول ەرەجەسىن بۇزعان ساموكات پايدالانۋشىلارىنا قاتىستى 24 مىڭنان استام اكىمشىلىك حاتتاما تولتىرىلىپ, 10 مىڭنان اسا ەلەكتروساموكات ارنايى تۇراقتارعا قويىلعان.
كەڭەس اياسىندا كيكشەرينگ وپەراتورلارىنا قويىلاتىن جاڭا تالاپتار دا تالقىلاندى. ولاردىڭ قاتارىندا مىندەتتى ساقتاندىرۋ ەنگىزۋ, ەلەكتروساموكاتتاردى نومىرلىك بەلگىلەرمەن جابدىقتاۋ, گەوزونالاۋ جۇيەسىن قولدانۋ جانە ىشكى ىستەر مينيسترلىگىنىڭ دەرەكقورلارىمەن ينتەگراتسيالاۋ ماسەلەلەرى بار.
ايدىن قابدۋلدينوۆتىڭ سوزىنشە, موپەدتەردى رەتتەۋ تاجىريبەسى قاتاڭ ءارى جۇيەلى شارالاردىڭ ءتيىمدى ەكەنىن كورسەتكەن.
«مۇنداي ءتاسىل جول-كولىك وقيعالارىن ازايتىپ, ءتارتىپتى كۇشەيتەدى. ءدال وسى ءادىس ەلەكتروساموكاتتارعا دا قولدانىلادى. بۇل – ازاماتتاردىڭ ءومىرى مەن دەنساۋلىعىن قورعاۋعا باعىتتالعان ماڭىزدى قادام», دەدى ول.
كەزدەسۋ قورىتىندىسى بويىنشا تاراپتار ىنتىماقتاستىقتى جالعاستىرۋعا, پروفيلاكتيكالىق شارالاردى كۇشەيتۋگە جانە جاڭا تالاپتارعا بيزنەس پەن پايدالانۋشىلاردىڭ كەزەڭ-كەزەڭىمەن بەيىمدەلۋىن قامتاماسىز ەتۋگە ۋاعدالاستى.
