ەلوردانىڭ 20 جىلدىعىنا وراي ۇيىمداستىرىلعان شارادا استانا قالاسى اكىمدىگىنىڭ جوبالارى, يننوۆاتسيالىق يدەيالار تانىستىرىلدى. استانا قالاسى اكىمدىگىنىڭ ءتۇرلى باسقارمالارى مەن قۇرىلىمدىق بولىمشەلەرىنىڭ وكىلدەرى اتىراۋعا جۇمىس ساپارىمەن كەلدى. اتىراۋ وبلىسىنىڭ اكىمى نۇرلان نوعاەۆ پەن استانا قالاسى اكىمىنىڭ ورىنباسارى ەرمەك امانشاەۆ ىسكەرلىك ماقساتتا كەزدەسۋ وتكىزىپ, الداعى ماقسات-مىندەتتەردى ايقىندادى.
– استانا – قازاقستاننىڭ بارلىق قالالارىنا ۇلگى, – دەدى قوناقتاردى قارسى العان نۇرلان نوعاەۆ. – الەمدىك ستراتەگيالىق مىندەتتەردى شەشۋ ءۇشىن كوپتەگەن ەلدەردىڭ ءبىرىنشى باسشىلارى استاناعا ارنايى كەلەدى, اۋقىمدى شارالار وتەدى. مەديتسينانىڭ, عىلىم مەن ءبىلىمنىڭ بارلىق ماڭىزدى نىساندارى ەلوردادا شوعىرلانعان. ءوڭىردى دامىتۋ بويىنشا استانادان كوپ تاجىريبە الۋعا نيەتتىمىز.
بيزنەس-فورۋمدا ايماق باسشىسى ەلىمىزدىڭ الەۋمەتتىك-ەكونوميكالىق دامۋىنا ىقپال ەتەتىن جاڭالىقتاردى ەنگىزۋ بويىنشا ەكى قالا اراسىندا تاجىريبە الماسۋدىڭ ماڭىزى زور ەكەنىن اتاپ ايتتى. ەكونوميكانى ءارتاراپتاندىرۋ باعىتىندا جۇزەگە اسىپ جاتقان جۇمىستار جاقسى ناتيجە بەرىپ كەلەدى. استانا قالاسى اكىمىنىڭ ورىنباسارى ەرمەك امانشاەۆ جيىرما جىلدىق تاريحىندا باس شاھار ءبىراز تاجىريبە جيناعانى جايلى باياندادى. ارنايى دەلەگاتسيا استانا كۇنى مەرەكەسى قارساڭىندا بارلىق وبلىستاردى ارالاپ, برەند-جوبالارىن تانىستىرۋدى قولعا العان.
اتىراۋمەن وڭىرارالىق ىنتىماقتاستىق ونەركاسىپ, اۋىل شارۋاشىلىعى, كاسىپكەرلىك, تۋريزم, تسيفرلاندىرۋ, «اقىلدى قالا» تەحنولوگياسىن ەنگىزۋ باعىتتارى بويىنشا جۇزەگە اسپاق. بيزنەس-فورۋم اياسىندا استانا قالاسى ينۆەستيتسيالار جانە كاسىپكەرلىك باسقارماسى باسشىسىنىڭ ورىنباسارى ەرلان بەكمۇرزاەۆ ەلوردانىڭ دامۋ ستراتەگياسى تۋرالى بايانداما جاسادى. فورۋم جۇمىسىنا قاتىسقان اتىراۋلىق ىسكەر ازاماتتار دا يگى ىسكە جۇمىلا كىرىسۋگە مۇددەلى ەكەندەرىن جاسىرمادى. مىسالى, قازاقستاندا بالاماسى جوق امبەباپ ساۋدا ورتالىعى, «نۇرلى جەر» باعدارلاماسى بويىنشا سالىناتىن ساۋلەتتى تۇرعىن ءۇي كەشەنى, ءتورت مىڭعا جۋىق وقۋشىنى قابىلداي الاتىن مەكتەپ كەشەنى مەن «اقىلدى قالا» جوبالارى كاسىپكەرلەر تاراپىنان قىزىعۋشىلىققا يە بولدى. «اقىلدى قالا» جوباسى بويىنشا اتىراۋدا دا جۇيەلى جۇمىستار جۇزەگە اسۋدا. وبلىس اكىمى نۇرلان نوعاەۆ بۇل رەتتە ازاماتتىق بەلسەندىلىك باستى ءرول اتقاراتىنىن اتاپ ءوتتى. قاۋىپسىزدىكتى ساقتاۋ ماقساتىندا اتىراۋ قالاسىنداعى بارلىق كوشەلەرگە بەينەكامەرالار ورناتىلىپ جاتىر.
استانا قالاسى ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى ەرلان بەكمۇرزاەۆ باس شاھاردا 20 جىلدا تابىستى ىسكە اسقان جوبالاردى وڭىرلەرگە تاراتۋ ماقساتىندا جۇمىستانىپ جاتقاندارىن ايتتى. «اتىراۋلىقتار اسىرەسە ەكى جوباعا قىزىعۋشىلىق تانىتتى, ونىڭ ءبىرى ءىت-قاۋىپسىزدىك سالاسىندا, قالا كوشەلەرىنە بەينەباقىلاۋ كامەرالارىن ورناتۋ, ەكىنشىسى – «1000 جاڭا ساۋدا ورنى» جوباسى. مەملەكەت-جەكەمەنشىك ارىپتەستىگىنە نەگىزدەلگەن بۇل باستاماعا مەملەكەت قارجى سالعان جوق. ساۋدا الاڭدارىنا ارنالعان جەر تەلىمدەرىن ينۆەستورلار ۇسىندى, جوبانى ىسكە اسىرۋ استاناعا جاڭا ينۆەستيتسيالار تارتتى جانە جاڭا جۇمىس ورىندارى قۇرىلدى», دەيدى ە.بەكمۇرزاەۆ.
بيزنەس-فورۋم ناتيجەسىنىڭ ناقتى قانداي بولاتىنى بولاشاقتىڭ ەنشىسىندە, ايماقارالىق ىنتىماقتاستىقتى نىعايتۋعا باعىتتالعان قادامدار ەل يگىلىگىن ەسەلەۋدىڭ العىشارتى بولارى ءسوزسىز.
باقىتگۇل باباش,
«ەگەمەن قازاقستان»
اتىراۋ
