جاڭا كەيىپتەگى جاعالاۋ
پرەزيدەنتتىڭ بۇل ءسوزى الاكولدىڭ شىعىستاعى, ياعني ءۇرجار اۋدانى اۋماعىنداعى بولىگىنە دە قاراتا ايتىلعانى انىق. جاسىراتىنى جوق, كول سۋى قانشا جەردەن شيپالى بولسا دا, وعان باراتىن جول ويقى-شويقى, جاتار ورىن جايسىز, قىزمەت كورسەتۋ ساپاسىز بولسا تۋريستەردىڭ تەرىس اينالاتىنى ايتپاسا دا تۇسىنىكتى. قازىر «قايدا بارادى دەيسىڭ؟ كەلسە دە كەلەدى, كەلمەسە دە كەلەدىنىڭ» زامانى وتكەن. بۇگىنگىنىڭ تۋريسىنە ەڭ اۋەلى كەرەگى – ساپالى قىزمەت. مۇنى نەگە ايتىپ وتىرمىز؟ وسىدان ءبىراز جىل بۇرىن الاكولدىڭ شىعىس قازاقستانداعى اۋماعىندا ينفراقۇرىلىم مەن قىزمەت كورسەتۋ ساپاسى ناشار بولعانىن ەشكىم جوققا شىعارا قويماس. قالاي بولسا سولاي سالىنعان قۇرىلىستار مەن القام-سالقام جايما بازارلار كەلۋشىلەردى شوشىتپاسا دا كوڭىلدەرىن سۋ سەپكەندەي باساتىن ەدى.
ءدال قازىرگى تاڭدا «الاكول ادام تانىماستاي كەيىپكە ەندى, انتالياعا اينالدى» دەپ بوركىمىزدى اسپانعا اتپاساق تا, ءبىرشاما وزگەرىپ, دەمالىس ورىندارى تارتىپكە كەلتىرىلىپ, جاڭا نىساندار بوي كوتەرگەنى بەلگىلى. بىلتىر كول جاعالاۋىن رەتكە كەلتىرۋ مەن دەمالىس ورنىنا اپاراتىن جولداردى جوندەۋ ماقساتىندا وبلىستىق بيۋدجەتتەن 2 ميلليارد تەڭگەگە جۋىق قاراجات ءبولىنىپ, اۆتوتۇراقتار سالىنىپ, فەلدشەرلىك پۋنكت, جاڭا ساياباق پەن اۆتوۆوكزال اشىلعان-دى.
وبلىس اكىمى دانيال احمەتوۆ 2017 جىلى ءۇرجار اۋدانىنا بارعان ساپارىندا 2018 جىلى تۋريستەرگە بۇدان دا جايلى جاعداي جاسالاتىنىن, شومىلۋ ماۋسىمىنا دەيىن «وسكەمەن-شار-جالاڭاشكول» باعىتىنداعى تەمىر جول قاتىناسى پايدا بولاتىنىن, جالاڭاشكول ستانساسىنان الاكولگە دەيىنگى اۆتوموبيل جولى كۇردەلى جوندەۋدەن وتەتىنىن, استانا-ءۇرجار, الماتى-ءۇرجار باعىتتارىنداعى اۋە رەيستەرى توقتاۋسىز ءجۇرۋى كەرەكتىگىن ايتقان ەدى.
جاقىندا ايماق باسشىسى الاكولگە ارنايى بارىپ, سۋعا شومىلۋدىڭ جاڭا ماۋسىمىنا دايىندىق بارىسىن پىسىقتاپ قايتتى. ءبىر جىلدىڭ مۇعدارىندا مۇندا جاڭا ورىندىقتار مەن گۇلزارلار قويىلىپ, جەرگە تروتۋارلىق پليتالار توسەلىپتى. ورتالىقتا شىعارماشىلىق كەشتەر, ساحنالىق قويىلىمدار مەن بي كەشتەرىن وتكىزۋگە ارنالعان ءۇش ولشەمدى شاتىر كونسترۋكتسيالارى ورناتىلىپتى. قازىرگى ۋاقىتتا الاكولدە جاياۋ جۇرگىنشىلەر ايماعىندا تاماقتانۋ ورىندارى, بالالارعا ارنالعان ويىن جانە سپورت الاڭدارى جابدىقتالىپ, قولجەتىمدى تازا اۋىز سۋ مەن دارەتحانا مودۋلدەرى قۇرىلىپ, كوشە بويىنا اعاشتار مەن گۇلدەر وتىرعىزىلىپ, ارباتتىڭ ورتالىق بولىگىندە سۋبۇرقاق قۇرىلىسى جۇرگىزىلىپ جاتىر.
وسكەمەن مەن سەمەيدەن پويىز جۇرەدى
وبلىس اكىمىنىڭ ساپارى بارىسىندا بيىلعى سۋعا شومىلۋ ماۋسىمىندا الاكولگە (جالاڭاشكول ست.) وسكەمەن مەن سەمەيدەن پويىز قاتىنايتىنى, ماقانشى مەن جالاڭاشكول باعىتىنداعى جولعا ورتا جوندەۋ جۇمىستارى قولعا الىنىپ جاتقانى, قارابۇلاق پەن قابانباي اۋىلدارى اراسىنداعى 16 شاقىرىم جول دا جاقىن ۋاقىتتا جوندەلەتىنى ايتىلدى. پويىز دەمەكشى, وسكەمەن مەن سەمەيدەن دەمالىس ورنىنا دەيىن جۇرەتىن وتاربانىڭ باعاسى دا دەمالۋشىلاردىڭ قالتاسىن قاقپايتىنداي ەكەن. بيلەت قۇنى – 2800 تەڭگە. ايماق باسشىسى كەلەسى جىلى الاكول جاعاسىنا بەكەمدەۋ جۇمىستارى جۇرگىزىلەتىنىن, بۇل ماقساتقا وبلىستىق بيۋدجەتتەن 5 ميلليارد تەڭگەگە جۋىق قارجى ءبولۋ جوسپارلانىپ وتىرعانىن, سونىمەن قاتار كول جاعالاۋىنا تەگىن wi-fi ورناتىلاتىنىن جەتكىزدى.
بىلتىر د.احمەتوۆ الاكولدىڭ ىرگەسىندەگى قابانباي اۋىلىنداعى كوپ جىلدار بويى قاڭىراپ بوس تۇرعان مادەنيەت ءۇيىن تۋريستەرگە قىزمەت كورسەتەتىن مۋزەيگە اينالدىرۋ كەرەكتىگىن ايتىپ, ءتيىستى مەكەمەلەرگە تاپسىرما بەرگەن-ءدى. بۇگىندە اتالمىش نىسانعا جوندەۋ باستالىپ, قۇندى جادىگەرلەرمەن تولىقتىرۋ جۇمىستارى جۇرگىزىلىپ جاتىر. ارنايى قۇرىلعان اقپاراتتىق ورتالىقتا تەك قۇندى جادىگەرلەر عانا ەمەس, الاكولدەگى بارلىق ساۋىقتىرۋ بازالارى مەن سۋدىڭ ەمدىك قاسيەتتەرى تۋرالى مالىمەتتەر دە جيناقتالۋدا. «الاكول – xالقىمىزدىڭ بايلىعى. ول xالىقارالىق ستاندارتقا ساي بولۋى ءتيىس. دەڭگەيىن كوتەرۋ ءۇشىن جۇمىلا ارەكەت ەتەمىز. بۇدان بىلاي جوعارى دەڭگەيدەگى, جايلى ءارى ءساندى قوناق ۇيلەر سالاتىن كاسىپكەرلەردى عانا تارتامىز. ءبىزدىڭ ماقساتىمىز – قازاقستاندىق تۋريستەردى عانا ەمەس, شەتەلدىكتەردى دە وسى بىرەگەي ايماققا اكەلۋ. ولار وبلىستىڭ بۇكىل سۇلۋلىعىن جانە قازاق حالقىنىڭ قوناقجايلىلىعىن كورۋى كەرەك», – دەيدى ايماق باسشىسى.
ازامات قاسىم,
«ەگەمەن قازاقستان»
شىعىس قازاقستان وبلىسى, ءۇرجار اۋدانى
سۋرەتتەردى تۇسىرگەن
تىلەۋبەك شاياحمەت
