وسىدان التى جىل بۇرىن زاماناۋي ءبىلىم بەرۋ ۇلگىسىندە العاشقى شاكىرتتەرىن قابىلداپ, وقىتۋدى باستاعان ءبىلىم وشاعى حالىقارالىق ستاندارتقا ساي بولۋ ءۇشىن كاسىبي تۇرعىدا قىزمەت ەتىپ كەلەدى. بۇعان دەيىن حالىقارالىق مەكتەپتەر كەڭەسىنىڭ ساراپشىلارى بىرنەشە رەت كەلىپ, مەكتەپتەگى ءبىلىم بەرۋ جۇيەسىن حالىقارالىق مەكتەپتەر كەڭەسىنىڭ 7 ستاندارتى, ياعني «مەكتەپتى باسقارۋ ەرەجەلەرى», «وقىتۋ جانە وقۋ», «باسقارۋ جانە كوشباسشىلىق», «قىزمەتكەر», «وقىتۋ مەن وقۋعا قولجەتىمدىلىك», «مەكتەپ مادەنيەتى جانە وقۋ بارىسىنداعى سەرىكتەستىك», «رەسۋرسپەن قامتاماسىز ەتۋ» بويىنشا باقىلاۋ جانە باعالاۋ جۇرگىزدى. اتالعان ۇيىمنىڭ سوڭعى شەشىمىن قابىلداۋ ساپارى وسى جىلدىڭ 7-13 ءساۋىر ارالىعىندا وتكەن بولاتىن. ناتيجەسىندە مەكتەپ ءوزىنىڭ ۇيىم انىقتاعان ستاندارتتارعا سايكەستىگىن دالەلدەپ, حالىقارالىق دارەجەدەگى ءبىلىم بەرۋگە قابىلەتتى ەكەنىن مويىنداتتى.
ايتا كەتەيىك, حالىقارالىق مەكتەپتەر كەڭەسى - مەكتەپتەردى اككرەديتاتسيالاۋ جانە وقىتۋدىڭ وزىق ادىستەرىن ازىرلەۋمەن اينالىساتىن حالىقارالىق ءبىلىم بەرۋ جۇيەسىندەگى ۇيىم. ونىڭ قۇرامى دۇنيەجۇزىنىڭ 116 ەلىندەگى 738 مەكتەپ پەن 583 كوللەدجدى قامتيدى. اتالمىش قاۋىمداستىقتىڭ اككرەديتاتسياسىن الۋ حالىقارالىق ءبىلىم بەرۋدەگى كوپتەگەن ءىس-شارالارعا, تۇلەكتەر ءۇشىن الدىڭعى قاتارلى وقۋ ورىندارىنا, مۇعالىمدەردىڭ ءتۇرلى كاسىبي بايقاۋلارعا, كونفەرەنتسيالارعا ەركىن قاتىسۋىنا, ءتۇرلى ءبىلىم رەسۋرستارىنا, حالىقارالىق ۇيىمدارمەن سەرىكتەستىككە جول اشادى. سونىمەن قاتار ءبىلىم بەرۋ پروتسەسىندە اتالمىش ۇيىم ءاردايىم قولداۋ مەن كەڭەس بەرىپ وتىرادى.
