ءمينيستردىڭ ايتۋىنشا, بيىل قازاقستاندا 1-10 سىنىپ وقۋشىلارىنىڭ جالپى سانى 2,815 ملن ادامدى قۇرايدى. جازعى كانيكۋل كەزىندە 15 597 ساۋىقتىرۋ لاگەرى مەن الاڭدارى جۇمىس ىستەيدى دەپ جوسپارلانۋدا.
«بالالاردىڭ جازعى دەمالىسى ەكى باعىتتا: ساۋىقتىرۋ جانە ىسپەن شۇعىلداندىرۋ بويىنشا ۇيىمداستىرىلادى. ساۋىقتىرۋمەن 1-10 سىنىپ وقۋشىلارىنىڭ جالپى سانىنان 2,595 ملن بالا نەمەسە 92,2%-ى قامتىلادى. جازعى كەزەڭدە ىسپەن شۇعىلدانۋمەن (سەكتسيالار, ۇيىرمەلەر, كلۋبتار, ساياحاتتار جانە ت. ب.) 2,557 ملن نەمەسە وقۋشىلاردىڭ 91% قامتىلادى», — دەدى ە. ساعاديەۆ.
دارىندى بالالاردىڭ جانە حالىقتىڭ الەۋمەتتىك وسال توپتارىنان شىققان بالالاردىڭ جازعى دەمالىسىن ۇيىمداستىرۋعا قارجىلىق جانە ماتەريالدىق كومەك كورسەتۋگە جەرگىلىكتى بيۋدجەت ەسەبىنەن بيىل 4 ملرد تەڭگەگە جۋىق قاراجات ءبولىندى.
بالالاردىڭ جازعى دەمالىسىن جانە ىسپەن شۇعىلدانۋىن ۇيىمداستىرۋ جونىندەگى ۆەدومستۆوارالىق جۇمىستاردى ۇيلەستىرۋ ءۇشىن سانيتارلىق-ەپيدەميولوگيالىق, ءورت قاۋىپسىزدىگىنىڭ, بالالار جاراقاتىنىڭ, بالالاردىڭ قاداعالاۋسىز جانە پاناسىز قالۋىنىڭ الدىن الۋدى, مەديتسينالىق قىزمەت كورسەتۋدى جانە ساۋىقتىرۋدى جەرگىلىكتى جانە ورتالىق مەملەكەتتىك ورگانداردىڭ قامتاماسىز ەتۋى بويىنشا شارالاردى قاراستىراتىن قر پرەمەر-ءمينيسترىنىڭ وكىمى ارەكەت ەتەدى.
دەمالىس كەزەڭىندە بالالاردىڭ ساۋىقتىرۋ دەمالىسىن جانە ىسپەن شۇعىلدانۋىن, بالالار مەن جاسوسپىرىمدەر ءتۋريزمىن دامىتۋدىڭ 2016–2018 جىلدارعا ارنالعان جول كارتاسى ىسكە اسىرىلۋدا. بعم, ءىىم بىرلەسكەن بۇيرىعىمەن 2017–2019 جىلدارعا ارنالعان بالالاردى جۇزۋگە ۇيرەتۋدى ۇيىمداستىرۋ جونىندەگى شارالار جوسپارى بەكىتىلگەن. مينيسترلىك ۆەدومستۆوارالىق شارالار جوسپارى اياسىندا ءجۇزۋ جاتتىعۋلارىندا قامتىلعان بالالاردىڭ سانى تۋرالى اقپاراتتى باقىلايدى.
وڭىرلەردەگى جاعداي تۋرالى ماڭعىستاۋ وبلىسىنىڭ اكىمى ە. توعجانوۆ, اقتوبە وبلىسىنىڭ اكىمى ب. ساپارباەۆ, استانا اكىمى ءا. يسەكەشەۆ, الماتى اكىمى ب. بايبەك جانە اقتوبە وبلىسى اكىمىنىڭ ورىنباسارى ۆ. كرىلوۆ باياندادى.
ماسەلەنى قاراۋ قورىتىندىسى بويىنشا قر پرەمەر-ءمينيسترى باقىتجان ساعىنتاەۆ اكىمدەردىڭ, ىشكى ىستەر, دەنساۋلىق ساقتاۋ مينيسترلەرىنىڭ نازارىن بالالاردىڭ قاۋىپسىزدىگىن قامتاماسىز ەتۋ ماسەلەسىنە اۋداردى. سونداي-اق بالالار لاگەرلەرىنىڭ جۇمىسىنا قوعامدىق باقىلاۋدى كۇشەيتۋ جانە اتا-انالار مەن مۇعالىمدەر اراسىندا ۇنەمى اقپاراتتىق-ءتۇسىندىرۋ جۇمىستارىن جۇرگىزۋ قاجەت.
باقىلاۋ جۇمىستارى قر پرەمەر-ءمينيسترىنىڭ ورىنباسارى ە. دوساەۆقا جۇكتەلدى.
ايتا كەتەيىك, قازاقستاندا جاز مەزگىلىندە 1104 اۋلا كلۋبى جۇمىس ىستەيتىن بولادى, وندا 144 190 بالا (2017 ج. — 1088, وندا 150 864 بالا) قامتىلادى. جاز قورىتىندىسى بويىنشا سپورتپەن جانە تۋريزممەن 735 مىڭ, نەمەسە 26% وقۋشى قامتىلاتىن بولادى.
453 ەڭبەك جانە دەمالىس لاگەرىنىڭ, وندا 24 مىڭ بالا, 451 مەكتەپ ورمانشىلىعىنىڭ, وندا 32 مىڭ وقۋشى, 5365 ماۋسىمدىق ەڭبەك جاساعىنىڭ, وندا 137 مىڭ جوعارى سىنىپ وقۋشىسىنىڭ جۇمىستارى جوسپارلانۋدا. جالپى, ەڭبەكپەن 32% نەمەسە شامامەن ءبىر ميلليونعا جۋىق وقۋشى قامتىلاتىن بولادى (2017 ج. — 951 مىڭ بالا, 35,5%). جازعى كەزەڭدە 7 مىڭ جازعى وليمپيادالىق رەزەرۆ مەكتەبىنىڭ, كوشباسشىلار اكتيۆىنىڭ, تىلدىك مەكتەپتىڭ, دەبات كلۋبتارىنىڭ, 14 مىڭنان استام قىزىعۋشىلىقتار بويىنشا كلۋب پەن ۇيىرمەنىڭ, اۋلا كلۋبىنىڭ جۇمىستارى ۇيىمداستىرىلادى, سپورتتىق, تۋريستىك, ەكسكۋرسيالىق-تانىمدىق جانە شىعارماشىلىق باعىتتا 19 مىڭنان استام ءىس-شارا جۇرگىزىلەدى.
