ەگەر بۇرىن شاڭعى سپورتىمەن اينالىسقان بوبسلەيشى, سوچيدەگى قىسقى وليمپيا ويىندارىنىڭ التىن مەدال يەگەرى الەكساندر زۋبكوۆتى ەسەپتەمەگەندە, سپورتتاعى باعىتتارىن وزگەرتكەن سپورتشىلار كوپ ەمەس ەكەن. باسقا سپورت تۇرىنە اۋىسقانىنا تاڭدانىسپەن قارايتىن جانكۇيەرلەرگە سپورت جۇلدىزدارى مۇنداي قادامعا بارۋ بۇرىننان ويىندا جۇرگەندىگىن ايتىپ اقتالادى. سونىمەن قاتار مۇنداي ارەكەتتەرىن سپورتشىلار سول سپورت تۇرىنە دەگەن قىزىعۋشىلىعىمەن تۇسىندىرەدى. الايدا ولاردىڭ كوپشىلىگى «ەكىنشى ارمانى» تۋرالى ول كوپشىلىك الدىندا بۇرىن-سوڭدى جاريا ەتپەگەن.
تانىمال شۆەد فۋتبولشىسى زلاتان يبراگيموۆيچ دوپ قۋعا كەلگەن كەزىندە تاەكۆوندودان قارا بەلبەۋ يەگەرى اتانعان. ءتىپتى ونى جاتتىقتىرۋشىلارى ماقتانىشپەن ايتىپ جۇرەتىن بولعان.
رەسەي مەملەكەتتىك دۋماسىنىڭ دەپۋتاتى, بۇرىنعى كاسىپقوي بوكسشى – نيكولاي ۆالۋەۆ جاس كەزىندە ديسك لاقتىرۋدان سپورت شەبەرى اتانعان, سودان كەيىن بوكسقا كەلىپ, 2005, 2006, 2007 جانە 2009 جىلدارداعى اۋىر سالماقتاعى الەم چەمپيونى اتاندى. يتاليالىق فۋتبول فورۆاردى كريستيان ۆەري كاسىبي كريكەتشى بولار ەدى: 90-جىلداردىڭ سوڭى, 2000 جىلداردىڭ باسىنداعى اقشا ەڭ كوپ تولەنگەن فۋتبولشىلاردىڭ ءبىرى كريكەت جالپىحالىقتىق تانىمالدىلىققا يە ەل اۋستراليادا وتكەن. شابۋىلشى 2003 جىلى ءبىر سۇحباتىندا: «ەگەر ماعان ءدال وسىنداي (فۋتبولداعىداي) كەلىسىمشارت ۇسىنعاندا, مەن (كريكەتكە) اۋىسىپ كەتەر ەدىم», دەگەن بولاتىن. ول قازىر دە كريكەتتەن الەمدىك تۋرنيرلەردى قاداعالاپ وتىراتىنىن ايتادى.
بۇل سپورتشىلاردىڭ بارلىعىنان امەريكالىق ەدۆارد «ەددي» يگان اسىپ ءتۇستى. ول جازعى جانە قىسقى وليمپيادادا قاتار چەمپيون بولعان ەكى ادامنىڭ ءبىرى بولۋدى كوزدەدى: 1920 جىلى بوكسشى رەتىندە وليمپيادانى باعىندىرسا, ون ەكى جىلدان كەيىن اقش قۇراماسى ساپىندا بوبسلەي سپورتىنان قىسقى وليمپيا ويىندارىنىڭ التىن مەدالىن يەلەندى. جەڭىسكە قول جەتكىزگەن تۇستا يگان 34 جاستا بولاتىن, سودان كەيىن سپورتتىق دارىنى وعان ەكىنشى دۇنيەجۇزىلىك سوعىستا كومەكتەسىپ, ول تىنىق مۇحيت جانە ەۋروپا مايداندارىندا سوعىسىپ, پولكوۆنيك دارەجەسىنە دەيىن جەتكەن.
وليمپيادا تاريحىندا شۆەتسيالىق مانەرلەپ سىرعاناۋشى يلليس گرافسترەم جازعى وليمپيا ويىندارىمەن قاتار قىسقى ويىنداردىڭ دا جەڭىمپازى اتانعان تۇڭعىش سپورتشى. 1920 جىلعا دەيىن مانەرلەپ سىرعاناۋ جازعى ويىندارى قۇرامىندا بولسا, سودان كەيىن عانا قىسقى وليمپيادا ويىندارىنىڭ تىزىمىنە اۋىستى. گرافسترەم 1920, 1924 جانە 1928 جىلعى وليمپيا ويىندارىندا چەمپيون اتانعان.
2016 جىلدىڭ جەلتوقسان ايىندا سلوۆەنيالىق فيليپ فليسار جۇرتتى تاڭعالدىردى. سكي-كروسستان الەم كۋبوگىنىڭ يەگەرى ءساتسىز ماۋسىمنان كەيىن ماۋنتينبايك سپورتىنا اۋىسىپ, الەم چەمپيوناتىنىڭ العاشقى ماۋسىمىنىڭ وزىندە 10-ورىنعا كوتەرىلدى.
كونكيمەن جۇگىرۋدەن ءۇش دۇركىن وليمپيادا چەمپيونى جانە 13 دۇركىن الەم چەمپيونى, چەحيا سپورتشىسى مارتينا سابليكوۆا 2015 جىلى ۆەلوجارىستى قولعا الىپ, ءتىپتى ريو-دە-جانەيرودا وتەتىن جازعى وليمپيادا ويىندارىنا قاتىسۋ ءۇشىن جەكە جارىس بويىنشا كۆاليفيكاتسيالىق كەزەڭنەن وتكەن. بىراق ونى تاسجولداعى ۆەلوجارىسقا كۆاليفيكاتسيا الماعانى ءۇشىن جارىسقا قاتىستىرماي قويدى. ەندى 31 جاستاعى چەح سپورتشىسىنىڭ جاڭا وليمپياداعا دايىندالۋعا ءالى ەكى جىلداي ۋاقىتى بار. وعان قاتىسۋدى سپورتشى ءوزىنىڭ ومىرلىك ارمانى دەپ ەسەپتەيدى.
سپورت تاريحىنداعى ەڭ تانىمال جەلاياقتاردىڭ ءبىرى, 8 دۇركىن وليمپيا ويىندارىنىڭ چەمپيونى يامايلىق ۋسەين بولت كۇتپەگەن جەردەن فۋتبولعا اۋىسقاندىعىن ايتىپ, ءتىپتى گەرمانيانىڭ سەگىز دۇركىن چەمپيونى دورتمۋندتىق «بورۋسسيامەن» وتكىزەتىن جاتتىعۋلارىنىڭ كەستەسىن جاريالادى. سونىمەن قاتار ايگىلى جەلاياق بىرەر اي بۇرىن «بورۋسسيا» ساپىندا ءبىر رەت جولداستىق كەزدەسۋ وتكىزىپ تە ۇلگەردى.
31 جاستاعى سپورتشىنىڭ باق وكىلدەرىنە بەرگەن سۇحباتىنا سەنسەك, ول جاڭا مانسابىنداعى مۇمكىندىكتەرى جايلى فۋتبول الەمىندەگى بىلىكتى ادامدارمەن كەڭەسكەن. «ەگەر مەن «مانچەستەر يۋنايتەد» كومانداسىندا ويناسام, ارمانىم ورىندالار ەدى», دەپ سپورتشى ءوزىن «سىناق» ماتچىنا شاقىرسا دەگەن نيەتىن بىلدىرگەن-ءدى.
ءالي بيتورە,
«ەگەمەن قازاقستان»
