...جاڭالىعىن جەتكىزەدى
شاكارىم مۇراسى ناسيحاتتالدى
جۋىردا س.بايىشەۆ اتىنداعى اقتوبە وبلىستىق امبەباپ عىلىمي كىتاپحاناسى عۇلاما ويشىل, اقىن ش.قۇدايبەردى ۇلىنىڭ 160 جىلدىعىنا وراي «شاكارىم مۇراسى – حالىقتىڭ اسىل قازىناسى» اتتى وقىرمان كونفەرەنتسياسىن ۇيىمداستىردى.
شارا بارىسىندا اۆتوماتتاندىرۋ ءبولىمىنىڭ قىزمەتكەرلەرى فوتو-شەجىرە سلايد, بەينەماتەريال ۇسىندى. «دانا ءسوزدىڭ داراسى» اتتى كىتاپ كورمەسىنە بيبليوگرافيالىق شولۋ جاساعان كىتاپحانا قىزمەتكەرى وقىرمانداردى شاكارىم قۇدايبەردى ۇلىنىڭ وسى كىتاپحانا قورىندا جيناقتالعان ءتول تۋىندىلارى مەن ول تۋرالى جازىلعان زەرتتەۋلەر مەن ەستەلىكتەر, ارناۋلار جازىلعان كىتاپتارمەن تانىستىردى. شولۋدا اقىننىڭ ءومىربايانى مەن شىعارماشىلىعى, ارتىندا قالعان مول مۇراسى تۋرالى ايتىلدى.
باسقوسۋدا اقتوبە گۋمانيتارلىق كوللەدجىنىڭ ستۋدەتتەرى شاكارىم قۇدايبەردى ۇلىنىڭ «جاستارعا», «ادامشىلىق», «بوستاندىق تاڭى اتتى» ولەڭدەرىن وقىپ, «بۇل ءان بۇرىنعى اننەن وزگەرەك» اتتى اسەم ءانىن شىرقاپ, كورەرمەندەردىڭ ىستىق ىقىلاسىنا بولەندى.
نۇرلىگۇل بەردىعاليەۆا,
س.بايىشەۆ اتىنداعى اقتوبە وبلىستىق امبەباپ عىلىمي كىتاپحاناسىنىڭ قىزمەتكەرى
...پىكىرىن بىلدىرەدى
جاڭعىرۋعا بارىنشا ۇلەس قوسايىق
ءبىزدىڭ ەلىمىزدىڭ ونەركاسىبى, عىلىم, ءبىلىمى دامىپ كەلەدى. وسىعان تاۋبە دەۋىمىز كەرەك. ءار ادام ءوزىنىڭ وتان الدىنداعى ابىرويلى بورىشىن ادال اتقارۋعا مىندەتتى. قاريالار ءوز ۇرپاعىمىزدى دۇرىس تاربيەلەپ, ەل بىرلىگىن, وتان تىنىشتىعىن ساقتاۋعا, ءتىل, ءدىن, اتا ءداستۇرىمىزدى جاڭعىرتۋعا بارىنشا ۇلەس قوسايىق! مەنىڭ ويىمشا, بۇرىنعى وتكەن-كەتكەن كەلەڭسىز جاعدايلاردى دارىپتەۋ ءار جەردە بەلەڭ الىپ بارا جاتقان سياقتى. قازىرگى زايىرلى, ازاماتتىق قوعامدا مۇنىڭ زيانى شاش ەتەكتەن. قازىرگى زامان – ءبىلىم, عىلىمنىڭ, ءتىل, ءدىن, ءداستۇرىمىزدىڭ جاڭعىرىپ, دۇنيە جۇزىندەگى وركەندەگەن ەلدەردىڭ قاتارىنا قوسىلاتىن, زاماننىڭ اعىمىنا ىلەسەتىن كەزەڭ. ءبىزدىڭ ەلدە ءومىردىڭ بارلىق سالاسى زاڭداستىرىلىپ, جاڭاشا قارقىنمەن دامىپ كەلەدى. بۇل تاۋەلسىزدىگىمىزدىڭ, ەگەمەندىگىمىزدىڭ ارقاسى.
ەندى ەلدى وركەندەتۋگە باعىتتالعان اۋقىمدى جوبالار ىسكە اسسا, ەلىمىز مۇنان دا وركەندەپ, دۇنيەگە تانىلىپ, وزىق ەلدەردىڭ قاتارىنا قوسىلامىز. ەلىمىز امان, جۇرتىمىز تىنىش بولىپ, ەل بىرلىگى, تىنىشتىعى ارتا بەرسىن!
مەشەل داكىس,
ەڭبەك ارداگەرى
اقمولا وبلىسى
...دابىل قاعادى
سۋدىڭ دا سۇراۋى بار
كوپشىلىككە بەلگىلى جايت, سۋ – بۇكىل تىرشىلىكتىڭ كوزى. سوندىقتان دا دانا حالقىمىز ونى ءومىر نارىنە بالاعان. «سۋدىڭ دا سۇراۋى بار» دەپ ايتاتىن دا اتام قازاق. دەمەك, ول سۋ سارقىلماسىن, توقتاماسىن, ازايماسىن دەگەن نيەتپەن ايتىلسا كەرەك. ال ءبىز كۇندەلىكتى ومىردە وسىنى ۇعا الىپ ءجۇرمىز بە؟ بۇل جەردە ءبىزدىڭ ايتپاعىمىز – سۋدى ىسىراپ ەتپەۋ, شاشىپ-توكپەۋ. اس ۇيدە, جۋىناتىن بولمەدە «سۋ ۇيگە كەلىپ تۇر عوي» دەگەن تۇسىنىكپەن مولشەردەن تىس شاشىپ-توگۋ كەزدەسەتىنىن جوققا شىعارا الاسىز با؟
بيىلعى قىس ءبىزدىڭ اۋدان ءۇشىن جىلداعىدان سۋىق ءارى ايازدى كۇندەرى كوپ بولدى. ءبىراز ۇيلەردىڭ سۋ قۇبىرلارى ەكى-ءۇش كۇن قاتىپ قالىپ, تۇرعىندار اۋىز سۋدان كوپ قيىنشىلىق كوردى. انشەيىندە اۋىز سۋعا ونشا ءمان بەرە بەرمەيتىن تۇرعىندار وسى جولى ونىڭ قۇنى مەن قاسيەتىن تەرەڭىرەك ۇعىنعانداي بولدى.
جەر شارىنىڭ تورتتەن ءبىر بولىگىن قۇرلىق الىپ جاتسا, تورتتەن ءۇش بولىگىن سۋ الىپ جاتىر ەكەن. الايدا جوعارىدا ايتىپ وتكەنىمىزدەي, «سۋدىڭ دا سۇراۋى بار» ەكەندىگىن ۇمىتپاي, مەملەكەتىمىزدىڭ باستى تىرەگى ەكونوميكا بولسا, ونىڭ ءبىر جاعىن سۋ قورى تۇزەتىنىن ۇمىتپاي, ەستە ساقتاپ, تىرشىلىك تىرەگى, ءومىر ءنارى – سۋدىڭ قاسيەتىن باعالاي بىلەيىك دەمەكپىن.
كارىباي امزە ۇلى
وڭتۇستىك قازاقستان وبلىسى,
سوزاق اۋدانى
...العىس ايتادى
جاپوندار جاقسىلىق جاسادى
مەكتەپ – ءبىلىم ايدىنىنداعى ۇلكەن كەمە. وسى ءبىلىم وردالارىنىڭ زامانعا ساي جابدىقتالۋى – بۇگىنگى كۇن تۇرعىسىنان ۇلكەن مانگە يە. ەلىمىزدە زامانعا ساي كۇردەلى جوندەۋلەردەن ءوتىپ جاتقان مەكتەپتەر مەن ءبىلىم وشاقتارى بارشىلىق. سونىمەن قاتار حالىقارالىق ىنتىماقتاستىعىمىز بەن بىرلىگىمىزدىڭ ارقاسىندا جاپون ەلىنىڭ دە شاراپاتىن كورىپ وتىرعان جايىمىز بار. جاپون ۇكىمەتى ء«شوپ تامىرى» باعدارلاماسى اياسىندا ەلىمىزگە ءتۇرلى قاجەتتىلىكتەردى قامتاماسىز ەتەتىن قايىرىمدىلىق ىستەرىن جۇزەگە اسىرۋدا. قولعا الىنعان باعدارلامانىڭ ماقساتى – ۇكىمەتتىك ەمەس ۇيىمداردىڭ, اۋرۋحانا, مەكتەپ, تاعى باسقا الەۋمەتتىك نىسانداردى كۇردەلى جوندەۋدەن وتكىزۋگە جانە سالۋعا جاسالعان جوبالارىنا قايتارىمسىز قارجىلاي كومەك كورسەتۋ. وسى باعدارلاما اياسىندا ماڭعىستاۋ وبلىسىنىڭ تۇپقاراعان اۋدانىنىڭ شاحتى ورتا مەكتەبى, «جاڭاوزەن قىزمەت كورسەتۋ جانە جاڭا تەحنولوگيالار كوللەدجى جانە مۇنايلى اۋدانىنىڭ №1 جالپى ءبىلىم بەرۋ ورتا مەكتەبى گرانتقا يە بولىپ, مەكەمەنىڭ جىلۋ جۇيەسىن جوندەۋگە ارنالعان قايتارىمسىز قارجى كومەگىنە قول جەتكىزىپ وتىر.
وسىنداي يگى ءىستىڭ سەبەپكەرى بولعان جاپون ۇكىمەتىنە العىس بىلدىرە وتىرىپ, جاقسىلىقتىڭ شاراپاتىن كورۋىنە تىلەكتەستىگىمىزدى جەتكىزەمىز. سونداي-اق وسى باعدارلاماعا قاتىسۋعا جول كورسەتىپ, جاقسى ىستەردىڭ جارشىسى بولا بىلگەن وبلىستىق ءبىلىم باسقارماسىنا, اۋداندىق ءبىلىم بولىمىنە دە العىسىمىزدى بىلدىرەمىز.
ءسانيا ساركەنوۆا,
№1 جالپى ءبىلىم بەرەتىن ورتا مەكتەپتىڭ ديرەكتورى
ماڭعىستاۋ وبلىسى
...اسەرىمەن بولىسەدى
تاراز تاريحىمەن تانىستى
اتىراۋ وبلىستىق ارداگەرلەر كەڭەسىنىڭ ۇيىمداستىرۋىمەن قۇرامىندا 20 ارداگەر بار توپ «جىبەك جولى» باعىتىنداعى قاسيەتتى تاراز قالاسىندا ساياحاتتا بولىپ قايتتى. وبلىستىق كەڭەستىڭ توراعاسى توپ مۇشەلەرىمەن كەزدەسىپ, رۋحاني جاڭعىرۋ ۇدەرىسىنە وراي ۇيىمداستىرىلىپ وتىرعان بۇل ساپارعا قاتىسۋشىلارعا وڭ ساپار تىلەدى.
ارداگەرلەر كونە تاراز جەرىندەگى قاراحان, داۋىتبەك, تەكتۇرماس, ايشا ءبيبى كەسەنەلەرىندە, اقىرتاس كەشەنىندە بولىپ, تىلسىم تاريح قويناۋىنا ءۇڭىلدى. تاراز قالاسىنداعى قازاق حاندىعىنىڭ 550 جىلدىعىنا ارنالىپ سالىنعان نىساندارمەن, وبلىستىق تاريحي-ولكەتانۋ مۋزەيىنىڭ, تورتكول كەرۋەن سارايىنىڭ, جامبىل اتىنداعى رۋحانيات ورتالىعىنىڭ جادىگەرلەرىمەن كەڭىنەن تانىستى.
توپ مۇشەلەرىنە «قازاق حاندىعىنا – 550 جىل» مونۋمەنتى, كەرەي مەن جانىبەك حانداردىڭ ەسكەرتكىشتەرى ەرەكشە اسەر قالدىردى. ارداگەرلەر وسىنداي تاعىلىمدى دا اسەرلى ساپار ءۇشىن وبلىستىق ارداگەرلەر كەڭەسىنە ريزاشىلىق سەزىمدەرىن ءبىلدىردى.
س.مۇحامبەتوۆ,
اتىراۋ وبلىستىق ارداگەرلەر كەڭەسى توراعاسىنىڭ ورىنباسارى
