بىراق بۇل ماسەلە ءبارىبىر تولىق شەشىلەر ەمەس, كوپتەگەن مەمورگاندار وزدەرىنىڭ جابدىقتاۋشىلارىنىڭ مۇددەسىن قورعاپ, زاڭنامانىڭ نورمالارىن بۇزۋدا. ماسەلەن, شىعىس قازاقستان وبلىسىنداعى «وسكەمەن قالاسىنىڭ قارجى ءبولىمى» مك وزدەرىنىڭ جابدىقتاۋشىسىن كونكۋرستا جەڭگىزۋدىڭ جاڭا جولىن تاپقان. باعاسى 9 ملرد تەڭگەدەن ارتىق تۇراتىن تاپسىرىستى (ترانسفورماتورلىق قوسالقى ستانسالار قۇرىلىسى) ايرىقشا ءتارتىپتى قولدانۋ ارقىلى مەملەكەتتىك ساتىپ الۋلاردىڭ ەلەكتروندىق پورتالى ارقىلى وتكىزگەن. وسى ورايدا ولار ايرىقشا ءتارتىپتى قولدانۋ – ۇلتتىق قاۋىپسىزدىك پەن قۇقىق قورعاۋ ورگاندارى نەمەسە قىزمەتتىك اقپاراتتاردى شەكتى كولەمدە عانا تاراتاتىن مەملەكەتتىك قۇپياعا قاتىسى بار قىزمەتتەردىڭ قۇرىلىسىن سالۋعا عانا قاتىستى ەكەنىن ەسكەرمەگەن. ءتىپتى ايرىقشا جاعدايلار مەملەكەتتىك ساتۋدىڭ ۆەب-پورتالىنا سالىنبايتىندىعى تۋرالى 2015 جىلدىڭ 31 جەلتوقسانىندا قابىلدانعان ۇكىمەتتىڭ قاۋلىسىن دا كوزگە ىلمەگەن.
كاسىپكەرلەردىڭ شاعىمىنا بايلانىستى «اق جول» قدپ قارجى مينيسترلىگىنە قايىرىلعان ەدى, ونىڭ ىشكى اۋديت قىزمەتى تەكسەرىپ, ايرىقشا ءتارتىپتى قولدانۋدىڭ زاڭ بۇزۋشىلىق ەكەنىن انىقتادى.
وسىنداي جاعداي وقو شاردارا اۋداندىق اكىمدىگىندە دە ورىن العان. وندا شاردارا سۋ قويماسىنىڭ جاعالاۋىنداعى عيماراتتى بالالاردىڭ ساۋىقتىرۋ لاگەرىنە جالعا الۋ ءۇشىن وتكىزىلگەن تەندەردە جەتكىزۋشىگە قويىلاتىن تالاپتاردىڭ اراسىندا قىزمەتكەرلەردىڭ سانى 37-دەن (نەگە ناق 37?) كەم بولماۋى, ولاردىڭ جاتىن ورىندارىنىڭ بولۋى, اسحانا 100 بالاعا جانە 37 قىزمەتكەرگە ارنالۋى جانە ت.ب. تالاپتار قويىلعان. قىزمەتكەرلەردىڭ ءبارىنىڭ لاگەردە جاتىپ-تۇرۋىن مىندەتتەۋدىڭ قانداي قاجەتتىگى بولعانىن ەشكىم دە تۇسىنبەيدى. سونىمەن بىرگە ءورت ءسوندىرۋ مەن ەلەكتر جابدىقتارىنىڭ ساپاسى ەمەس, مودەلىنىڭ قانداي بولۋى ءتيىس ەكەنى تالاپ ەتىلگەن. ال وسى كونكۋرستا جەڭىمپاز بولعان ۇيىمعا ۇسىنىلۋعا ءتيىستى سوما ساتىپ الۋدىڭ جوسپارىندا 5,3 ملن تەڭگە بولسا, ەندى ونىڭ نەلىكتەن 4,5 ملن. تەڭگەگە ازايىپ قالعانى دا تۇسىنىكسىز.
باس پروكۋرور قايرات قوجامجاروۆ پەن قارجى ءمينيسترى باقىت سۇلتانوۆتىڭ اتىنا جولدانعان دەپۋتاتتىق ساۋالىمىزدى اتالعان ماسەلەگە قاتىستى ارنايى تەكسەرىس جۇرگىزىپ, ءتيىستى شارالار قولدانۋ سۇرالىپ وتىر.
كەڭەس ابساتيروۆ,
ءماجىلىس دەپۋتاتى
