– ىرگەسىن سوناۋ جىلدارى مۇحتار اۋەزوۆ پەن جۇسىپبەك ايماۋىتوۆ قالاعان «اباي» جۋرنالى تاۋەلسىزدىك العان جىلدارى رىسحان ءمۋسيننىڭ باسشىلىعىمەن قايتا جاڭعىردى,-دەيدى مۇرات سۇلتانبەكوۆ,-«اباي» جۋرنالىندا ىستەپ جۇرگەن كەزىم ەدى. 2005 جىلدىڭ جاز ايى بولاتىن, ءبىر كۇنى رىسحان اعا شاقىرتتى. ءازىلحان نۇرشايىقوۆتان حابار الىپتى. ءاز اعانىڭ سەمەي قالاسىنداعى شاكارىم داڭعىلى بويىنداعى ۇيلەردىڭ بىرىندە مايدانداس دوسى تۇرادى ەكەن بار ەكەن, سول سىرقاتتانىپ قالىپتى. كوڭىلىن سۇراۋعا كەلە جاتىر. سودان «اباي» جۋرنالىنىڭ باس رەداكتورى رىسحان مۋسين بار, «سەمەي تاڭى» گازەتىنىڭ باس رەداكتورى ريزا مولداشەۆا ۇشەۋمىز ءازىلحان نۇرشايىقوۆتى اۋەجايدان قارسى الدىق. دوسىنىڭ كوڭىلىن سۇراپ شىققان سوڭ, رىسحان مۋسين اعامىز ۇيىنە ءدام تاتۋعا شاقىردى. فوتوگراف شاقىرىپتى. ەستەلىككە سۋرەتكە تۇستىك. سول جولى «سەمەي تاڭى» گازەتىنىڭ باس رەداكتورى ريزا مولداشەۆا دا ءازىلحان اعانى ءبىر توپ قالامگەر قاۋىمىممەن «سەمەي» مەيرامحاناسىنا دامگە شاقىردى. ءبارىمىز تاعى دا باس قوستىق. ەستەن كەتپەس ءبىر ەرەكشە كەزدەسۋ بولدى. جازۋشى ءازىلحان نۇرشايىقوۆ ريزا مولداشەۆانىڭ جۋرناليستيكا سالاسىندا اتقارىپ جاتقان جۇمىستارىن ەرەكشە باعالايتىندىعىن ايتاتىن. ەكەۋىنىڭ قالامگەر-جۋرناليست رەتىندە ساباقتاستىعى دەۋگە بولا ما, كەيىنىرەك ءازىلحان اعانىڭ ەسكەرتكىش تاقتاسىن ريزا قىزىمىز ءوزى باسشىلىق جاساپ وتىرعان «سەمەي تاڭى» رەداكتسياسىنىڭ عيماراتىنا ىلگىزدى. قازىردە قاراسام, ءازىلحان نۇرشايىقوۆ تا, رىسحان مۋسين دە «سەمەي تاڭى» رەداكتسياسىنىڭ تاريحى سياقتى ەستەلىك بوپ تۇر. ريزا قىزىمىزعا ۇلكەن راحمەت! ەكەۋى دە مەنىڭ ارىپتەستەرىم, اعالارىم, ءوزىم ايرىقشا قۇرمەت تۇتاتىن قالامگەرلەرىم ەدى.
وتكەن كۇننىڭ ەستەلىگىن ايتامىن دەپ وسى تۇسقا كەلگەندە مۇرات اعا كوزىنە جاس الدى. ايتۋىنشا, ەڭ العاش رەت 2004 جىلى 7 قىركۇيەكتە الماتىعا جازۋشىلار وداعىنا ارنايى جۇمىس ساپارىمەن بارعان كەزدە ءازىلحان اعامەن تانىسقان ەكەن. امانداسىپ بولعان سوڭ «قالقام قايدان كەلىپ ەڭ؟» دەپ سۇرايدى ءازىلحان اعا.
– سەمەيدەن كەلدىم دەپ ەم, بىردەن قولتىقتاي الىپ, قۇشاقتاپ, قۋانىپ سەمەيدىڭ قال-جاعدايىن سۇراستىرا باستادى. سەمەي ونىڭ كوزىنە ىستىق كورىنەدى ەكەن-اۋ قانشا دەگەنمەن ەندى ويلاپ قاراسام,-دەدى مۇرات سۇلتانبەكوۆ اقساقال,-دەرەۋ قالتاسىنان ۆيزيتكاسىن الىپ شىعىپ, «قىمباتتى باۋىرىم مۇراتقا» دەپ ىزگى تىلەكتەرىن جازىپ, قولتاڭباسىن بەردى. سودان باستاپ مەن ونىمەن قاتتى دوس بوپ كەتتىم. مەن ءازىلحان نۇرشايىقوۆتىڭ وتىنىشىمەن «ماڭگىلىك ماحاببات جىرى» اتتى شىعارماسىن «پەسنيا ۆەچنوي ليۋبۆي» دەپ ورىس تىلىنە اۋداردىم. 2009 جىلى ءازىلحان اعا «سانات» دەگەن باسپادان «ماحاببات جىرلارى» دەگەن كىتاپ شىعاردى. وسىنىڭ ىشىندە جازۋشىنىڭ شىعارمالارى, ولەڭدەرى بار ەكەن. ەڭ سوڭىنا مەنىڭ ورىس تىلىنە اۋدارعان «پەسنيا ۆەچنوي ليۋبۆي» دەگەن اۋدارمامدى كىرگىزىپتى. «پەرەۆود مۋراتا سۋلتانبەكوۆا, 2004 گود» دەپ جازىپتى. رزا بولدىم. الماتىعا ۇيىنە قوناققا شاقىردى.كابينەتىندە وتىردىق. كابينەتى ءبىر مۇراجاي سياقتى, كىتاپ وتە كوپ. جازۋشىنىڭ جۇمىس ورنى ەكەندىگى بىردەن كورىنىپ تۇر. اڭگىمەلەستىك, ەلدىڭ جاعدايىن ايتتىم. ۇمىتىلمايتىن كەرەمەت شىعارماشىلىق كەزدەسۋ بولدى.
ءيا ءبارىن ايت تا, ءبىرىن ايت, قازاق ادەبيەتىندە توم-توم شىعارمالار جازىلىپ, تاعى سونشاسى ورىسشاعا اۋدارىلىپ جاتىر, بىراق اباي مەن شاكارىمدى ورىس تىلىنە ءوز دەڭگەيىندە اۋدارعان اۋدارماشى-اقىندار نەكەن ساياق. سولاردىڭ ىشىندە مۇرات سۇلتانبەكوۆتىڭ الار ورنى ايرىقشا. ونىڭ «حان ابىلاي ي ەگو باتىرى», «داگەستان», «يرتىشسكي وستروۆ» «اباي ي شاكاريم ۆ ءححى ۆەكە» جانە تاعى باسقا كىتاپتارى مەن ماقالالارى ءبىر توبە. تاعى ءبىر ايتا كەتەر جايت, مۇرات سۇلتانبەكوۆ قايىم مۇحامەدقانوۆتىڭ ۇسىنىسىمەن اباي مەن شاكارىمدى دە ورىسشا سويلەتكەن اقىن
– سەمەيدە ءازىلحان نۇرشايىقوۆقا كوشە بەرىلەدى دەگەندى ەستىپ, قاتتى قۋانىپ وتىرمىن,-دەدى مۇرات اقساقال, - ءاز اعانى زامانىندا ەل باعالاعان. داڭقتى باۋىرجان مومىش ۇلىنىڭ كەز كەلگەن جۋرناليستەردى كىرگىزبەيتىن, جولاتپايتىن قاتال مىنەزى بولعان ەكەن. تەك ءازىلحان نۇرشايىقوۆتىڭ سوعىستا بولعان, مايدانگەر ەكەندىگىن ەستىپ, سۇحباتتاسۋعا كەلىسكەن ەكەن. بۇل تۋرالى ءاز اعانىڭ ءوزى ايتىپ وتىراتىن. ءازىلحان نۇرشايىقوۆتى مەن ءوز وتىنىشىنە وراي, مۇمكىندىگىنشە ورىسشا اۋداردىم. ونى باسقا تىلدەرگە اۋدارۋ, كوشە اتىن بەرۋ ارينە, كەلەر ۇرپاقتىڭ, قازىرگى جاستاردىڭ موينىنداعى پارىز ءىس دەپ بىلەمىن.
راۋشان نۇعمانبەكوۆا,
سۋرەتتەر اۆتوردىكى
سەمەي
