تۇلەكتەردىڭ 1692-ءسى «التىن بەلگىگە», 1029-ى ۇزدىك اتتەستاتقا ۇمىتكەر. جالپى بيىلعى وقۋ جىلىندا وبلىستاعى 1038 مەكتەپتە 634 مىڭعا جۋىق وقۋشى ءبىلىم الدى. بارلىق مەكتەپتەردە سوڭعى قوڭىراۋ سالتاناتى «ەل جۇرەگى – استانا» تاقىرىبىندا ءوتتى. تۇلەكتەردى قۇتتىقتاۋ ءۇشىن حيميا بيولوگيا باعىتىنداعى ن.نازارباەۆ زياتكەرلىك مەكتەبىنىڭ سوڭعى قوڭىراۋ شاراسىنا قاتىسقان وبلىس اكىمى جانسەيىت تۇيمەباەۆ مەملەكەت جۇزەگە اسىرىپ جاتقان رەفورمالار مەن اتقارىپ جاتقان قىرۋار ىستەر جاستار ءۇشىن جاسالىنۋدا ەكەنىن اتاپ ءوتتى. «سىزدەر ەلباسى ارمانداعان «ماڭگىلىك ەل» - يدەياسىنىڭ قۇرىلىسشىلارى ەكەندەرىڭىزدى ەشۋاقىتتا ەستەن شىعارماڭىزدار. ەلباسى ءوزىنىڭ حالىققا جولداۋىندا جاستاردى ءبىلىمدى, ەڭبەكقور, باستاماشىل, بەلسەندى بولۋعا جاس كەزىنەن باستاپ داعدىلانۋىن باستى نازارعا الدى», - دەدى جانسەيىت تۇيمەباەۆ. سونىمەن قاتار, وبلىس باسشىسى مەكتەپ كىتاپحاناسىنىڭ قورىنا «جاھان تانىعان جەتى تۇلعا», «تۇركىتانۋدىڭ تاريحي-لينگۆيستيكالىق نەگىزدەرى» اتتى تۋىندىلاردى تارتۋ ەتىپ, ۇرپاق تاربيەسى ءۇشىن تەر توگىپ جۇرگەن بىرقاتار ۇستازداردى ماراپاتتادى.
ايتا كەتەلىك, بيىل حيميا –بيولوگيا باعىتىنداعى نازارباەۆ زياتكەرلىك مەكتەبىن 97 تۇلەك اياقتادى. ولاردىڭ 30-دان استامى شەتەلدىك جوو-نا قۇجات تاپسىرىپتى. قازىرگى تاڭدا مەكتەپتىڭ 17 تۇلەگى الەمدىك رەيتينگتىڭ ۇزدىك 100 ۋنيۆەرسيتەتىنە كىرەتىن امەريكا, گەرمانيا, كورەيا, قىتاي, رەسەي, كانادا ەلدەرىنىڭ جوعارى وقۋ ورىندارىندا تەگىن وقۋ گرانتىنا يە بولعان.
ەركىن دوسىمباي,
وڭتۇستىك قازاقستان وبلىسى.
