سوڭعى جىلدارى سانگە اينالعان ونەر كەسكىنىنىڭ اشىلۋ سالتاناتىنا اۋدان اكىمى جارماعانبەت ايتۋاروۆ, ونىڭ ورىنباسارى ەربولات ماحمۋتوۆ, اۋداندىق ءماسليحات حاتشىسى ابزال ساربالاەۆ, ەل اعالارى, اۋىل تۇرعىندارى جانە اتالعان مەكتەپتىڭ تۇلەكتەرى قاتىستى.
-قادىرلى جەرلەستەر! بۇگىن ءبىز يگىلىكتى ءىستىڭ كۋاسى بولىپ وتىرمىز. ەلباسى ن.نازارباەۆ «بولاشاققا باعدار: رۋحاني جاڭعىرۋ» ماقالاسىندا: «پاتريوتيزم كىندىك قانىڭ تامعان جەرىڭە, وسكەن اۋىلىڭا, قالاڭ مەن وڭىرىڭە, ياعني تۋعان جەرىڭە دەگەن سۇيسىپەنشىلىكتەن باستالادى» دەگەن بولاتىن. اۋىل كاسىپكەرلەرىنىڭ, تۇرعىنداردىڭ, جاستاردىڭ قولداۋىمەن اۋىلداردا بىرنەشە الەۋمەتتىك نىسان سالىنىپ, پايدالانۋعا بەرىلدى. مىنە, بۇگىن ن.جۇباەۆ مەكتەبىنىڭ 2008 جىلعى تۇلەكتەرى دە اۋىلعا سۇيىسپەنشىلىكتەرىن ءبىلدىرىپ, تۋعان جەرلەرىن كوركەيتۋگە اتسالىسىپ وتىر. بارشا اۋدان تۇرعىندارىنىڭ اتىنان سىزدەرگە العىسىمىزدى ءبىلدىرىپ, 10 جىلدىق مەرەكەلەرىڭىزبەن شىن جۇرەكتەن قۇتتىقتايمىن! دەگەن اۋدان اكىمى جارماعانبەت ايتۋاروۆ مەكتەپ تۇلەكتەرىنە العىس حات تابىستادى.
شەتپە سەلوسىنىڭ اكىمى مۇحتار ءمۇتاللاپوۆ يگى ىستەردىڭ ۇيىتقىسى بولعان تاۋەلسىزدىكتىڭ قۇرداستارىنا ريزاشىلىعىن ءبىلدىرىپ, جاڭا قوعامدىق ورىن حالىقتىڭ يگىلىگىنە جارايتىنىنا سەنىمدىلىك ءبىلدىردى.
–مەكتەپ بىتىرگەنىمىزگە 10 جىل تولۋىنا وراي تۇلەكتەردىڭ بارلىعىنىڭ بىرلەسە اقىلداسۋىمەن اۋىلعا الەمدەگى ەڭ تانىمال قالالاردان باستاۋ الىپ, ءبىزدىڭ ەلدە جالعاسقان تاجىريبەنى جۇزەگە اسىرۋدى ءجون دەپ تاپتىق. ءبىزدىڭ وبلىسىمىزداعى قالا مەن اۋىلداردا دا بەلەڭ العان يگى ءۇردىستى جالعاستىرۋىمىزعا اۋدان اكىمدىگى قولداۋ كورسەتتى. «مەن ءوز اۋىلىمدى سۇيەمىن» جازۋى اۋدان جاستارىن ەلجاندىلىققا, تۋعان جەرىن قاستەرلەۋگە ۇندەيدى دەگەن سەنىمدەمىن, – دەدى نۇن جۇباەۆ مەكتەبىنىڭ 2008 جىلعى تۇلەگى بالعابەك ناۋرىزباەۆ.
نۇن جۇباەۆ مەكتەبىنىڭ بيىلعى تۇلەكتەرى التىن ۇيالارىنا كەرەكتى قۇرال- جابدىقتارمەن قامتاماسىز ەتىپ, ايلاردىڭ سۇلتانى, ەڭ قايىرلىسى رامازان ايىندا ورتالىق مەشىتتە اۋىزاشار بەردى.
فاريدا مۇڭالقىزى,
ماڭعىستاۋ وبلىسى
