اقتوبە وبلىسىندا 2018 جىل بالا جىلى دەپ جاريالانعان. وسىعان وراي وبلىس اكىمدىگى وسكەلەڭ ۇرپاقتى شىعارماشىلىق دامىتۋ ماقساتىندا بىرقاتار ءىس-شارادان تۇراتىن ارنايى «باقىتتى بالا» جوباسىن ازىرلەدى.
جوبا «رۋحاني جاڭعىرۋ», «تۋعان جەرگە تاعزىم» مەملەكەتتىك باعدارلامالارى اياسىندا ىسكە اسىرىلىپ وتىر. كونكۋرستىڭ قورىتىندى كەشى 1-2 ماۋسىم كۇندەرى وتەدى.
«باقىتتى بالا-2018» كونكۋرسىندا ورەندەر ەسترادالىق اندەر شىرقاماق, ال وعان 10 جاستان 15 جاسقا دەيىنگى تالانتتار قاتىسادى. بايقاۋدىڭ شارتى بويىنشا قازاق تىلىندەگى ءبىر ءاندى (ونىڭ ىشىندە ءوزى جازىپ شىعارعانىن دا) جەكە ورىنداعاننان كەيىن, دۇنيەجۇزىلىك حيتتەردىڭ ءبىرىن تاڭداپ, تالانتىن دالەلدەۋى ءتيىس. كونكۋرس بىرنەشە كەزەڭنەن تۇرادى.
فەستيۆالگە قاتىسۋ ءۇشىن وتىنىشتەردى قابىلداۋ 2018 جىلدىڭ 15 مامىرىندا اياقتالدى. وعان 420 جاس نيەت ءبىلدىرىپتى. قاشىقتىقتان ىرىكتەۋ كەزەڭىندە نەبارى 20 بالا عانا جولداما العان.
سالتاناتتى كەشكە الەمدىك بايقاۋلاردا جۇلدەلى بولعان انشىلەر قاتىسادى. ناقتىراق ايتار بولساق:
- ديماش قۇدايبەرگەن (قازاقستان) – دۇنيە جۇزىنە ايگىلى ءانشى
- دانەليا تولەشوۆا (قازاقستان) – «گولوس. دiتي» 2017 ۋكراينالىق ۆوكالدىق كونكۋرستىڭ جەڭىمپازى
- لۋيزا نۇرقۋاتوۆا – «ۆيتەبسكىدەگى سلاۆيان بازارى» 2015 حالىقارالىق فەستيۆالىنىڭ باس جۇلدەگەرى
- ۆلاد سىتنيك (ۋكراينا) – «سلاۆيان بازارى-2017» كونكۋرسىنىڭ جەڭىمپازى
- دجوردان اراكەليان (ارمەنيا) – ارميان ءانشىسى
- اناستاسيا ديدۋح (ۋكراينا) – اۋە گيمناستى.
بايقاۋدىڭ باس جۇلدەگەرىنە 2 000 000 تەڭگە سىياقى بەرىلمەك. ال نەگىزگى جەڭىمپازدان بولەك 1-ورىن يەگەرىنە 1 500 000 تەڭگە, 2-ورىنعا 750 000 تەڭگە, ال 3-ورىنعا 500 000 تەڭگە كولەمىندە اقشالاي سىيلىق تابىستالادى.
بۇدان بولەك قاتىسۋشىلاردىڭ ءبىرى الەمگە ايگىلى ءانشى, «سلاۆيان بازارى 2015», «Singer-2017» حالىقارالىق كونكۋرستارىنىڭ جەڭىمپازى, «MTV Music Awards» سىيلىعىنىڭ يەگەرى – ديماش قۇدايبەرگەننىڭ اتاۋلى جۇلدەسىمەن ماراپاتتالادى.
ال قازىلار القاسىنىڭ قۇرامىنا حالىقارالىق مادەنيەت جانە ونەر قايراتكەرلەرى ەندى. ولار:
- كۇلپارشىن ايدارحانوۆا - اقتوبە قالاسى اكىمىنىڭ ورىنباسارى;
- ەمرە يۋسەلەن – تۇركيانىڭ ءانشىسى جانە ۆوكال وقىتۋشىسى. ۆوكالدىق ورىنداۋشىلار شولۋلارىنىڭ اۆتورى, ايگىلى بەينە بلوگەر;
- مارات ءايتىموۆ – قازاقستان رەسپۋبليكاسىنىڭ ەڭبەك سىڭىرگەن قايراتكەرى. اقتوبە وبلىستىق فيلارمونياسىنىڭ ءسوليسى, ا.جۇبانوۆ اتىنداعى اقتوبە مۋزىكالىق كوللەدجىنىڭ وقىتۋشىسى;
- ۆلاد سىتنيك – ءارتىس, ونى ۋكراينانىڭ التىن داۋسى دەپ اتايدى. ۆيتەبسكىدەگى «سلاۆيان بازارى — 2017» جەڭىمپازى. 2017 جىلى الەمنىڭ 30 ۇزدىك داۋىسىنا كىردى;
- جەڭىس ىسقاقوۆا – قازاقستاننىڭ ەسترادالىق ءانشىسى, قازاقستان رەسپۋبليكاسىنىڭ ەڭبەك سىڭىرگەن قايراتكەرى. ماسكەۋ قالاسىنداعى «ۆيۆات, ۆيكتوريا» حالىقارالىق كونكۋرسىنىڭ باس جۇلدەگەرى;
- نوديرا پەرماتوۆا (وزبەكستان) – وزبەكستان رەسپۋبليكاسىنىڭ ەڭبەك سىڭىرگەن ءارتىسى.
