سەمينارعا قاتىسۋشىلار كىتاپحاناداعى ءىت-ورتالىقتىڭ جۇمىسىمەن تانىسىپ, جاڭا تەحنولوگيانىڭ سوڭعى مۇمكىندىكتەرىن سارالادى. قازىر اقپاراتتىق تەحنولوگيانىڭ زامانى. كىتاپحاناشىلاردىڭ جۇمىسى باياعىداي وقۋعا العان كىتاپتاردى تىزىمگە الىپ, قول قويدىرىپ الۋمەن بىتپەيدى.
زامان كوشىنە ىلەسىپ, قارقىننان قالماۋ ءۇشىن جاڭاشا جۇمىس جاساۋ جۇيەسى ۇسىنىلىپ وتىر. ءىت-ورتالىقتا كوۆوركينگ, اڭگىمەلەسۋ, دەمالىس ايماعى, جەكەلەگەن جۇمىس جاساۋعا ارنالعان ورىندار, 2 كونفەرەنتس-زال, 3D ستۋديا جانە تەحنولابوراتوريالار جۇمىس جاسايدى. رابوتتى تەحنيكاعا ارنالعان ارنايى ورىندار دا بار. جينالعاندار الدىندا ءسوز العان «نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى يبادۋللا قۇتتىقوجاەۆ:
– جالپى IT-پاركتەر «تسيفرلى قازاقستان» باعدارلاماسىن جۇزەگە اسىرۋ اياسىندا اشىلىپ جاتىر. قازىر IT-ماماندارعا سۇرانىس ارتىپ وتىرعاندىقتان, بۇل پارك جۇمىسىنىڭ ءبىر ماقساتى قىزىلورداعا IT-مامانداردى شوعىرلاندىرۋ بولىپ وتىر. ولاردى تسيفرلاندىرۋ جونىندەگى ناقتى جوبالارعا جۇمىلدىرىپ, جۇمىس جاساۋعا مۇمكىندىك بەرەمىز, – دەدى.
سەميناردا وبلىستىق پارتيا فيليالى توراعاسىنىڭ ءبىرىنشى ورىنباسارى ەلباسىنىڭ پارتيا قىزمەتىن جاڭعىرتۋ جونىندەگى تاپسىرماسى بويىنشا قولعا الىنعان جاڭا پارتيالىق جوبالاردى تانىستىردى.
– بيىلدان باستاپ پارتيانىڭ باستاماسىمەن «رۋحاني جاڭعىرۋ» باعدارلاماسى اياسىندا «قازاقستاننىڭ كىتاپحانالارى» اتتى جاڭا جوبا قولعا الىندى, – دەدى ول. – جوبا اياسىندا ەلىمىزدەگى كىتاپحانالار زاماناۋي ءبىلىم ورتالىعى رەتىندە قايتا قۇرىلىپ, كىتاپ قورىنىڭ ەلەكتروندى نۇسقالارى دايىندالاتىن بولادى.
يبادۋللا قۇتتىقوجاەۆ اقپاراتتىق تەحنولوگيالار ارقىلى بارلىق مەكتەپتەردەگى جانە ۋنيۆەرسيتەتتەردەگى كىتاپحانالاردى بىرىڭعاي ونلاين كىتاپحاناعا قوسۋ, ينتەرنەتكە قول جەتكىزۋ, قازىرگى زامانعى كىتاپتاردى وقۋ مەن ساتۋ ءۇشىن اشىق كەڭىستىكتەر جاسالىپ جاتقاندىعىن ايتتى.
بۇدان سوڭ ءا.تاجىباەۆ اتىنداعى وبلىستىق امبەباپ-عىلىمي كىتاپحاناسىنىڭ ديرەكتورى نۇرجامال مىرزامۇراتوۆا ءسوز الىپ, بىرىڭعاي ونلاين-كىتاپحانا جۇيەسىن قالىپتاستىرۋ, كىتاپ قورلارىن ەلەكتروندى فورماتقا كوشىرۋ باعىتىندا وبلىستا قولعا الىنعان جۇمىستاردى اتاپ ءوتتى.
كىتاپ قورلارىن ەلەكتروندى فورماتقا كوشىرۋ قۇندى جادىگەرلەردى ساقتاپ قالۋمەن قاتار, بۇگىنگى زامان وقىرماندارى ءۇشىن وتە ىڭعايلى. جاڭا تەحنولوگيانىڭ ءتيىمدى جاقتارىن وي ەلەگىنەن وتكىزگەن سەمينارعا قاتىسۋشىلار وزدەرىن تولعاندىرعان سۇراقتارعا مەيىلىنشە جاۋاپ الدى.
باقتيار تايجان,
«ەگەمەن قازاقستان»
قىزىلوردا وبلىسى
