قورعانىس مينيسترلىكتەرى مەن ۆەدومستۆولارىنىڭ باسشىلارى, سونىمەن قاتار الىس جانە تاياۋ شەت مەملەكەتتەردەگى كومپانيالار وكىلدەرى قاتىسىپ وتىرعان كورمە ەلوردانىڭ حالىقارالىق اۋەجايىنداعى اسكەري سەكتور اۋماعىندا ورنالاستى.
بۇل كورمە 2010 جىلدان بەرى وتكىزىلۋدە. وسى ۋاقىت ارالىعىندا «KADEX-2018» كورمەسى قورعانىس ونەركاسىبى ونىمدەرىن وندىرۋشىلەر مەن تۇتىنۋشىلار اراسىندا ءوزارا ءتيىمدى بايلانىس كوپىرىن ورناتۋ مەن دامىتۋدىڭ ناتيجەلى الاڭىنا جانە تەحنولوگيالىق جاڭارتۋ ماسەلەلەرىندە تاجىريبە الماسۋ تەتىگى رەتىندە تانىلدى.
اتاپ وتەرلىگى, «Advanced Def Tech» عىلىمي-تاجىريبەلىك كونفەرەنتسياسى بۇل كورمەنىڭ نەگىزگى ءىس-شاراسىنا اينالدى. جيىندا اسكەري-تەحنيكالىق ىنتىماقتاستىق, قورعانىس-ونەركاسىپ سالالارىن جاڭارتۋ تەتىكتەرى, جاڭا تەحنولوگيالاردى ەندىرۋ بويىنشا وزەكتى ماسەلەلەر كەڭىنەن تالقىعا سالىندى.
كونفەرەنتسيانىڭ العاشقى كۇنى ءتورت پانەلدىك سەسسيا ءوتتى: «كەڭەستىك بروندالعان تەحنيكانى جاڭارتۋ. جاڭا تەحنولوگيالىق شەشىمدەر», «بروندالعان دوڭعالاقتى ماشينالاردى دامىتۋدىڭ زاماناۋي ۇردىستەرى», «ۇشقىشسىز باسقارىلاتىن ۇشۋ اپپاراتتارى. جاڭا بۋىنداعى قارۋلانۋ», «وق اتۋ رەاكتيۆتى جۇيەسىن جاڭارتۋ – جۇيەلەردى جەتىلدىرۋ». قوك (قورعانىس-ونەركاسىپ كەشەنىنىڭ) ءىرى وندىرۋشىلەرى كەڭەستىك بروندالعان تەحنيكانى جاڭارتۋ, وق اتۋ رەاكتيۆتى جۇيەلەرى, بروندالعان دوڭعالاق كولىكتەر جانە ۇشقىشسىز باسقارىلاتىن ۇشۋ اپپاراتتارىن شىعارۋ سالاسىنداعى زاماناۋي زەرتتەمەلەر بويىنشا جوبالار تانىستىرىلدى. سونىمەن بىرگە ت-72, بتر-80, بپم-1, بمپ-2 تانكى نەگىزىندە زاماناۋي ۇرىس مودۋلدەرىن جانە ەلەكتر-وپتيكالىق اسپاپتاردى ىقپالداستىرۋدىڭ قانشالىقتى قاجەتتىگى ساراپقا سالىندى. جيىندا رزسو بم-21 «گراد» كەشەنىن جاڭارتۋدا قاتتى وتىن راكەتالىق قوزعالتقىشتاردى پايدالانۋ اسپەكتىلەرى, قۇرلىق اسكەرلەرىن شىنجىر تاباندىدان دوڭعالاقتى تەحنيكاعا قايتا جاراقتاندىرۋ, بەيبىت ۋاقىتتا جانە ۇرىس ءىس-ارەكەتتەرى كەزىندە ۇشقىشسىز باسقارىلاتىن ۇشۋ اپپاراتتارىن تاجىريبەلىك تۇرعىدا قولدانۋ ماسەلەلەرى كەڭىنەن تالقىلاندى.
كونفەرەنتسيانىڭ ەكىنشى كۇنى قورعانىس جانە اەروعارىش ونەركاسىبى ءمينيسترى بەيبىت اتامقۇلوۆتىڭ قاتىسۋىمەن «قورعانىس-ونەركاسىپ كەشەنىن دامىتۋدىڭ وزەكتى ماسەلەلەرى» تاقىرىبىندا پلەنارلىق سەسسيا ءوتتى. ب.اتامقۇلوۆتىڭ ايتۋىنشا, قورعانىس-ونەركاسىپ كەشەنىنىڭ بۇگىندە ەل ەكونوميكاسىندا وزىندىك ماڭىزدى ورنى بار جانە ەلەۋلى ەكسپورتتىق الەۋەتكە يە. بۇل ءوز كەزەگىندە اسكەري قۋاتپەن قاتار ازاماتتىق سەكتوردىڭ دامۋىنا دا اسەر ەتەدى. بۇگىندە قوك عىلىمي قامتىمدى جۇيە بولىپ تابىلادى. ونىڭ قۇرامىنا 9 مىڭ ادامدى جۇمىسپەن قامتيتىن 40 كاسىپورىن كىرەدى.
ال «قازاقستان ينجينيرينگ» ۇك» اق باسقارما توراعاسى اسەت قۇرمانعاليەۆ ءوز بايانداماسىندا بەسىنشى مەرەيتويلىق «Kadex-2018» كورمەسى تاياۋدا قۇرىلعانىنا 15 جىل تولعان «قازاقستان ينجينيرينگ» كومپانياسىنىڭ مەرەيتويىمەن تۇسپا-تۇس كەلگەنىن اتاپ ءوتتى.
– «قازاقستان ينجينيرينگ» كومپانياسى ءۇشىن «كADEX-2018» كورمەسى وتە ماڭىزدى ءىس-شارا. ءدال وسى جەردە ءبىز ءوزىمىزدىڭ الەۋەتىمىزدى جانە جۇمىسىمىزدىڭ ناتيجەلەرىن بارىنشا تولىق تانىستىرا الامىز, الەۋەتتى سەرىكتەستەرمەن كەزدەسۋگە, قورعانىس-ونەركاسىپ كەشەنى سالاسىنداعى جەتىستىكتەر مەن جاڭاشىلدىقتاردى زەردەلەۋگە مۇمكىندىك بار. سوندىقتان بۇگىنگى پلەنارلىق سەسسيا قوك دامىتۋدىڭ وزەكتى ماسەلەلەرىن كەڭىنەن تالقىلاۋدىڭ ءتيىمدى الاڭىنا اينالىپ وتىر, – دەپ اتاپ ءوتتى ول.
ءا.قۇرمانعاليەۆ بىرقاتار ماشينا جاساۋ كاسىپورىندارىن بىرىكتىرەتىن «قازاقستان ينجينيرينگ» ەلدەگى قوك باستى كومپانيا ەكەندىگىن اتاپ ءوتتى. حولدينگتىڭ كاسىپورىندارى كوپ بەيىندى تەحنولوگيالىق بازاعا يە. بۇل ءوز كەزەگىندە دايىنداۋدان باستاپ دايىن ءونىمدى شىعارۋعا دەيىنگى ءوندىرىستىڭ تولىق تسيكلىن قامتاماسىز ەتۋگە مۇمكىندىك بەرەدى. بۇل كاسىپورىنداردىڭ ارقايسىسى كوپجىلعى تاجىريبەنىڭ ارقاسىندا جيناقتالعان ماڭىزدى قۇزىرەتتەرگە جانە تاپسىرىس بەرۋشىلەرمەن بەرىك بايلانىستارعا يە. كومپانيا ءوزىنىڭ ەنشىلەس جانە تاۋەلدى ۇيىمدارىندا بىرىڭعاي وندىرىستىك, تەحنولوگيالىق, قارجىلىق جانە كادرلىق ساياساتتى قامتاماسىز ەتەدى.
ونىڭ ايتۋىنشا, بۇل فاكتورلار «قازاقستان ينجينيرينگ» كومپانياسىنىڭ الەۋەتى جانە كەلەشەگىنىڭ زور ەكەندىگىن كورسەتەدى.
سونىمەن بىرگە ول كونفەرەنتسياعا قاتىسۋشىلار مەن جۋرناليستەرگە «KADEX-2018» كورمەسىنە كومپانيانىڭ 17 ەنشىلەس جانە تاۋەلدى ۇيىمى كەلەسى باعىتتار بويىنشا قاتىسىپ وتىرعانىن باياندادى, ونىڭ ىشىندە قۇرلىقتاعى قارۋلانۋ جانە تەحنيكا; اۋەدەگى قارۋلانۋ جانە تەحنيكا; اسكەري قارۋلانۋ جانە تەحنيكا بار.
– سىزدەر كورىپ وتىرعانداي, اسكەردىڭ بارلىق تۇرلەرى مەن باعىتتارى بويىنشا تاۋارلار مەن قىزمەتتەردى ۇسىنا الامىز, – دەدى «قازاقستان ينجينيرينگ» كومپانياسىنىڭ باسشىسى. – سونىمەن قاتار ءبىزدىڭ كومپانيا ەكسپورتقا باعىتتالعان جاڭا تەحنيكالىق شەشىمدەردى ازىرلەۋمەن اينالىسادى.
بۇل كومپانيانىڭ مۇمكىندىكتەرىن كورسەتەتىن شاعىن عانا ءتىزىم. ول «قازاقستان ينجينيرينگ» ونىمدەرىمەن جانە قىزمەتتەرىمەن پاۆيلوندا كەڭىنەن تانىسۋدى ۇسىندى.
سونىمەن بىرگە سوڭعى جىلدارى كومپانيا ونىمدەر مەن قىزمەتتەردى كەڭەيتۋ جۇمىستارىن بەلسەندى تۇردە جۇرگىزەتىنى اتاپ ءوتىلدى. بۇل ماقساتتا بىرقاتار ينۆەستيتسيالىق جوبا ىسكە اسىرىلعان. ولاردىڭ قاتارىندا ەس145 تىكۇشاقتارىن قۇراستىرۋ, وپتيكالىق اسپاپتاردى شىعارۋ, «ارلان» جانە «الان» بروندالعان كولىكتەرىن جاساۋ, استانادا اۋە-تەحنيكالىق ورتالىعىن قۇرۋ جانە تاعى باسقالارى بار.
ءا.قۇرمانعاليەۆتىڭ بايانداۋىنشا, مەملەكەت باسشىسىنىڭ تاپسىرماسىنا سايكەس الداعى جىلدارى ەلىمىزدىڭ قورعانىس ونەركاسىبىندەگى 9 ءىرى كاسىپورىندا تەحنولوگيالىق جاڭارتۋ جۇمىستارى جۇرگىزىلەدى. جاڭارتۋ ەسەبىنەن ەڭبەك شىعىندارىن قىسقارتۋ, ءونىمنىڭ وزىندىك قۇنىن تومەندەتۋ, ساپاسىن كوتەرۋ, بۇيىمنىڭ ناقتىلىعىن ارتتىرۋ, ەڭبەك ونىمدىلىگىن ارتتىرۋ باعىتىندا باسىمدىققا يە ارتىقشىلىقتارعا قول جەتكىزۋ جوسپارلانىپ وتىر.
كومپانيا ىشكى نارىقتىڭ قاجەتتىلىكتەرىن قامتاماسىز ەتۋ جانە ونى ەكسپورتتى ىلگەرىلەتۋ ماقساتىندا ماشينا جاساۋ سالاسىندا, ءوزارا ساباقتاس وندىرىستەردە مۋلتيپليكاتيۆتى ناتيجەنى قالىپتاستىراتىن, سونىمەن بىرگە سەرۆيستىك قىزمەتتەردىڭ اياسىن كەڭەيتەتىن كەلەشەگى بار كلاستەرلەردى دامىتۋدى كوزدەپ وتىر. الداعى ۋاقىتتا «قازاقستان ينجينيرينگ» قىزمەتىنىڭ نەگىزگى باعىتتارىنا اينالاتىن كلاستەرلەر رەتىندە راكەتالىق-وتىن, بروندالعان تانك جانە اۋە كلاستەرلەرى اتالدى.
«Advanced Def Tech» عىلىمي-تاجىريبەلىك كونفەرەنتسياسىنىڭ قورىتىندىسى بويىنشا تۇجىرىمداما قابىلداندى. وعان وڭىردەگى مەملەكەتتەر اراسىندا اسكەري-تەحنيكالىق سالاداعى ىنتىماقتاستىقتىڭ بارلىق باعىتتارى كىردى.
ماقسۇت يرجانوۆ
