ءبىر ءسات توپتانىپ تۇرا قالىپ, كۇيەك كەزىندە كۇيگە تۇسكەن قوشقارلار سياقتى سۇزىسسە, ودان قالدى سوپاق دوپتى كوز ىلەسپەس جىلدامدىقپەن ويىنشىلار ءبىر-بىرىنە لاقتىرىپ, دوپقا قولى جەتكەنى جاردى سۇزگەن بۇقاداي ەنتەلەپ ولەرمەندىكپەن العا ۇمتىلادى كەپ. اسىرەسە جاسىلدار ساپىندا ءتۇبىت مۇرتى جاڭا تەبىندەگەن قارا تورى جىگىتتىڭ اتويلاپ شابۋى سۇمدىق. قولىنا ىلىنگەن سوپاق دوپتى قولتىقتاي-قۇشاقتاپ, ەكپىندەي ۇمىلعان ول قارسى كەزدەسكەن جالپاق سارىنى جەر قاپتىرىپ, كەۋدەلەي سوققان تاعى بىرەۋدى وڭ قاپتالعا اۋدارا لاقتىرىپ, سەڭگىر بيىكتەن جەمگە شۇيىلگەن بالا قىرانداي زۋلاعان كۇيى اق سىزىقتان اسىپ جىعىلدى. گولل!!! جاس جىگىتتىڭ ءابجىل جىلدامدىعى مەن ءتۇز بۇركىتتەي قارىمىنا ريزا بولعان ءتورت قاپتال تولى كورەرمەن تىك تۇرىپ قول سوقتى. ءوز كەزەگىندە ءتۇبىت مۇرت قارا تورى دا قاراپ قالعان جوق, جاپپاي قوشەمەت كورسەتكەن جالپاق جۇرتقا قولىن كوتەرىپ, باس ءيىپ مەزىرەت جاسادى.
قارت قۇرلىقتىڭ تورىندە, وزدەرىن اقسۇيەك سانايتىن نەمىستەردىڭ ەلىندە, جان بەرىپ, جان الىسقان رەگبيشىلەر ورتاسىندا اتويلاپ جۇرگەن بۇل جىگىتتىڭ ەسىمى – بوكەيحان ءالي. ۇلتى – قازاق.
* * *
اڭگىمەنى ارىدەن باستاساق بوكەيحان 1993 جىلى 12 ناۋرىز كۇنى گەرمانيانىڭ بادەن-ۆيۋرتەمبەرگ شتاتىنداعى گەيدەلبەرگ قالاسىندا تۋىپتى. اكەسىنىڭ اتى – ءالي سۇرەر. الەكەڭمەن تەلەفون ارقىلى حابارلاسقانىمىزدا, ءوزىنىڭ 1960 جىلى تۇركيانىڭ سالاھي قالاسىندا تۋعانىن ايتتى. 1969 جىلى ءاليدىڭ اتا-اناسى جۇمىس بابىمەن المانيانىڭ گەيدەلبەرگ قالاسىنا كوشىپ كەلگەن ەكەن. سودان بەرى بۇل اۋلەت تۇگەلدەي وسىندا تۇرىپ جاتىر. 1981 جىلى ءالي سۇرەر مەن ساديا قۇرمانبايقىزى ەكەۋى شاڭىراق كوتەرىپ, 1993 جىلى ەگىز پەرزەنتتى بولعان ەكەن. سونىڭ ءبىرى رابيا اتتى قىز دا, ەكىنشىسى بۇگىنگى ءبىزدىڭ كەيىپكەرىمىز بوكەيحان. ودان كەيىن دە بۇل وتباسىنا 1997 جىلى ءتاڭىر قۇبىلاي جانە شاعاتاي اتتى ەگىز ۇل سىيلاپتى. وتباسىنىڭ قىسقاشا تاريحى وسى.
* * *
ءبىزدىڭ كەيىپكەرىمىز بوكەيحان التى جاسىندا مەكتەپكە بارىپ 1999-2003 جىلدارى گەيدەلبەرگ قالاسىنداعى ەممەرتسگۋرند باستاۋىش دارگەيىندە ءبىلىم العان. ودان سوڭ 2003-2010 جىلدارى گەلمگولتس گيمنازياسىن تامامداعان. 2010-2013 جىلدارى ءوزى تۋعان قالاداعى حالىقارالىق جوعارى زاڭ وقۋ ورنىندا وقىپ, 2014 جىلى مانگەيما ۋنيۆەرسيتەتىنىڭ ۇجىمدىق قۇقىقتانۋ فاكۋلتەتىنە ءتۇسىپتى. قازىرگى تاڭدا وسىندا ءبىلىم الىپ ءجۇر.
ەندىگى ءسوز جاس جىگىتتىڭ سپورتتىق جولىنا ۇڭىلسەك, بوكەيحان 2001 جىلى سەگىز جاسىندا رەگبيدى باستاپتى. 2004 جىلى بادەن-ۆيۋرتەمبەرگ شتاتىنىڭ جاسوسپىرىمدەر, كەيىن جاستار قۇراماسى ساپىنا قابىلدانىپ, 2011 جىلعا دەيىن وسىندا تۇراقتى ونەر كورسەتكەن.
وسى ارالىقتا ماقالا باسىندا سيپاتتاپ وتكەنىمىزدەي, جاستار اراسىندا گەرمانيا چەمپيونى اتانىپ, ۇلتتىق قۇراما قاتارىنا قابىلدانىپ, فرانتسيانىڭ تاربە قالاسىندا وتكەن ەۋروپا چەمپيوناتىندا ونەر كورسەتىپتى. ءسويتىپ ءبىر جىلدىڭ ىشىندە بوكەيحان ءالي ۇلى بولاشاعى زور جاس رەگبيشىگە بۇيىراتىن «تۆ Pforzheim» كۋبوگىن يەلەنىپ, ونىڭ كومانداسى بۋندەسليگادا كۇمىس جۇلدەگە قول جەتكىزەدى.
كەلەسى 2012 جىلى جاسىنداي جانىپ, قىرانداي تۇلەپ كوزگە تۇسكەن جاس جىگىتتى تۇركيانىڭ ۇلتتىق قۇراماسى اتتاي قالاپ, قاتارىنا قوسقان. 2013-14 ماۋسىم ويىندارىندا تۇركيالىق رەگبيشىلەر ەۋروپالىق ۇلتتار كۋبوگىنىڭ ءۇشىنشى ديۆيزونىندا ونەر كورسەتىپ, ءبىر توپقا تۇسكەن سلوۆاكيا قۇراماسىن 31:5, ازەربايجاندىقتاردى 53:3 ەسەبىمەن تىزە بۇكتىرسە, تاللين قالاسىندا ەستونيانى 49:5 ەسەبىمەن جەڭدى. وسى سايىستاردا ءبىزدىڭ بالا ماماندار تاراپىنان «ۇزدىك ويىنشى» رەتىندە ءبىراۋىزدان مويىندالدى.
قازىرگى تاڭدا شاحين كومۇركىس باسقارىپ وتىرعان تۇرىك رەگبيشىلەرى دامۋ ۇستىندە. سوڭعى جىلدارى حالىقارالىق دەبيۋتىنە قاتىسقانىمەن IRB قۇرامىنا ىلىگە المادى. بىراق سوعان قاراماستان تۇركيالىقتاردى ەۋروپا رەگبي فەدەراتسياسىنىڭ مۇشەسى رەتىندە قابىلدادى. وسىنىڭ ارقاسىندا كوماندا ءدال بۇگىن حالىقارالىق رەگبي – 15 جوعارى دەڭگەيلى ماتچتاردا ونەر كورسەتۋدە.
بەكەن قايرات ۇلى,
«ەگەمەن قازاقستان»
