جيىندى اشقان گۇلشارا ابدىقالىقوۆا جاقىندا وتكەن ءحى استانا ەكونوميكالىق فورۋمىندا قازاقستان پرەزيدەنتى: ء«بىز مەملەكەت قالىپتاستىرۋ ءىسىنىڭ باستاۋىندا «بولاشاق» باعدارلاماسىن جۇزەگە اسىرۋعا كىرىستىك. سول ارقىلى 13 مىڭ قازاقستاندىق مەملەكەت ەسەبىنەن الەمنىڭ ۇزدىك ۋنيۆەرسيتەتتەرىندە وقۋعا مۇمكىندىك الدى», – دەپ اتاپ وتكەنىنە توقتالدى. سونداي-اق مەملەكەت باسشىسىنىڭ جاھاندىق ەڭبەك نارىعىنىڭ ترانسفورماتسيالانۋ ماسەلەسىن ايتىپ, كرەاتيۆتى ويلاۋ قابىلەتىن قالىپتاستىرۋعا, قاجەتتى اقپاراتتى تاۋىپ, ونى دۇرىس قولدانۋ قابىلەتتەرىن جەتىلدىرۋگە باعىتتالعان ءبىلىم بەرۋ سالاسىن رەفورمالاۋ جونىندە قازاقستان تاراپىنان قابىلدانىپ جاتقان شارالارعا نازار اۋدارعانى اتاپ ءوتىلدى.
مەملەكەتتىك حاتشى ەلباسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى بيىلعى جولداۋىندا ادامي كاپيتالدى دامىتۋ ماسەلەلەرىنە ەرەكشە كوڭىل بولگەنىنە توقتالدى. وزگەرىستەرگە ۇنەمى بەيىم بولۋ جانە جاڭا ءبىلىمدى مەڭگەرۋ قابىلەتىن دامىتۋ ءبىلىم بەرۋ باعدارلامالارىنىڭ نەگىزگى باسىمدىعىنا اينالۋعا ءتيىس. ول ءۇشىن بارلىق جاستاعى ازاماتتاردى قامتيتىن ءبىلىم بەرۋ ىسىندە ءوزىمىزدىڭ وزىق جۇيەمىزدى قۇرۋ ءىسىن جەدەلدەتۋ قاجەت.
– بۇل ۇدەرىستەر بارىسىندا «بولاشاق» حالىقارالىق باعدارلاماسىن ساپالى ىسكە اسىرۋعا قاتىستى زور جاۋاپكەرشىلىك جۇكتەلىپ وتىر, – دەدى گۇلشارا ابدىقالىقوۆا.
كوميسسيا وتىرىسىندا ءبىلىم جانە عىلىم ءمينيسترى ە.ساعاديەۆتىڭ شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ حاتتامالىق تاپسىرمالارىنىڭ ورىندالۋى تۋرالى ەسەبى تىڭدالدى, سونداي-اق «بولاشاق» باعدارلاماسىنىڭ ىسكە اسىرىلۋىنا بايلانىستى بىرقاتار ماسەلە قاراستىرىلدى.
كوميسسيا شەشىمىمەن ستيپەنديا ماگيستراتۋرا مەن دوكتورانتۋرادا وقۋعا, سونداي-اق الەمنىڭ جەتەكشى عىلىم جانە ءوندىرىس ورتالىقتارىندا تاعىلىمدامادان وتۋگە جىبەرىلەتىن 67 ۇمىتكەرگە تاعايىندالدى.
وتىرىس قورىتىندىسى بويىنشا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا «بولاشاق» حالىقارالىق ستيپەندياسىنا قاتىستى جۇمىستاردى ودان ءارى جالعاستىرۋ جونىندە بىرقاتار تاپسىرما بەردى.
