پالاتا 2004 جىلعى 18 ماۋسىمداعى ۇجىمدىق قاۋىپسىزدىك تۋرالى شارت ۇيىمى شەڭبەرىندە قۇپيا اقپاراتتىڭ ساقتالۋىن ءوزارا قامتاماسىز ەتۋ تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالادى.
حاتتامامەن ەنگىزىلگەن وزگەرىستەر كەلىسىمگە قوسىلۋ مۇمكىندىگىن ۇسىنۋدى جانە بارلىق حالىقارالىق قۇقىق سۋبەكتىلەرىنىڭ ونىڭ تەتىكتەرىنە قاتىسۋىن, كەلىسىمدى ىسكە اسىرۋ تەتىگىنىڭ نەگىزگى بۋىنى بولىپ تابىلاتىن ۋاكىلەتتى ورگانداردىڭ قۇرامىن ناقتىلاۋدى, قۇپيا اقپاراتتىڭ تارالۋىنا جول بەرگەن تۇلعاعا قاتىستى زاڭ قۇزىرەتىن ناقتىلاۋدى, سونداي-اق ناقتىلايتىن جانە رەداكتسيالىق سيپاتتاعى تۇزەتۋلەردى كوزدەيدى. سەنات قازاقستان مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى (ورتا ءبىلىم بەرۋدى جاڭعىرتۋ جوباسى) راتيفيكاتسيالادى.
قارىز تۋرالى كەلىسىمگە 2017 جىلعى 21 تامىزدا استانا قالاسىندا قول قويىلعان بولاتىن. قۇجات مەملەكەت باسشىسى ن.ءا. نازارباەۆتىڭ بەس ينستيتۋتسيونالدىق رەفورماسىن ىسكە اسىرۋ جونىندەگى «ۇلت جوسپارى – 100 ناقتى قادامنىڭ» 76-قادامىنداعى, سونداي-اق قازاقستان رەسپۋبليكاسىندا ءبىلىم بەرۋدى جانە عىلىمدى دامىتۋدىڭ 2016 – 2019 جىلدارعا ارنالعان مەملەكەتتىك باعدارلاماسىندا بەلگىلەنگەن باسىمدىقتارعا سايكەس كەلەدى.
ورتا ءبىلىم بەرۋدى جاڭعىرتۋ جوباسى بويىنشا شىعىنداردىڭ جالپى سوماسى 75 ميلليون اقش دوللارىن, ونىڭ ىشىندە حالىقارالىق قايتا قۇرۋ جانە دامۋ بانكىنىڭ قارىزى 67 ميلليون اقش دوللارى مولشەرىندە, قارىزدى رەسپۋبليكالىق بيۋدجەتتەن قوسا قارجىلاندىرۋ 8 ميلليون اقش دوللارى مولشەرىندە قۇرايتىن بولادى.
حالىقارالىق قايتا قۇرۋ جانە دامۋ بانكىنىڭ 67 ميلليون اقش دوللارى سوماسىنداعى قارىزى قازاقستان رەسپۋبليكاسىنا 5,5 جىل جەڭىلدىك كەزەڭىن قوسا العاندا, 17 جىل وتەۋ مەرزىمىنە بەرىلەدى.
كەلىسىم ۇبت تەستەۋدىڭ جاڭا ستاندارتتارىن قالىپتاستىرۋ ارقىلى باعالاۋ جۇيەسىن, وقۋداعى جەتىستىكتەردى سىرتقى باعالاۋدى جانە تەست تاپسىرمالارىنىڭ بازاسىن جاڭارتۋدى قايتا قاراۋ سياقتى ءبىلىم بەرۋدىڭ جاڭارتىلعان مازمۇنىن قولداۋعا باعىتتالعان باستامالار كەشەنىن قامتيدى.
كەلىسىمنىڭ باستى باعىتتارىنىڭ ءبىرى ءبىلىم بەرۋ ماتەريالدارىنا قولجەتىمدىلىكتى ارتتىرۋ, مۋلتيمەديالىق جابدىقپەن جاراقتاندىرۋ جانە اۋىل مۇعالىمدەرىنىڭ الەۋەتىن ۇلعايتۋ ارقىلى اۋىلدىق جالپى ءبىلىم بەرەتىن جانە شاعىن جيناقتالعان مەكتەپتەردەگى وقۋشىلاردىڭ ۇلگەرىمىن جاقسارتۋ بولىپ تابىلادى. كەلىسىمنىڭ جالپى قارجىلاندىرۋ سوماسىنىڭ شامامەن
67 پايىزى 5400 اۋىلدىق مەكتەپتى ينتەراكتيۆتى جابدىقپەن قامتاماسىز ەتۋگە جۇمسالاتىن بولادى. اۋىلدىق مەكتەپ كابينەتتەرىنىڭ 60 پايىزىن كومپيۋتەرلەرمەن, پروەكتورلارمەن جانە ەكرانمەن جاراقتاندىرۋعا مۇمكىندىك بەرەتىن 32,5 مىڭ جابدىق جيناقتالىمىن ساتىپ الۋ جوسپارلانىپ وتىر.
مەنەدجمەنت بويىنشا وقىتۋمەن اۋىلدىق جەرلەردەگى مەكتەپتەردىڭ شامامەن 200 مىڭ مۇعالىمدەرى مەن باسشىلارى قامتىلۋعا ءتيىس. 3 ميلليوننان استام وقۋشى, ونىڭ ىشىندە ەرەكشە ءبىلىم بەرىلۋىنە قاجەتتىلىگى بار بالالار كەلىسىمنىڭ باس بەنەفيتسيارلارى بولادى.
كەلىسىم ينكليۋزيۆتى ءبىلىم بەرۋدى قولداۋعا دا باعىتتالعان. جالپى ءبىلىم بەرەتىن مەكتەپتەر نەگىزىندە 9 رەسۋرستىق ورتالىق قۇرۋ جانە ولاردى جاراقتاندىرۋ, دەفەكتولوگتەردىڭ, پسيحولوگيالىق-مەديتسينالىق-پەداگوگيكالىق كونسۋلتاتسيالار بەرەتىن مامانداردىڭ بىلىكتىلىگىن ارتتىرۋ, كورۋ قابىلەتى جانە ينتەللەكتى بۇزىلعان بالالار ءۇشىن وقۋلىقتار ساتىپ الۋ جوسپارلانىپ وتىر.
كەلىسىمدى ىسكە اسىرۋ اۋىلدىق جانە قالالىق مەكتەپتەردىڭ اراسىنداعى ۇلگەرىمدەگى الشاقتىقتى قىسقارتۋعا جانە ءبىلىم بەرۋ ساپاسىن تەڭدەستىرۋگە ىقپال ەتۋگە ءتيىس.وتىرىس بارىسىندا سەناتورلاردىڭ دەپۋتاتتىق ساۋالدارى جاريا ەتىلدى. دينار نوكەتاەۆا دوكتورانتۋراعا قابىلداۋ ءتارتىبىن وزگەرتۋ تۋرالى; ناريمان تورەعاليەۆ رەسپۋبليكالىق بالالار جانە جاسوسپىرىمدەر ءتۋريزمى مەن ولكەتانۋ ورتالىعىن اشۋ جايىندا; ءالي بەكتاەۆ اۋىل شارۋاشىلىعى ماشينالارىن جاساۋدى دامىتۋعا قاتىستى; ۆلاديمير ۆولكوۆ قىزىلوردا وبلىسىندا ء«ۇندى قارا سوراسى» وسىمدىگىنىڭ تارالۋى مەن ەسىرتكى پلانتاتسيالارىن انىقتاۋ جانە جويۋ شارالارى; اسقار بەيسەنباەۆ زاڭ شىعارۋ ينستيتۋتى مەن رەسپۋبليكالىق قۇقىقتىق اقپارات ورتالىعىن بىرىكتىرۋ جانە كوممەرتسيالىق مەكەمەگە جاتقىزۋ جونىندە; تولەۋبەك مۇقاشەۆ 22 مامىردا استانادا بولعان قاتتى جەلدىڭ سالدارىنان تۋىنداعان تابيعي اپات تۋرالى; ميحايل بورتنيك تۇرعىن ءۇي باعدارلاماسىن ىسكە اسىرۋعا قاتىستى ساۋال جولدادى.
