شاراعا قاتىسقان ماڭعىستاۋ وبلىسىنىڭ اكىمى ەرالى توعجانوۆ ءبىر رۋحانيات جاناشىرلارىنا توسبەلگى تاعىپ, ديپلوم مەن سىياقى تاپسىردى. اتاپ ايتساق, مادەنيەت جانە سپورت مينيسترلىگىنىڭ «مادەنيەت سالاسىنىڭ ۇزدىگى» توسبەلگىسىمەن ونەر زەرتتەۋشى ايتبەرگەن جاڭبىرشى, بەلگىلى جىرشى جەتكىزگەن سەيتوۆ, ماڭعىستاۋ اۋداندىق مادەنيەت ءۇيىنىڭ ادىسكەرى جاپىراق تاناشەۆا, جاڭاوزەن قالالىق «مۇنايشى» مادەنيەت ءۇيى جانىنداعى «اسىل مۇرا» حالىقتىق فولكلورلىق ءانسامبلىنىڭ جەتەكشىسى قاراكوز كەمەروۆا ماراپاتتالدى.
سونداي-اق, 2017 جىلدىڭ قورىتىندىسى بويىنشا مادەنيەت جانە ونەر سالاسىنىڭ ۇزدىك قىزمەتكەرلەرى وبلىس اكىمىنىڭ قولىنان ارنايى ديپلوم جانە 300 000 تەڭگە كولەمىندەگى سىياقى الدى. مەرەكەلىك شارادا ءسوز العان ءوڭىر باسشىسى ەرالى توعجانوۆ: «مادەنيەت پەن ونەر – ارقاشاندا ۇلتتىق رۋحانياتىمىزدىڭ باستى تىرەگى بولىپ كەلدى جانە بولا بەرەدى دە. سوندىقتان ۇلتتىق بولمىسىمىزدى ساقتاۋ – ءسىز بەن ءبىزدىڭ قاسيەتتى پارىزىمىز.
ۇلت بولاشاعى ەڭ الدىمەن ادەبيەتكە, مادەنيەتكە, ونەرگە تىكەلەي بايلانىستى. قازاق حالقىنىڭ تۋمىسىنان بويىندا قالىپتاسىپ, قانى مەن جانىنا سىڭگەن اسىل قاسيەتتى قازىنالارعا نەگىزدەلەتىنى دە ءسوزسىز.
كيەلى ماڭعىستاۋ ءوڭىرىنىڭ وزىندە ودەرىڭىزگە بەلگىلى, وڭىرلىك ءتولتۋما مادەني برەندتىڭ بىرەگەيى بولعان ماڭعىستاۋدىڭ جەتى قايقىسى مەن بەس جۇيرىكتەرىنىڭ ءوزى وسىنىڭ ناقتى دالەلى» دەدى.
كۇنى بۇگىنگە دەيىن ونەر مايتالماندارىنىڭ قاتىسۋىمەن وتكەن شارالار از ەمەس. ماسەلەن, ەلىمىزدىڭ, ءوڭىرىمىزدىڭ مادەني ءومىرىنىڭ الەمگە تانىلۋىنا ايتارلىقتاي ىقپال ەتكەن «اقجارما» فولكلورلىق ءانسامبلىنىڭ اۆستريا, تۇرىكمەنستان رەسپۋبليكالارىنداعى كونتسەرتتىك ساپارلارىن, وبلىس ونەرپازدارى مەن قولونەرشىلەرىنىڭ حالىقارالىق «ەكسپو-2017» كورمەسىندەگى ءساتتى ونەرىن, ماڭعىستاۋ وبلىسىنىڭ تۇركمەنباشى قالاسىنداعى مادەني كۇندەرىن, جەكەلەگەن ونەر ۇجىمدارىنىڭ شەتەلدەردەگى كونكۋرس, فەستيۆالدەردەگى ەلەۋلى تابىستارىن ەرەكشە اتاپ وتۋگە بولادى.
رەسپۋبليكالىق دەڭگەيدە وتكەن وتپان تاۋداعى امال تويى, ەسەنعالي راۋشانوۆ, سابىر اداي جانە سۆەتقالي نۇرجانىڭ شىعارماشىلىق كەشتەرى, 11 جىلدان كەيىن وتكىزىلگەن اقىندار ايتىسى ۇيىمداستىرىلىپ, ن.ءجانتورين اتىنداعى مۋزىكالىق دراما تەاترىنىڭ 15 جىلدىق مەرەيتويى اتالىپ ءوتتى.
بۇل شارالار تەك اتالىپ قانا وتكەن جوق, ۇلتتىق رۋحىمىزدى كوتەرىپ, سالت-ءداستۇرىمىزدى جاڭعىرتا تۇسكەنى انىق.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
