ءىىم باسشىسى اتاپ وتكەندەي, جىل سايىن تابيعي ءورت دەڭگەيى ايتارلىقتاي ارتىپ كەلەدى. سونىمەن قاتار, بۇگىندە وڭىرلەردە ورمان جانە دالا ورتتەرىنىڭ الدىن-الۋ شارالارى باستالدى.
«مامىر ايىنىڭ سوڭىنا دەيىن توتەنشە جاعدايلار كوميتەتىنىڭ ءورت ءسوندىرۋ ينسپەكتسياسى اۋىل شارۋاشىلىعى مينيسترلىگى مەن اكىمدىكتەرگە قارايتىن ۇلتتىق پاركتەردى, تابيعي قورىقتاردى تەكسەرۋدى اياقتايدى. بالالار لاگەرلەرىن تەكسەرۋگە دە ەرەكشە نازار اۋدارىپ وتىرمىز», — دەدى ق. قاسىموۆ.
ورمان-دالا القاپتارى مەن دەمالىس ورىندارىن كۇن سايىن پاترۋلدەۋ قولعا الىنعان. وسى ماقساتتا مەملەكەتتىك ءورت باقىلاۋ, ورمان شارۋاشىلىعى مەكەمەلەرى مەن جەرگىلىكتى پوليتسيا قىزمەتكەرلەرىنەن تۇراتىن ءموبيلدى توپتار قۇرىلۋدا.
قازىرگى تاڭدا شەكارالاس ايماقتاردا بىرلەسە ارەكەت ەتۋ ماسەلەلەرى قارالىپ جاتىر. وسىعان وراي, رەسەي فەدەراتسياسىنىڭ توتەنشە جاعدايلار مينيسترلىگىنىڭ كورشىلەس جاتقان بەس بولىنىستەرىمەن تاكتيكالىق وقۋ-جاتتىعۋلار وتكىزۋ جوسپارلانعان.
ىشكى ىستەر ءمينيسترى, سونداي-اق, قوسىمشا پىسىقتاۋدى تالاپ ەتەتىن بىرقاتار ماسەلەلەردى اتاپ ءوتتى. ولاردىڭ قاتارىندا — وڭىرلەردىڭ اۆتوتسيستەرنالارمەن از قامتىلۋى, تەحنيكانىڭ ەسكىرۋى, مەملەكەتتىك ورتكە قارسى قىزمەت بولىمشەلەرى جوق ەلدى مەكەندەردىڭ بولۋى.
بۇدان وزگە, ق. قاسىموۆ «سەمەي ورمانى» رەزەرۆاتىنداعى كەشەگى ءورتتىڭ سالدارىن جويۋ بارىسى تۋرالى حابارلادى. ءىىم باسشىسىنىڭ ايتۋىنشا, سەمەي ماڭىنداعى قاراعاي ورمانىندا 21 مامىردا ساعات 14.30-دا ءورت شىققان. ءورتتى ءسوندىرۋ كەزىندە 8 بىرلىك تەحنيكا جانە تابيعي رەزەرۆاتتان 79 ادام تارتىلعان. سونىمەن قاتار, قوسىمشا 244 ادام مەن 55 بىرلىك تەحنيكا تارتىلعان. وسكەمەننەن مي-8 تىكۇشاعى كەلدى. ساعات 21:00-دە جالپى كۇشتەردىڭ كومەگىمەن ءورت تولىق ءسوندىرىلدى.
«100 گەكتار ورمان ورتكە وراندى, قازىرگى كەزدە ءورت سوندىرىلگەن, ءورتتىڭ تارالۋ قاۋپى جوق, تەرگەۋ توبى ءورتتىڭ پايدا بولۋ سەبەپتەرىن انىقتاۋ جۇمىستارىن جۇرگىزىپ جاتىر», — دەدى ق. قاسىموۆ.
سونىمەن قاتار, ق. قاسىموۆتىڭ ايتۋىنشا, ءورتتىڭ نەگىزگى سەبەبى — ادام فاكتورى, بەلگىلەنگەن ەرەجەلەر مەن شارالاردى ساقتاماۋ.
شىعىس قازاقستان وبلىسىنىڭ اكىمى د. احمەتوۆ, اقتوبە وبلىسىنىڭ اكىمى ب. ساپارباەۆ, جامبىل وبلىسىنىڭ اكىمى ا. مىرزاحمەتوۆ, سولتۇستىك قازاقستان وبلىسىنىڭ اكىمى ق. اقساقالوۆ, پاۆلودار وبلىسى اكىمىنىڭ ورىنباسارى ۇ. جازىلبەك وڭىرلەردەگى ورمان جانە دالا ورتتەرىنىڭ الدىن الۋ جانە ولاردى جويۋعا دايارلىق ماسەلەلەرى جونىندە باياندادى.
وسى جىلدىڭ ءورت قاۋپى بار ماۋسىمىندا مەملەكەتتىك ورمان يەلەنۋشىلەردىڭ ورمان ورتتەرىن جويۋعا دايىندىعى تۋرالى اۋىل شارۋاشىلىعى ءبىرىنشى ۆيتسە-ءمينيسترى ا. ەۆنيەۆ باياندادى.
ەلىمىزدىڭ مەملەكەتتىك ورمان قورىنىڭ (موق) جالپى كولەمى 29,8 ملن گەكتاردى قۇرايدى. ءورت تارالۋىنىڭ نەگىزگى سەبەبى — ورمان مەكەمەلەرىنىڭ ءالسىز ماتەريالدىق-تەحنيكالىق بازاسى, سونداي-اق ءورت باقىلاۋ مۇنارالارىنىڭ جوقتىعى.
2018 جىلدىڭ ءورت قاۋپى بار ماۋسىمىنا دايىندىق كەزىندە اشم ازىرلىك ءىس-شارالارىنىڭ كەشەنىن وتكىزدى.
قر اۋماعىندا ورمان جانە دالا ورتتەرىنىڭ الدىن الۋ جانە جويۋ جونىندەگى ءىس-شارالار جوسپارى بەكىتىلدى, سونداي-اق وبلىستار اكىمدىكتەرىنىڭ ورمان شارۋاشىلىعى قۇرىلىمدىق بولىمشەلەرىنىڭ, اشم تابيعات قورعاۋ مەكەمەلەرىنىڭ جانە قر ءىىم توتەنشە جاعدايلار كوميتەتىنىڭ ۆەدومستۆولىق باعىنىستى ۇيىمدارىنىڭ ورمان ورتتەرىمەن كۇرەس بويىنشا ءوزارا ءىس-قيمىل جوسپارلارى كەلىسىلدى.
ا. ەۆنيەۆتىڭ ايتۋىنشا, 244 دانا ءورت ءسوندىرۋ اۆتوماشيناسى جوندەلىپ, دايىندىق جاعدايىنا كەلتىرىلدى, سونداي-اق 460 دانا دوڭگەلەكتى تراكتورلار پايدالانۋعا دايىن.
«عارىش ساپارى» اق–مەن بىرلەسىپ ورمان ورتتەرى مەن ورمان قورى القاپتارىنا عارىشتىق مونيتورينگ جۇرگىزۋ ماسەلەسى پىسىقتالدى.
«ورمان ورتتەرىن ۋاقىتىلى انىقتاۋ جانە جويۋ ماقساتىندا اعىمداعى جىلى «قازاۆياورمانقورعاۋ» رمقك كۇشىمەن رەسپۋبليكانىڭ سەگىز وبلىسىندا 8,869 ملن گەكتار القاپتا نەمەسە رەسپۋبليكانىڭ مەملەكەتتىك ورمان قورى اۋماعىنىڭ 30%-ىندا اۆياتسيامەن قاراۋىلداۋ جۇزەگە اسىرىلاتىن بولادى», — دەدى ا. ەۆنيەۆ.
ىشكى ىستەر جانە اۋىل شارۋاشىلىعى مينيسترلىكتەرىنىڭ ەسەپتەرىن قاراعاننان كەيىن, قر پرەمەر-ءمينيسترى باقىتجان ساعىنتاەۆ, بيىل قازگيدرومەت بولجامىنا سايكەس رەسپۋبليكانىڭ كەيبىر وڭىرلەرىندە جاز مەزگىلىندە اۋا تەمپەراتۋراسى نورمادان جوعارى بولاتىنىن اتاپ ءوتتى. بۇل جاعدايلار ەلىمىزدىڭ ورمان جانە دالا ايماقتارىندا ءورت قاۋىپسىزدىگىن قامتاماسىز ەتۋ ماسەلەلەرىنە كوبىرەك نازار اۋدارۋدى تالاپ ەتەدى.
اۋىل شارۋاشىلىعى مينيسترلىگىنە, ينۆەستيتسيالار جانە دامۋ مينيسترلىگىنە وبلىستارىنىڭ, استانا جانە الماتى قالالارىنىڭ اكىمدىكتەرىمەن بىرلەسە وتىرىپ, تابيعاتتى قورعاۋ جانە ورمان مەكەمەلەرىنىڭ ورتكە قارسى تەحنيكامەن قامتاماسىز ەتىلۋ دەڭگەيىن ارتتىرۋ شارالارىن قابىلداۋ تاپسىرىلدى.
اكىمدىكتەر مەن ىشكى ىستەر مينيسترلىگىنە بالالار ساۋىقتىرۋ لاگەرلەرىنىڭ, ساناتوريلەر مەن دەمالىس ورىندارىنىڭ ورتكە قارسى قاۋىپسىزدىك شارالارىنا ەرەكشە نازار اۋدارۋ تاپسىرىلدى.
ىشكى ىستەر مينيسترلىگى مۇددەلى مەملەكەتتىك جانە جەرگىلىكتى اتقارۋشى ورگاندارمەن بىرلەسىپ, ورمان جانە دالا ورتتەرىنىڭ الدىن الۋ جانە ولاردى جويۋ جونىندەگى ۆەدومستۆوارالىق ءىس-قيمىل جوسپارىنىڭ ساپالى ورىندالۋىن قامتاماسىز ەتۋى قاجەت.
اتالعان ماسەلە بويىنشا ۇيلەستىرۋ جۇمىستارى پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى ءو. شوكەەۆكە تاپسىرىلدى.
