«سونىمەن قاتار, ۇبت-عا دايىندىق بارىسىندا شەشۋدى قاجەت ەتەتىن ماسەلەلەر دە بار. ءبىرىنشى, مونيتورينگ ناتيجەسى بويىنشا مينيسترلىك تاراپىنان وبلىس اكىمدەرىنە بىرنەشە رەت تەحنيكالىق قۇرالداردى, ونىڭ ىشىندە 4G ءموبيلدى بايلانىس سيگنالدارىن باسۋ قۇرالدارىن, مەتالل ىزدەگىشتەر, ونلاين ترانسلياتسيالاۋ كامەرالارىن ساتىپ الۋ جانە ۇبت وتكىزۋ پۋنكتەرىن قامتاماسىز ەتۋ تۋرالى حات جولداندى», - دەدى مينيستر.
ونىڭ ايتۋىنشا, بۇگىنگى مونيتورينگ ناتيجەلەرىنە سايكەس وڭىرلەردىڭ ۇبت پۋنكتەرى ءالى كۇنگە دەيىن زاماناۋي تەحنيكالىق قۇرالدارمەن تولىق قامتاماسىز ەتىلمەگەن.
«ەكىنشى, جەرگىلىكتى اتقارۋشى ورگانداردان بىتىرۋشىلەردى تاسىمالداۋ, قاجەت جاعدايدا ولاردى تاماقتاندىرۋ مەن ورنالاستىرۋدى قامتاماسىز ەتۋ, سونداي-اق تەستىلەۋ كەزىندە بىتىرۋشىلەر مەن اتا-انالار ءۇشىن ارنايى اۋىز سۋى, كونديتسيونەر, مەديتسينالىق-پسيحولوگيالىق كومەك, جالپى قاۋىپسىزدىك ماسەلەلەرىن ۇيىمداستىرۋ بويىنشا مىندەتتەرى ساقتالادى. وسىعان بايلانىستى وبلىس اكىمدەرى ۇبت-نى ۇيىمداستىرۋ جانە وتكىزۋ ماسەلەلەرىنە ارنايى نازار اۋدارۋدى سۇرايمىز», - دەدى ەرلان ساعاديەۆ.
