ءومىردىڭ ءتۇرلى قيىندىعىنا ۇشىراعاننان كەيىن ول جانىنىڭ تىنىشتىعىن ىزدەپ, قىلقالامدى سەرىك ەتكەن بەينەلەۋ ونەرىنە بەت بۇرۋىنا اسىل جارى سەبەپشى بولىپتى. سودان بولسا كەرەك, كورمەگە تەك جان دۇنيەسى بەينەلەنگەن, يمپرەسسيونيزم باعىتىنداعى 40 كارتيناسىن قويعان.
ولاردىڭ باسىم بولىگى وسى جىلى عانا سالىنىپتى. شىعارمالارىنا كوز جۇگىرتسەك, وتكەن كۇنگە, ءسابي شاعىنا, تۋعان جەرىنە دەگەن ساعىنىش لەبى ەسىپ تۇرادى. سارى ءتۇستى بوياۋدى كوبىرەك قولدانعانىنىڭ دا سىرى وسىندا سياقتى. كەيبىر تۋىندىلارىندا تاۋ شاتقالدارىن اسىرەلەي, اسەمدەگەن تۇستارى دا بار. ادەمىلىگى ءوز الدىنا, اۆتور وسى ارقىلى ءومىردىڭ ءتۇرلى قيىندىقتارىن جەتكىزگىسى كەلگەندەي. كارتينالارىنىڭ يدەيالىق استارىنان وتكەن زامان مەن بۇگىنگى كۇننىڭ ساباقتاسىپ جاتقانى بايقالادى.
– كورمەنى «ماڭگى ەلەس» دەپ اتاۋىمنىڭ سەبەبى – ەلەس ەشقاشان بىتپەيدى, ول ماڭگى, شەتى-شەگى مەن ۇشى-قيىرى جوق, – دەپ رەنات قىسقا عانا قايىردى.
شىن تالانت, ونىڭ قىلقالامىنان تۋعان دۇنيەلەر ۋاقىت وتە كەلە جارقىراي بەرمەك. تالانتىنىڭ تاعى ءبىر ەرەكشە تۇسى – كورمەگە قويىلعان تۋىندىلارىنىڭ كوبىن «كوزسىز» وتىرىپ سالىپتى.
– كوزىمدى جۇمىپ وتىرىپ سۋرەت سالعاندا ارتىق ەشنارسە ويلامايمىن. كوز الدىما ەلەستەگەن دۇنيەنى ادەمى اسەرگە بەرىلە وتىرىپ, شابىتتانا سالامىن. سوندا قيالىمداعى بەينە قاعاز بەتىنە انىعىراق تۇسەدى. ارينە, نەگىزگى بولىگىن سالىپ بولىپ, ارلەيتىن جەرىنە كەلگەندە قاراپ وتىرىپ سالامىن. كوزىمدى جۇمىپ سالعان كەزدە ىشكى جان-دۇنيەم, سەزىمىم سوزبەن ايتىپ جەتكىزگىسىز, ەرەكشە كۇيگە بولەنەدى, – دەيدى ول بىزگە شىعارماشىلىق قۇپياسىن اشىپ.
ونىڭ ايتۋىنشا, كوزسىز سۋرەت سالۋ ءادىسىن الەمدىك تاجىريبەدە ون جاسقا دەيىنگى بالالار عانا قولدانىلادى ەكەن. سەبەبى وسى جاسقا دەيىنگى ورەندەردىڭ جان-دۇنيەسى, تۇيسىگى, كوزقاراسى كىرشىكسىز تازا بولادى. ال ودان ارى قاراي بۇل سەزىم باسەڭدەيتىن كورىنەدى.
ال رەناتتىڭ جاسى وتىزدان اسسا دا وسى ادىسپەن سالۋى سۋرەت الەمىنە كەش كەلۋىنەن بولسا كەرەك. ول نەبارى جەتى جىلدىڭ ىشىندە كەز كەلگەننىڭ قولىنان كەلە بەرمەيتىن جەتىستىكتەرگە جەتتى. بۇگىنگە دەيىن بەلارۋس, رەسەي ەلدەرىندە جەكە كورمەلەرىن وتكىزدى. اقش, يتاليا, ارمەنيا مەملەكەتتەرىندەگى بايقاۋلارعا قاتىسىپ, جەڭىمپازدار قاتارىنان كورىنگەن.
ايان ءابدۋالي,
«ەگەمەن قازاقستان»
