تاراپتار كەشە قازاقستان مەن حورۆاتيا ۇكىمەتىنىڭ اراسىندا قول قويىلعان ونەركاسىپ, اۋىل شارۋاشىلىعى, اقپاراتتىق تەحنولوگيالار مەن ەنەرگەتيكا سالاسىنداعى ءوزارا ارەكەتتەستىكتى ارتتىرۋعا ارنالعان ەكونوميكالىق ىنتىماقتاستىق جونىندەگى كەلىسىمگە قولداۋ ءبىلدىردى. قۇجاتقا استانا ەكونوميكالىق فورۋمى اياسىندا قر ۇلتتىق ەكونوميكا ءمينيسترى تيمۋر سۇلەيمەنوۆ جانە قازاقستانداعى ەلشىلىك قىزمەتىن قوسا اتقاراتىن حورۆاتيانىڭ رەسەي فەدەراتسياسىنداعى ەلشىسى تونچي ستانيچيچ قول قويدى.
كەلىسىم ەكى جاقتىڭ دا مۇددەسىن ەسكەرەتىن شەشىمدەردى قابىلداۋدىڭ ءتيىمدى مەحانيزمى بولىپ تابىلاتىن قازاقستان-حورۆات ۇكىمەتارالىق كوميسسياسىن قۇرۋعا نەگىز بولادى. كەزدەسۋ بارىسىندا تاراپتار كولىك لوگيستيكاسى جانە تۋريزم سالالارىنداعى ىنتىماقتاستىق الەۋەتىن تالقىلادى. سونداي-اق, ءوزارا ساۋدا كولەمى 2017 جىلدىڭ قورىتىندىسى بويىنشا, 316 ميلليون اقش دوللارىن قۇراعانى اتاپ ءوتىلدى. بۇل الدىنعى جىلدىڭ كورسەتكىشىنەن 8 ەسە جوعارى.
حورۆاتيانىڭ ستاتيستيكالىق مالىمەتتەرى بويىنشا, بۇل ەلگە 2017 جىلى 3 مىڭنان استام قازاقستاندىق تۋريست بارعان. كەزدەسۋگە قاتىسقان ت.ستانيچين حورۆات ۇكىمەتىنىڭ وسى جىلى كۇزدە استانا قالاسىندا ديپلوماتيالىق وكىلدىك اشۋعا نيەتتى ەكەنىن راستادى. "حورۆاتيا ەلشىلىگىن اشۋ - ەل بيلىگىنىڭ قازاقستانمەن بايلانىسىن نىعايتۋداعى ساياسي ىنتاسىنىڭ بار ەكەنىن كورسەتەدى. بۇل ارەكەت ەكىجاقتى ىنتىماقتاستىقتىڭ ودان ارى دامىپ, تەرەڭدەۋىنە ىقپال ەتەدى", - دەپ ءبولىستى ر.ۆاسيلەنكو.
