ول رەسەيلىك رەجيسسەر سەرگەي دۆورتسەۆويدىڭ «ايكا» اتتى كارتيناسىندا باستى ءرولدى سومداعان. جەڭىسكە قول جەتكىزگەن سامال ەسلياموۆا رەجيسسەرگە العىسىن ايتتى. "سەرگەي, ساعان كوپ راقمەت. بۇل زور قۇرمەت", - دەدى ول.
"ايكا" الەۋمەتتىك دراماسى قىرعىزستاننان كەلگەن قىز جايىندا وربىگەن. ول ماسكەۋدە بوسانىپ, بالاسىن پەرزەنتحانادا تاستاۋعا ءماجبۇر بولادى, كارتينادا سول قىزدىڭ انالىق سەزىمى مەن قايعى-مۇڭى سۋرەتتەلەدى. فيلم بەس كومپانيانىڭ قولداۋىمەن تۇسىرىلگەن: "كينودۆور" اتتى سەرگەي دۆورتسەۆويدىڭ ستۋدياسى, سونىمەن قاتار, گەرمانيانىڭ, پولشانىڭ, قىتايدىڭ, قازاقستاننىڭ كومپانيالارى.
بۇعان دەيىن ول «تيۋلپان» فيلمىندە باستى ءرولدى سومداعان. بۇل تۋىندى 2008 جىلى كانندا «ەرەكشە كوزقاراس» كونكۋرسىنىڭ باس جۇلدەسىن, جاس ادىلقازىلاردىڭ جۇلدەسىن, سونىمەن قاتار فرانتسيانىڭ ءبىلىم مينيسترلىگىنىڭ جۇلدەسىن جەڭىپ العان بولاتىن.
