تاعىلىمى مول كەزدەسۋگە الماتى قالاسىندا تۇراتىن سوعىس جانە تىل ارداگەرلەرى كەلىپ, قاسىرەتتى كۇندەردىڭ اۋىر ەستەلىكتەرىن اڭىزداي اڭگىمەلەدى. قالا مەكتەپتەرىنەن ارنايى كەلگەن بۇلدىرشىندەر قامكوڭىل قاريالارعا گۇل شوقتارىن ۇسىنىپ, ءوز ونەرلەرىن پاش ەتتى. سونداي-اق, جينالعان قوناقتار مۇراجايداعى «قازاقستان ۇلى وتان سوعىسى جىلدارىندا» ەكسپوزيتسياسىمەن كەڭىرەك تانىسىپ, جىلدار جىلناماسىنا قانمەن جازىلعان قاتەرلى سوعىس تاريحىنا ءبىر ءسات ۇڭىلگەندەي بولدى.
كەش سوڭى ۇلتتىق قاۋىپسىزدىك كوميتەتى شەكارا قىزمەتى اكادەمياسىنىڭ ساربازدارى, كورەي مادەني ورتالىعى, «اياجان» مەديتسينا كوللەدجى ونەرپازدارىنىڭ, م.يۋ. لەرمونتوۆ اتىنداعى مەملەكەتتىك اكادەميالىق ورىس دراما تەاترى مەن ت. جۇرگەنوۆ اتىنداعى قازاق ۇلتتىق ونەر اكادەمياسى ارتيستەرىنىڭ ورىنداۋىنداعى مەرەكەلىك كونتسەرتكە ۇلاستى. وندا شىرقالعان پاتريوتتىق اۋەندەر جاستاردى ەرلىك رۋحقا تاربيەلەي ءتۇستى. سونداي-اق قايىرىمدىلىق ءىس-شاراعا دەمەۋشىلىك تانىتقان كاسىپورىندار ارداگەرلەرگە تولىمدى تارتۋ-تارالعىلارىن ۇسىندى.
«جەڭىس كۇنى – جان اياماي ەلىن قورعاعان ەرجۇرەك باتىرلارىمىزدى ەسكە الۋ مەرەكەسى. اساۋ ۋاقىت تىزگىنىن اۋىزدىقتاي المايسىڭ – جىلدان-جىلعا ادامزاتتىڭ باسىنا الاپات قاسىرەت تۇسىرگەن زۇلمات سوعىس جايلى باياندايتىن ۇلى وتان سوعىسى ارداگەرلەرىنىڭ قاتارى سيرەپ بارادى. ارداگەرلەرمەن جۇزدەسۋ وسكەلەڭ ۇرپاقتىڭ ەلىمىزدىڭ وتكەن تاريحىن تەرەڭىرەك زەردەلەۋىنە ىقپال ەتىپ, ولاردىڭ بويىندا ازاماتتىق سانا-سەزىم, قازاقستاندىق ءپوتريوتيزمدى قالىپتاستىرۋ, وتانسۇيگىشتىككە, قاشاندا ەل مۇددەسىنە قىزمەت ەتۋگە لايىق بولۋعا تاربيەلەپ, ارداگەرلەرگە قۇرمەت كورسەتىپ, العىس سەزىمىن بىلدىرۋگە مۇمكىندىك بەرەدى» – دەيدى مۋزەي ديرەكتورىنىڭ ورىنباسارى بەيبىتقالي قاقاباەۆ.
قايىرىمدىلىق باعىتقا دەن قويعان شارا ۇيىمداستىرۋشىلارى مۇنداي جۇزدەسۋلەردى تەك مەرەكە كۇندەرى عانا ەمەس, ۇدايى وتكىزىپ تۇرۋعا نيەتتى ەكەندىكتەرىن ءبىلدىردى. كەلەلى كەزدەسۋگە كەلگەن مايدانگەرلەر مەن تىل ارداگەرلەرى وزدەرىنە كورسەتىلگەن سىي-قۇرمەتكە ءدان ريزا بولىپ, ءماز-مەيرام بولىپ تارقاستى.
ارمان وكتيابر,
«ەگەمەن قازاقستان»
الماتى
