الەمدەگى بەدەلدى وقۋ ورىندارىنىڭ ءبىرى سانالاتىن كەمبريدج ۋنيۆەرسيتەتى قابىرعاسىندا تۇڭعىش رەت قازاقستاندىق يننوۆاتسيالىق مەكتەپتەردىڭ تاجىريبەسى كورسەتىلدى. «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتورايىمى كۇلاش ءشامشيدينوۆانىڭ «Time for Change: 10 years of Nazarbayev Intellectual schools» – «وزگەرىس ۋاقىتى: نازارباەۆ زياتكەرلىك مەكتەپتەرىنە 10 جىل» تاقىرىبىندا وقىعان ءدارىسى ءبىلىم سالاسىنداعى بەدەلدى عالىمدار مەن ساراپشىلاردىڭ, بريتاندىق پەداگوگيكا فاكۋلتەتىنىڭ جانە جوعارى وقۋ ورىندارى وكىلدەرىنىڭ, سونداي-اق ديپلوماتتار مەن جۋرناليستەردىڭ, ستۋدەنتتەردىڭ قىزىعۋشىلىعىن تۋدىردى. ۇلىبريتانيادا ءبىلىم الاتىن جانە قىزمەت ەتەتىن كوپتەگەن وتانداستارىمىز كەمبريدجدەگى قازاقستان كۇندەرىنە ارنايى كەلىپ قاتىستى.
كەمبريدج ۋنيۆەرسيتەتى جانىنداعى حالىقارالىق باعالاۋ جانە ءبىلىم بەرۋ كەڭەسىنىڭ (CAIE) حالىقارالىق ءبىلىم بەرۋ ديرەكتورى تريستان ءستوبيدىڭ ايتۋىنشا زياتكەرلىك مەكتەپتەردىڭ قۇرىلۋى ءبىلىم بەرۋ سالاسىنداعى ۇلكەن جەتىستىكتەردىڭ ءبىرى.
«نازارباەۆ ۋنيۆەرسيتەتى» دببۇ پرەزيدەنتى, «نازارباەۆ زياتكەرلىك مەكتەپتەرى» دببۇ قامقورشىلىق كەڭەسىنىڭ توراعاسى شيگەو كاتسۋ جانە قازاقستان رەسپۋبليكاسىنىڭ ۇلىبريتانياداعى توتەنشە جانە وكىلەتتى ەلشىسى ەرلان ىدىرىسوۆ قازىردە زياتكەرلىك مەكتەپتەرى ۇلتتىق ءبىلىم بەرۋ جۇيەسىندەگى نەگىزگى درايۆەر ەكەنىن اتاپ ءوتتى. كەمبريدج ۋنيۆەرسيتەتى ءبىلىم فاكۋلتەتىنىڭ دەكانى دجەفف حەيۋورد فاكۋلتەتتىڭ زياتكەرلىك مەكتەپتەرىمەن ىنتىماقتاستىق ورناتىپ, بىرلەسكەن جوبانى جۇزەگە اسىرىپ جاتقانى تۋرالى ءوز ماقتانىشىن ءبىلدىردى. قازاقستانداعى يننوۆاتسيالىق مەكتەپتەرمەن جاسالعان وسى سەرىكتەستىك پەداگوگيكا سالاسىنداعى جاھاندىق ىنتىماقتاستىقتىڭ جارقىن مىسالى.
كەمبريدج ۋنيۆەرسيتەتى ءبىلىم فاكۋلتەتى, كەمبريدج ۋنيۆەرسيتەتىنىڭ حالىقارالىق باعالاۋ جانە ءبىلىم بەرۋ كەڭەسى (CAIE), Cambridge University Press باسپاسى, Bottisham Village College سەرىكتەس مەكتەبىندە وتكەن جۇمىس كەزدەسۋلەرى بارىسىندا ءبىلىم بەرۋ سالاسىنداعى جاھاندىق ۇردىستەر, سونداي-اق ءبىلىم الۋعا تەڭ مۇمكىندىك, وقۋ باعدارلامالارىن جانە وقۋ قۇرالدارىن ازىرلەۋ, باعالاۋ جۇيەسى,مۇعالىمدەردىڭ كاسىبي بىلىكتىلىگىن ارتتىرۋ جانە مۇعالىمدەرگە جالپى جاعداي جاساۋ, وقۋلىق اۆتورلارى مەن ساراپشىلارىن وقىتۋ سەكىلدى قازىرگى پەداگوگيكا عىلىمىنىڭ وزەكتى ماسەلەلەرى تالقىلاندى. وسى ءىس-شارانىڭ ەڭ قىزىقتى ساتتەرىنىڭ ءبىرى قازىردە ۇلىبريتانيانىڭ ۇزدىك جوعارى وقۋ ورىندارىندا ءبىلىم الىپ جاتقان زياتكەرلىك مەكتەپتەردىڭ تۇلەكتەرىمەن وتكەن كەزدەسۋ.
– مەن بارشا قازاقستاندىقتاردى نازارباەۆ زياتكەرلىك مەكتەپتەرىوسى ون جىل ىشىندە الەمدىك ءبىلىم بەرۋ كوشباسشىلارىنىڭ قاتارىنا قوسىلۋىمەن قۇتتىقتايمىن. ءبىز وسى بىرەگەي ترانسۇلتتىق جوبانىڭ دامۋىنا ات سالىسقانىمىزدى ماقتان ەتەمىز. وسى كۇندەردىڭ ءوتۋى نازارباەۆ زياتكەرلىك مەكتەپتەرى جانە كەمبريدج ۋنيۆەرسيتەتىنىڭ جەمىستى ىنتىماقتاستىعىنىڭ جاڭا كەزەڭىن اشتى, –دەپ اتاپ ءوتتى الەمدىك پەداگوگيكانىڭ بەدەلدى ساراپشىسى, پروفەسسور كولين ماكلافلين.
